Zari yateye utwatsi ibyo gusubirana na Diamond Platnumz

Umuherwekazi Zari Hassan uzwi nka Zari the Boss Lady, yateye utwatsi ibyo Diamond Platnumz bafitanye abana aherutse gutangaza ko abishatse basubirana.

Yabigarutseho mu ijoro ryo ku Cyumweru tariki 26 Mutarama 2025, ubwo yagiranaga ikiganiro na kimwe mu bitangazamakuru bikorera muri Kenya.

Zari Yabajijwe ku mubano we na Diamond Platnumz ukunze kutavugwaho rumwe n’abantu batandukanye, anabihuza n’ibyo Diamond aherutse kwigamba ko abishatse basubirana.

Yagize ati: “Njye na Diamond turacyafatanya kurera no gukuza abana bacu gusa, ibituma iyo twahuye abantu bibeshya ko hari icyo tugipanga kitari ukurera abana gusa, ni ukubana neza gusa kuko tutari abanzi, tugomba gutuma abana bakura babona twubahana nubwo tutabana.”

Yongeraho ati: “Diamond yabaye ahahise ariko nkeneye kumwubaha nka se w’abana banjye, ibyo iyo mbikoze ntibiba bivuze ko ntubashye urugo rwanjye kuko umugabo wanjye turi kumwe, atuma ntuza agatuma numva ndi mu mwanya unkwiye.”

Ubwo yabazwaga impamvu abafana bakunze kumushinja ko ahinduka iyo ari mu kiganiro kizwi nka Young Famous & African, ugasanga akenshi arakaye, Zari yavuze ko nta na rimwe azaba marayika ngo atuze hari umusuzuguye.

Ati: “Ikiganiro cyacu ntabwo cyanditse. Uko gikorwa ni kuriya nyine. Uwo mubona mu kiganiro ni we njye sinakwiyoberanya, sinaba marayika ngo ntuze mbona umuntu ansuzugura, iyo winjiriye umuryango wanjye uba unkeneye kandi ndaza, iyo unyitwayeho neza nanjye ndakubaha.”

Yabajijwe icyo kibazo nyuma y’uko aherutse kwibasira abavuze ko umugabo we Shakibu atazi icyongereza nyuma yo kumwumva ubwo bahataniraga kujya mu byamamare bizajya bikora igice cya gatatu cy’ikiganiro cya Netflix gikorwa n’ibyamamare nyafurika kiswe Young, Famous & African.

Zari Hassan na Diamond Platnumz bafitanye abana babiri, Nillan na Tiffa, bakaba bavuga ko batifuza ko abana babo bakura babona batubahana bikaba byabatera ibikomere.