Zigama CSS yungutse miliyari 35.7 mu mwaka wa 2023

  • NTAWITONDA JEAN CLAUDE
  • Ukuboza 15, 2023
  • Hashize amezi 3
Image

Ubuyobozi bw’Ikigo cy’imari cyo kuzigama no kugurizanya (Zigama CSS) bwatangaje ko icyo kigo cyungutse amafaranga y’u Rwanda asaga miliyari 35.7 muri uyu mwaka wa 2023, hakaba haragaragaye inyongera y’amafaranga miliyari 12.9 z’amafaranga y’u Rwanda ugereranyije n’inyungu ya miliyari 22.8 yabonetse mu mwaka wa 2022.

Iyo nyongera yatangajwe mu nama y’Inteko Rusange ya Zigama CSS yateranye ku nshuro ya 39, kuri uyu wa Kane tariki ya 15 Ukuboza 2023 mu Mujyi wa Kigali, ku cyicaro Gikuru giherereye ku Kimihurura mu Karere ka Gasabo.

Iyo nama yayobowe na Minisitiri w’Ingabo Juven Marizamunda, yitabirwa na Minisitiri w’Umutekano mu Gihugu Alfred Gasana, Umugaba w’Ingabo z’u Rwanda zirwanira ku Butaka Maj Vincent Nyakarundi, Umugaba w’Ingabo zoirwanira mu Kirere Lt Gen ean Jacques Mupenzi, abayobozi b’amashami anyuranye mu nzego z’umutekano n’abanyamuryango batoranyijwe.

Umuyobozi Mukuru wungirije w’Inama y’Ubutegetsi ya Zigama CSS Col Callixte Kalisa, ni we wemeje ko  kugeza mu kwezi kwa Nzerii uyu mwaka, inyungu y’iki kigo cy’imari yageze kuri miliyari zisaga 35.7 z’amafaranga y’u Rwanda.

Col. Kalisa yagize ati: “Ubwiyongere bw’inyungu mu gihembwe gisoza umwaka wa 2023 twabushyira ku mafaranga yagurishijwe inyubako yo mu Karere ka Nyarugenge ndetse n’amabwiriza mashya yashyizweho afasha kubara inyungu nyuma yo gutanga inguzanyo ku bakiliya.”

Yakomeje avuga ko mu mwaka utaha, Zigama CSS yiyemeje kurushaho kunoza imitangire ya serivisi, abonerahpo guhishura ko hagiye gushyirwaho umurongo wa telefoni utishyurwa ushobora guhamagarwa amasaha 24/7 mu korohereza abanyamuryango kugera ku makuru.

Zigama CSS ni Ikigo cy’imari gihuje ahanini n’abari mu nzego z’umutekano by’umwihariko ababarizwa mu Ngabo z’u Rwanda, Polisi y’u Rwanda, Urwego rw’Igihugu rushinzwe Imfungwa n’Abagororwa (RCS), Urwego rw’Igihugu rushinzwe Iperereza n’Umutekano (NISS), n’Urwego rw’Igihugu rw’Ubugenzacyaha (RIB).

  • NTAWITONDA JEAN CLAUDE
  • Ukuboza 15, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE