Urubyiruko rukomeje gusaba guhabwa igitaramo cyo gushimira Perezida Kagame

  • KAYITARE JEAN PAUL
  • Ukuboza 8, 2023
  • Hashize amezi 5
Image

Urubyiruko rutandukanye ruvuga rikumvikana ku mbuga nkoranyambaga (Social Media Influencers), abahanzi, abanyabugeni n’inshuti za Perezida wa Repubulika Paul Kagame, baramusaba ko yabaha umwanya bagataramana mu gitaramo babona nk’inzozi.

Ni igitaramo bahaye izina ‘GushimaPK’ aho bifuza gushimira Umukuru w’Igihugu umaze kugeza kuri byinshi u Rwanda by’umwihariko urubyiruko.

Mu bihe bitandukanye Perezida Kagame yavuze ko ari inshuti y’urubyiruko kandi aharanira ko rwakora rukiteza imbere rukava mu bitarufitiye akamaro nk’uko akunze kubigarukaho mu mbwirwaruhame.

Uwitwa Godfather250 ku rubuga rwe rwa X, yashyizeho ubutumwa bugaragaza amarangamutima y’abashyigikiye ko bataramana n’Umukuru w’Igihugu mbere y’amatora ateganyijwe umwaka utaha.

Yakomeje agira ati: “Uradukunda turagukunda, uri umubyeyi wacu, ntacyo twakuburana twakugeze imbere. Mu mwanya wanyu w’inshingano zitoroshye zo kubaka igihugu mufite, turabinginze mutugeneremo uyu mwanya twageneye, GushimaPK”.

Iyo baruwa yandikiwe Umukuru w’Igihugu igaragaza ko abavuga rikumvikana ku mbuga nkoranyambaga, umuryango mugari w’abahanzi n’abafana babo n’inshuti za Perezida Kagame ari bo bamusaba kubaha umwanya mu gitaramo bategura.

Igitaramo ‘GushimaPK’ bita ko ari inzozi kandi zishoboka, cyasabwe ku ikubitiro ku bufatanye bwa Godfather250 na Country Records.

Uyu azwi cyane kuri X no gukoresha ibiganiro ku rubuga rwa X kandi bigakurikirwa n’abatari bake.

Mu biganiro akora, ntatinya kubwiza ukuri kose abasebya Igihugu n’ubuyobozi bwacyo kandi akagaragaza ibyiza by’imiyoborere u Rwanda rugezeho kandi ko ntawifuza ko byasubira inyuma.

Uwiyita Muze Turwubake na we ni umwe mu basaba ko bakwishimira gutaramana na Perezida Kagame mu gitaramo cyiswe ‘GushimaPK’.

Yifashishije ijambo ry’Imana yagize ati: “Ibiganza bidashimira bihina ibiganza by’ugaba (Luka 17:11-19) Abanyarwanda turashima Paul Kagame kuko u Rwanda rukwiye ibyiza; tubivuga, tubikora, tujyanemo, dushime Paul Kagame, tukuri inyuma, ntiwadutengushye”.

Karangwa Nshimiyimana Emile na we agira ati: “Nyakubahwa Perezida Paul Kagame mutoza wacu mwebwe soko tuvamaho, mwakire neza ubutumire bw’ababakunda maze mu gihe gikwiriye muzatugenere iyo mpano y’umwanya tubashimire ibyo mwatugejejeho!”

Muri Gicurasi 2021, Perezida Paul Kagame yabwiye urubyiruko rwa Afurika guhora ruharanira kwigira aho gutegereza kuzagera ku byo rwifuza ari uko rubihawe n’abandi kuko bishobora kuzarubera umutwaro.

Perezida Kagame yavuze ko urubyiruko rugomba kubanza kumenya icyo rushaka kugeraho mu buzima.

Yagize ati: “Hari ikintu ugomba kwiha wowe ubwawe ari na cyo kikubaka kugera ku rwego ushaka cyangwa ruzatuma ugera ku ntsinzi mu buzima …”.

Mu rwego rwo gufasha urubyiruko, Leta y’u Rwanda yagiye iruha amahirwe yose akenewe kugira ngo rutere imbere.

Icyakora, icyo rusabwa ni ugutinyuka kwihangira imirimo rugakora kugira ngo rugere ku iterambere.

Leta y’u Rwanda isaba urubyiruko kwihangira imirimo irimo ubworozi, ubucuruzi, gukora ubukorikori ndetse no kumenya guhanga udushya, ibyo byose bikarwongerera amafaranga.

  • KAYITARE JEAN PAUL
  • Ukuboza 8, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE