Volleyball: Ikipe y’Igihugu y’Abagore yashyikirijwe agahimbazamusyi yakoreye mu igikombe cy’Afurika 2023

Minisiteri ya Siporo yahaye buri mukinnyi w’Ikipe y’Igihugu y’u Rwanda y’Abagore muri Volleyball, agahimbazamusyi ka miliyoni 3 z’amafaranga y’u Rwanda.

Aka gahimbazamusyi kaje nyuma y’amezi 11, Ikipe y’Igihugu y’Abagore muri Volleyball yageze muri ½ cy’Igikombe cy’Afurika cyabereye muri Cameroun muri Kanama 2023.

Iyi kipe y’umutoza Paulo de Tarso yabuze amahirwe yo kugera ku mukino wa nyuma itsinzwe na Misiri amaseti 3-0 (14-25, 11-25, 10-25).

Mu mukino wo guhatanira umwanya wa gatatu, iyi kipe y’u Rwanda yatsinzwe na Cameroun yari mu rugo amaseti 3-1.

Muri iri rushanwa ryarangiye ryegukanywe na Kenya, Kapiteni w’Ikipe y’Igihugu, Munezero Valentine yari mu bakinnyi beza b’irushanwa.