Vinicius Jr yegukanye igihembo cy’umukinnyi mwiza wa FIFA

Vinicius Jr, Rutahizamu w’ikipe y’Igihugu ya Brazil na Real Madrid yo muri Espagne, yahawe igihembo cy’umukinnyi mwiza w’umwaka wahize abandi mu bagabo mu 2024, n’Ishyirahamwe ry’Umupira w’Amaguru ku Isi (FIFA).

Vinicius Jr wegukanye icyo gihembo ku nshuro ya mbere yahigitse abarimo Rodri wa Manchester City na Jude Bellingham bakinana muri Real Madrid.

Ibirori byo gutanga icyo gihembo byabereye i Doha muri Qatar mu ijoro ryo kuri uyu wa Kabiri tariki 17 Ukuboza 2024.

Vinicius Jr w’imyaka 24 yegukanye iki gihembo nyuma yo gufasha Real Madrid kwegukana igikombe cya UEFA Champions League ku nshuro ya 15, La Liga, Spain Super Cup na UEFA Super Cup.

Mu mwaka w’imikino wa 2023/2024 Vinicius Jr yatsinze ibitego 31 mu mikino 46.

Icyo gihembo gitangwa hashingiwe ku byavuye mu matora y’abatoza b’amakipe y’ibihugu na ba kapiteni bayo, abanyamakuru n’abafana hirya no hino ku Isi.

Umukinnyi wahembwe nk’umukinnyi mwiza wahize abandi mu bagore muri ibyo birori yongeye kuba Aitana Bonmati wafashije FC Barcelona kwegukana igikombe cya UEFA Champions League y’Abagore ya 2024.

Umuzamu mwiza w’umwaka yabaye Emi Martinez wa Aston Villa yo mu Bwongereza n’ikipe y’igihugu ya Argentina , yafashije Argentina kwegukana ibikombe cya Copa America 2024 ndetse anafasha na Aston Villa kubona itike ya UEFA Champions League ku nshuro ya mbere.

Mu bagore umuzamu w’umwaka yabaye Umunyamerika Alyssa Naeher ukinira Chicago Red Stars.

Umutoza w’umwaka mu bagabo
yabaye Carlo Ancelotti utoza Real Madrid mu gihe mu bagore yabaye Emma Hayes utoza ikipe y’igihugu ya Leta zunze Ubumwe za Amerika .

Igihembo cy’umukinyi watsinze igitego cyiza cy’umwaka “ Puskas Award” cyahawe Alejandro Garnacho ukinira Manchester United.

Ibirori byasize ikipe y’umwaka igizwe na Emi Martinez wa Aston Villa mu izamu, mu bwugarizi harimo Daniel Carvajal wa Real Madrid, Roben Dias wa Man city na Antonio Rudger wa Real Madrid.

Mu kibuga hagati hakinamo Rodri wa Manchester City, Toni kross wahagaritse Ruhago na Jude Bellingham wa Real Madrid.

Ubusatirizi bugizwe na Vinicius Junior wa Real Madrid Erling Haaland wa Manchester City na Lamine Yamal wa FC Barcelona.