Yannick Noah ategerejwe mu Rwanda mu irushanwa rya Tennis

  • SHEMA IVAN
  • Gashyantare 17, 2024
  • Hashize amezi 2
Image

Umufaransa Yannick Noah wahoze ari umukinyi ukomeye w’umukino wa Tennis ku Isi, atengerejwe i Kigali, ubwo u Rwanda ruzaba rwakira irushanwa rya ‘ATP Challenger 50 Tour’ kuva ku itariki 26 Gashyantare kugeza ku wa 10 Werurwe 2024.

Ishyirahamwe ry’umukino wa Tennis mu Rwanda, ryatangaje ko uyu Mufaransa usanzwe ari n’umuhanzi uzwi, azaba ari i Kigali nk’umushyitsi w’imena muri iri rushanwa.

Yannick Noah w’imyaka 63 azwiho kuba yaregukanye Grand Slam, rimwe mu marushanwa ane akomeye mu mukino wa Tennis. Mu 1983 yatwaye Roland Garros ikinirwa mu gihugu cy’u Bufaransa, mbere yo kwegukana irushanwa nk’iri mu bakina ari babiri mu mwaka wakurikiye wa 1984.

Uyu mugabo asazwe ari umuhanzi ukomeye, aho yigaruriye imitima ya benshi mu ndirimbo ze zitandukanye nka Mon Eldorado, les Lionnes hamwe n’izindi nyinshi aririmba mu rurimi rw’Igifaransa.

U Rwanda rugiye kuba igihugu cya mbere cyo munsi y’ubutayu bwa Sahara kizakira irushanwa rya ‘ATP Challenger 50 Tour’, aho rizitabirwa n’abakinnyi basaga 60 babigize umwuga, bari mu myanya yo kuva kuri 150 gusubiza hejuru.

Iri rushanwa riri ku rwego rwa kabiri rw’amarushanwa ya Tennis ahuza abakinnyi babigize umwuga mu bagabo, rizabera ku bibuga bya IPRC-Kigali Ecology Tennis Club.

Rizaba rigabanyije mu byumweru bibiri, aho icyumweru cya mbere kizakinwa hagati y’itariki 26 Gashyantare n’iya 2 Werurwe, gikurikirwe n’icya kabiri, kuva tariki 4 kugeza ku wa 10 Werurwe 2024.

ATP Challenger 50 Tour iri mu marushanwa atanu ategurwa n’Ishyirahamwe rya Tennis y’ababigize umwuga (ATP), itanga amanota 50.

Buri mukinnyi anyura muri iki cyiciro cy’irushanwa u Rwanda ruzakira, afite intego yo kugera mu bakinnyi 100 ba mbere no gukina amarushanwa ya ATP Tour na ’Grand Slam’.

  • SHEMA IVAN
  • Gashyantare 17, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE