USA: Hawaii yibasiwe n’umuriro uhitana 6 ibihumbi n’ibihumbi barimurwa

  • Imvaho Nshya
  • Kanama 10, 2023
  • Hashize amezi 10
Image

Inkongi y’umuriro yibasiye mashyamba yatewe n’umuyaga wa serwakira Dora yahitanye nibura abantu batandatu mu birwa byo muri Amerika bya Hawaii. Muri iki gihe ibirwa bibiri byibasiwe n’umuriro washenye umujyi, bituma abantu ibihumbi bimurwa ndetse bamwe bahatimo kwiroha mu nyanja kugira bahunga umuriro.


Richard Bissen, Umuyobozi w’ikirwa cya Maui, yagize ati: “Ni umunsi wijimye cyane”. Nk’uko yabitangarije itangazamaku, yemeza ko hapfuye abantu batandatu. Iyo mibare ni iy’agateganyo kuko ishobora kwiyongera kuko ibikorwa byo gushakisha no gutabara bikomeje.


Iyi nkongi yibasiye cyane ikirwa cya Maui, ndetse no ku gice cya Hawaii. Biyongereyeho umuyaga ukaze, yatejwe umurindi n’umuyaga ukase Dora ugera kuri kilometero 130 ku isaha, unyura mu nyanja ya Pasifika, mu bilometero magana mu majyepfo y’ikirwa.

Radiyo Mpuzamahanga y’Abafaransa ikomeza itangaza ko Umujyi w’ubukerarugendo wa Lahaina uri ku nkombe y’iburengerazuba ya Maui ari wo wibasiwe cyane kandi igice kinini washenywe n’umuriro.


Guverineri wa Hawaii, Josh Green, mu itangazo yashyize ahabona yagize ati: “Hafi ya Lahaina … yarasenyutse kandi imiryango amagana yaho yarimuwe.” Intara zo mu mujyi zagaragaje inyubako zirenga 271 zangiritse nk’uko Intara ya Maui ibitangaza.

Bamwe mu baturage bo mu mujyi bazabiranyijwe n’umuriro bagerageje kwiroha mu Nyanja kugira ngo barebe ko bacika umuriro bakabaho, abantu 14 bakuwe mu mazi ya Lahaina, nk’uko byatangajwe n’abayobozi.


Ubushobozi bw’ibitaro byo kuri icyo kirwa bwarengewe n’umubare munini w’abarwayi bafite ikibazo cy’ubushye nk’uko byatangajwe na Visi Guverineri Sylvia Luke, avuga ko ari ibintu biteye ubwoba. Abayobozi baragerageza kwimurira abarwayi mu bindi birwa.

Inzu 13 000 nta mauriro w’amashanyarazi zifite kandi abantu ibihumbi n’ibihumbi bategereje kwimurwa

Nk’uko Intara ya Maui ibivuga, abantu barenga 2 100 bacumbikiwe mu bigo by’ubutabazi bwihutirwa, naho abagenzi bagera ku 2000 bacumbikiwe ku kibuga cy’indege cya Kahului, mu gihe hagitegerejwe ko bimurwa.


Ingabo z’igihugu zashyizwe mu bikorwa kandi Perezida wa Leta zunze ubumwe z’Amerika Joe Biden yatangaje ko hakanguriwe uburyo bwose bushoboka ku birwa kugira ngo bahangane, barwanye iyo nkongi.

Umuyaga wagushije inkingi nyinshi z’amashanyarazi kandi imiyoboro y’itumanaho yacitsee ku gice cya Maui. Bigoye cyane ibikorwa by’ubutabazi, kuko na serivisi yo gutabaza 911 idakorera mu bice bimwe byizinga. Nk’uko urubuga rwa PowerOutage rubitangaza, ku mugoroba wo ku wa Gatatu, inzu n’ibigo bigera ku 13.000 ntibifite amashanyarazi muri icyo kirwa.

Visi Guverineri yavuze ko kuba inkongi y’umuriro wongerewe n’inkubi y’umuyaga Dora mu buryo bitigeze bibaho, kubera ko ibihe nk’ibi bikunze kuzana imvura n’umwuzure muri Hawaii.


Mu byumweru bishize, abantu babarirwa muri za miliyoni ku Isi bibasiwe n’ibiza bikomoka ku miterere y’ikirere, ibintu abahanga bavuga ko byongerewe umurindi n’imihindagurikire y’ibihe.

Yanditswe na NYIRANEZA JUDITH

  • Imvaho Nshya
  • Kanama 10, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE