Uwari Majoro muri FDLR arasabira Perezida Kagame umudali w’ishimwe

  • NGABOYABAHIZI PROTAIS
  • Ugushyingo 24, 2023
  • Hashize amezi 3
Image

Bamwe mu bahoze mu mitwe yashinzwe igamije gutera u Rwanda, baturutse mu mashyamba ya Repubulika iharanira Demokarasi ya Congo (RDC) kuri ubu bakaba bakomeje urugamba rwo kubaka u Rwanda, barasabira Perezida wa Repubulika Paul Kagame umudali w’ishimwe nk’Umuyobozi wababariye abamurwanyaga.

Bagaragaza ko bishimira ibikorwa bya Perezida Kagame, birimo kuba yarahaye imbabazi zitagira imbereka abari bagamije gusenya u Rwanda, bityo bakifuza ko akwiye igihembo cy’umuyobozi wagororeye abamurwanyaga bifuza no kumwambura ubuzima, gukomeza kubaho neza.

Umwe muri abo bamushima ni Majoro Kubwayo Peter w’imyaka 48, uvuga ko yinjiye mu mitwe irwanya Leta anyuze mu gihugu cy’u Burundi.

Kuri ubu akaba yicuza kuba yarataye igihe kirenze imyaka 25 abungera mu mashyamba, arya nabi, akarara habi n’imvune nyinshi, ariko nanone ngo yishimira ko yageze mu Rwanda akabona imbabazi atari yiteguye kubona ku buyobozi yafataga nk’abanzi.

Mu gihe yaje azi ko mu gisirikare umwanzi wawe aba agomba kwicwa ndetse na we yiteguye guhita arangizwa n’Ingabo z’u Rwanda (RDF), yatunguwe no kubona ahubwo izo ngabo zimwakiranye urugwiro.

Yagize ati: “Ibi mvuga ntabwo ari uko ndimo kuvugana n’umunyamakuru gusa, ni ibintu bigaragarira amaso ku Isi yose. Perezida Kagame akwiye umudali cyangwa se igihembo cy’uwituye ineza abahoze ari abanzi be. Niba bizakorwa n’imiryango mpuzamahanga, niba ari twe bahoze bafite umutima mubi wo kumugirira nabi, gusa akwiye ishimwe. Nta hantu na hamwe ku Isi umuntu urwanya Leta yasubijwe mu buzima busanzwe, agahabwa imperekeza y’amafaranga menshi, inzu nziza y’agatangaza itari munsi ya miliyoni 20, ibi ni ibintu njye ntari niyumvisha”.

Majoro Kubwayo akomeza avuga ko ubundi bo bari bakwiye igihano ntangarugero nk’abantu bari bakomeje kwimakaza ingengabitekerezo ya Jenoside bagamije guhekura u Rwanda.

Ati: “Imbabazi za Kagame rero njye nazibonanye Yesu Krisito ni we nabonye ingabo ze zica ugutwi uwari uje kumwica Yesu agahita asubizaho uko gutwi. ubundi twebwe twagombye kuba turi imfungwa cyangwa se yaradukatiye igihano cy’urupfu, ariko ntabyo yakora kuko imvugo ni yo ngiro urugamba yarwanye rwari rugamije gukura Abanyarwanda ku ngoyi mbi y’imibereho mibi, ntiyakongera kuboha Abanyarwanda rero.”

Majoro Kubwayo wamaze igihe kinini muri FDLR, akomeza avuga ko uko bafatakaga Kagame n’Ingabo z’u Rwanda (RDF) nk’umwanzi wabahejeje ishyanga byari ibihuha bidafite ishingiro, cyane ko kuri we yumvaga aramutse abonye abo bose yabarasa ubundi agafata ubutegetsi.

Valerie Nyirahabineza, Perezida wa Komisiyo y’Igihugu yo Gusezerera no gusubiza mu buzima busanzwe abari abasirikare (RDRC)

Yagize ati: “Ubundi nta banga ririmo uwo bita umwanzi uramurwanya uburyo bwose bushoboka wabukoresha, natwe iyo tubona uko dutsinsura ingabo z’u Rwanda tuba twarabamaze pe kuko ni wo wari umugambi, kandi ntiwibwire ko Kagame n’ingabo z’u Rwanda batabizi.”

Afite agahinda ko kuba Umukuru w’Igihugu ari we wabasabye gutaha bakinangira none we na bagenzi be bakaba barimo gutahuka bashaje imbaraga zo kugira uruhare mu iterambere ry’Igihugu cyabo zimaze kubakamukamo.

Avuga ko amahirwe bagize ari uko basanze u Rwanda rufite gahunda zizamura buri muturage wese hatitawe ku kigero cy’imyaka afite none na we akaba afite inzozi z’iterambere n’imibereho myiza agomba gukabya.

Avuga ko mu byo atazibagirwa kugeza ashaje ari uburyo yakiriwe n’Ingabo z’u Rwanda akigera ku mupaka, igihe yari yiteguye gupfa bakamugaburira, bakamwambika, none bakaba baranamutuje heza kandi yari amaze imyaka irenga 20 arara mu myobo.

Yakomeje agira ati: “Ubu ndanywa icyayi mu gitondo na nimuroba mu gihe nirirwaga nirohamo ibiziba byo mu migezi ya Congo. Kagame akwiye ibihembo ntabona uko mbivuga”.

Majoro Kubwayo kuri ubu afite abana 2 n’umugore, akaba yicuza igihe yataye ahobagira mu mashyamba ya RDC mu gihe abo bangana yasanze bariteje imbere cyane kubera amahoro na Politiki nziza irangajwe imbere na Perezida Kagame.

Yavuze ko ibintu Perezida Kagame yakoze bikwiye kubera isomo n’ahandi hose hajya haba intambara ku Isi, abaharanira amahoro bakamenya no kubabarira abagerageza kuyahungabanya kuko abenshi muri bo baba barwanira n’ibyo badasobanukiwe neza.

Majoro Kubwayo ni umwe muri 84 basubijwe mu buzima busanzwe mu cyiciro cya 70, nyuma y’inyigisho bahawe mu gihe cy’amezi atanu. Barimo 53 bahoze ari abasirikare mu mitwe yitwaje intwaro, mu gihe abandi ari abasivili barimo abagore n’abana.

Abasubijwe mu buzima busanzwe Ku wa Kane tariki 23 Ugushyingo, bagaragaje ko biteguye gutanga umusanzu wabo mu kubaka Igihugu.

  • NGABOYABAHIZI PROTAIS
  • Ugushyingo 24, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE