Urugendo rw’u Rwanda mu kubaka ubudahangarwa bw’Inzego z’ibanze

  • Imvaho Nshya
  • Ugushyingo 15, 2023
  • Hashize amezi 6
Image

Imyaka 29 irashize u Rwanda ruri mu rugendo rwo kubaka imiyoborere ishyira umuturage ku isonga, aho kuri ubu impinduka zigaragarira mu cyerekezo cy’Igihugu gishingiye ku kubaka iterambere rishingiye ku bumwe bw’Abanyarwanda.

Minisitiri w’Intebe Dr. Ngirente Edouard yashimangiye ko u Rwanda rumaze gutera intambwe ishimishije mu kubaka ubudahangarwa bw’Inzego z’ibanze nubwo hakiri urugendo rurerure rugomba gukorwa.

Yabigarutseho ubwo yatangizaga ku mugaragaro Inama ihuza ubuyobozi bw’Inzego z’ibanze mu muryango w’Ibihugu bikoresha Icyongereza (Commonwealth) irimo kubera i Kigali kuva tariki ya 14 kugeza ku ya 17 Ugushyingo 2023.

Yagize ati: “Mu myaka 29 ishize, Guverinoma y’u Rwanda yaharaniye kubaka Igihugu gitekanye kandi cy’uburumbuke. Gahunda z’ibanze zose zishingiye ku miyoborere ishyira umuturage ku isonga, gutanga serivisi zinoze, no kwimakaza ihame ryo kutagira n’umwe uhezwa, gukorera mu mucyo no kubazwa inshingano.”

Yavuze kandi ko kwishakamo ibisubizo no kwegereza ubuyobozi abaturage byagize uruhare rukomeye mu kubaka Inzego z’ibanze zikomeye, zitanga umusanzu ku iterambere ry’Igihugu.

Yavuze kandi ko mu guharanira ko abayobozi bashyira mu bikorwa inshingano no gukorera mu mucyo, Guverinoma y’u Rwanda yashyizeho gahunda y’Imihigo. 

Ati: “Iyi gahunda yabaye igikoresho cyizewe cyo gusuzuma imikorere haba mu Nzego nkuru z’Igihugu ndetse n’iz’ibanze guhera mu mwaka wa 2006. Nk’uko mushobora kuba mubizi, binyuze muri iyi gahunda buri mwaka abakozi ba Leta basinyana imihigo n’abayobozi babo, ababakurikirana cyangwa abayoboye ibigo.”

Ibi bikorwa mu nzego zose z’ubuyobozi mu Turere, muri za Minisiteri na za Ambasade kandi ngo abananirwa kugera ku ntego bihaye barabibazwa.

Muri gahunda yo kugabanya ikiguzi cyo guhererekanya no kunoza imitangire ya serivisi, yavuze ko u Rwanda rukomeje gusarura mu gushyira serivisi za Leta ku ikoranabuhanga.

Yagize ati: “Uyu munsi, hejuru ya 90% bya serivisi za Leta zose zishobora kubonerwa kuri murandasi kandi dukomeje guharanira ko serivisi zose zaba zageze ku ikoranabuhanga bitarenze mu mwaka wa 2024.”

Minisitiri w’Intebe yavuze ko kubaka ubudahangarwa bw’Inzego z’ibanze ari ingenzi cyane mu guhangana n’ingorane n’ibyago bivuka.

Yavuze kandi ko ubushobozi bw’ibihugu bwo guhangana n’ibibazo bitandukanye bigakomeza kugira ubudahangarwa, buzashingira ku kongerera imbaraga imiyoborere no kubaka Inzego z’ibanze zikomeye.

Yagaragaje ko intambara zabogamiye ubudahangarwa bwa Guverinoma zitandukanye muri Commonwealth, atanga urugero rwa raporo  zigaragaza ko bimwe mu bihugu bihuriye muri Commonwealth byahuye n’igihombo cya tiriyali 1.15 z’amadolari y’Amerika ku musaruro mbumbe wabyo mu mwaka wa 2020 ugereranyije n’imibare ya mbere y’icyorezo cya COVID-19.

Nanone kandi mu mwaka wa 2019 ibiza bishingiye ku mihindagurikire y’ibihe byateje ibihombo by’ubukungu bya miliyari 70.2 z’amadolari y’Amerika mu bihugu 53, aho hejuru ya 60% by’ibyo bihombo byagaragaye mu rwego rw’ubuhinzi n’ubworozi.

Nanone kandi bivugwa ko ingaruka z’iminindagurikire y’ikirere zishobora kwinjiza abaturage miliyoni 100 mu bukene bukabije kugeza mu 2030.

Ikindi nanone, yasabye ibihugu bihuriye mu Muryango wa Commonwealth guharanira ko hejuru ya 60% by’abaturage bafite imyaka iri munsi ya 29 bazirikanwa muri gahunda zose z’iterambere.

Yaboneyeho gushimangira ukwiyemeza kwa Guverinoma y’u Rwanda mu kubahiriza icyerekezo n’intego bya Commonwealth.

Yahaye ikaze bitabiriye iyo nama ije ikurikira iy’Abakuru b’Ibihugu na Guverinoma bihuriye muri Commonwealth (CHOGM) yabereye i Kigai muri Kamena umwaka ushize.

Minisitiri w’Ubutegetsi bw’Igihugu Musabyimana Jean Claude, yavuze ko u Rwanda rwabonye inyungu nyinshi mu Ihuriro ry’Ubuyobozi bw’Inzego z’ibanze mu bihugu bigize Commonwealth, iyo nama iteraniye i Kigali ikaba ibihamya.

Binyuze mu buryo bw’amashusho, Umunyamabanga Mukuru wa Comonwealth Patricia Scotland yasabye ibihugu bihuriye muri uyu Muryango guharanira kugera ku Ntego z’Iterambere Rirambye (SDGs), kuko mu myaka iri imbere abatuye imijyi bazarushaho kwiyongera, bityo hakaba hakenewe kubaka imijyi yimakaza ikoranabuhanga (Smart Cities).

NTAWITONDA JEAN CLAUDE

  • Imvaho Nshya
  • Ugushyingo 15, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE