Béatrice Munyenyezi ukurikiranyweho ibyaha bya Jenoside yakorewe Abatutsi ashinjwa gukorera mu yahoze ari Perefegitura ya Butare, kuriuyu wa Kabiri yitabye Urukiko Rwisumbuye rwa Huye, asaba ko yakongera kwimurirwa muri Gereza ya Mageragere akuwe mu ya Nyamagabe.
Munyenyezi woherejwe na Leta Zunze Ubumwe z’Amerika (USA) ngo akurikiranwe ku byaha yakoreye i Huye, ubu ufungiye muri Gereza y’Abagore ya Nyamagabe nyuma y’aho yagaragaje ko adashaka kuburanira kuri Skype bigatuma yimurirwa muri iyo gereza yegereye aho ibyaha ashinjwa byabereye.
Uyu mugore w’imyaka 52, akaba n’umukazana wa Nyiramasuhuko Pauline wari Minisitiri w’Iterambere ry’Umuryango mu gihe cya Jenoside yakorewe Abatutsi, yagejejwe mu Rwanda muri Mata 2021 nyuma yo gufungirwa imyaka 10 muri Amerika ahamijwe kubeshya inzego z’abinjira n’abasohoka muri icyo Gihugu.
Uyu munsi yabwiye urukiko ko aho afungiye i Nyamagabe hatorohereza abashaka kumusura, ndetse n’abaganga be mu gihe avuga ko arwaye umuvuduko ukabije w’amaraso.
Yinginze umucamanza ngo urukiko rutegeke ko yasubizwa gufungirwa muri Gereza y’abagore iri i Mageragere mu Mujyi wa Kigali, aho yari afungiye nyuma yo kugezwa mu Rwanda.
Umwunganizi we na we ati: “Turasaba ko asubizwa i Kigali akazaza kuburana ku italiki yumva azaba ameze neza”.
Ubushinjacyaha bwavuze ko Munyenyezi ari we wanze kuburanira kuri Skype asaba kujyanwa mu rukiko rurimo kumuburanisha, ko ari uko yajyanywe muri gereza yegereye urwo rukiko.
Ubushinjacyaha bwavuze ko aho afungiye i Nyamagabe nta cyabuza abaganga n’abamusura kumugeraho, bukabona ko agamije gusa gutinza urubanza.
Ikindi nanone yasabye urukiko ni uko urubanza rwasubikwa akabanza kubona inyandiko ihindura inyito y’ikirego nk’uko bayisabye kandi bikumvikanwaho ubwo baheruka mu rukiko.
Urukiko rwanzuye ko Munyenyezi agomba kubanza agahabwa guhabwa umwanya wo gusoma inyandiko nshya y’ibyo aregwa, ariko runashimangira ko rutahindura icyemezo cyo kumufungira i Nyamagabe kuko cyashingiye ku kuba yaranze kuburanira kuri Skpye bityo akegerezwa urukiko rwa Huye rumuburanisha.
Urukiko rwamugeneye igihe cyo gusoma dosiye ye, ruvuga ko urubanza rwe ruzatangira taliki 31 z’uku kwa Gicurasi.
Munyenyezi ni umugore wa Arsène Shalom Ntahobali, na we ufungiwe ibyaha bya Jenoside hamwe na nyina Nyiramasuhuko Pauline, kuko babihamijwe n’Urukiko Mpuzamahanga Mpanabyaha rw’Arusha.
Munyenyezi ashinjwa ko yagiye kuri za bariyeri mu Mujyi wa Butare akajya atungira agatoki Abatutsi bagombaga kwicwa, cyane cyane abigaga muri Kaminuza Nkuru y’u Rwanda, akaba yaranasabye Interahamwe gufata abagore ku ngufu mbere yo kubica.
Mu iburanisha ryabanje, Munyenyezi yaburanye ahakana ibyaha byose yashinjwaga.
