Umuryango FPR Inkotanyi wungutse amaboko muri Coproriz Ntende

  • Imvaho Nshya
  • Mutarama 6, 2024
  • Hashize amezi 5
Image

Urubyiruko 511 rwo muri Koperative y’Abahinzi b’Umuceri mu gishanga cya Ntende (Coproriz Ntende) giherereye mu Murenge wa Rugarama mu Karere ka Gatsibo mu Ntara y’Iburasirazuba, rwateye intambwe idasubira inyuma mu Muryango FPR Inkotanyi.

Rwasobanuriwe ko FPR ari Umuryango atari ishyaka. Impamvu ari Umuryango bishingiye ku mahame remezo cyangwa ku ntego z’umuryango.

FPR ishyize imbere kubaka Umunyarwanda, ari nayo mpamvu imiyoborere y’igihugu ishingiye ku muturage.

Byagarutsweho ejo ku wa Gatanu tariki 05 Mutarama 2024 na Gasana Richard, Chairperson w’Umuryango FPR Inkotanyi mu Karere ka Gatsibo akaba n’Umuyobozi wako.

Igikorwa cyo kurahiza abanyamuryango bashya b’Umuryango FPR Inkotanyi cyabereye mu busitani bwa Hoteli Ntende, ku cyicaro cya Coproriz Ntende mu Murenge wa Rugarama.

Meya Gasana avuga ko iyo ari urubyiruko rwateye intambwe idasubira inyuma biba ari akarusho.

Ubuyobozi bwa FPR Inkotanyi muri Gatsibo busobanura ko Umuryango FPR Inkotanyi ubaho kubera amaboko y’abanyamuryango, bivuze ko ubonye amaboko.

Urubyiruko rwarahiye rwavuze ko rwishimiye gutera intambwe idasubira inyuma kandi ngo rwishimiye kuvukira mu gihugu giha agaciro buri munyarwanda.

Gasana, Chairperson w’Umuryango FPR Inkotanyi mu Karere ka Gatsibo, yagize ati “Tubonye amaboko y’urubyiruko, y’abantu bakiri batoya.

Kubigisha imigabo n’imigambi bya FPR Inkotanyi bakanatera intambwe idasubira inyuma bakarahira, tuba dushyize Umuryango wacu ku rundi rwego rwo kugira abantu benshi kandi batoya”.

Urubyiruko ubwarwo na rwo ruguye ahashashe.

Urubyiruko rusanze Umuryango ukomeye kandi urimo ibyiza byinshi cyane cyane bishingiye ku iterambere ry’Umunyarwanda.

Gasana Richard, Chairperson w’Umuryango FPR Inkotanyi mu Karere ka Gatsibo mu Ntara y’Iburasirazuba

Gasana akomeza avuga ati “Iyo uje muri moteri y’igihugu itarigeze ikorwamo (No Revisé) ikiri nshyashya nk’iyi ngiyi, ni amahirwe kuri bo. Baje aheza, muri uyu muryango tubonye amaboko”.

Turayishimye Emmy utuye mu Murenge wa Rugarama mu Kagari ka Matunguru avuga ko kuba yarahiye mu Muryango FPR Inkotanyi ari ibintu yishimiye bitewe n’aho Chairman w’Umuryango akaba na Perezida wa Repubulika, Paul Kagame, amaze kugeza igihugu.

Agira ati: “Bitewe n’aho igihugu cyavuye n’aho akigejeje nasanze ari ibintu byiza mfata umwanzuro wo kurahira. Nk’urubyiruko twifuza gukomezanya na we guteza imbere igihugu cyacu”.

Ahamya ko bagize amahirwe yo kuvukira mu gihugu gitekanye kandi kirimo gutera imbere ariko by’umwihariko kigaha urubyiruko inzira ikwiye.

Ati: “Igihugu turimo uko twagisanze cyavuye mu icuraburindi, reba aho kigeze, urabona iyi hoteli turimo mbere ntayari ihari, hari amashanyarazi, turidagadura igihugu kimeze neza natwe tukaba tuzafatanya n’ubuyobozi bwacyo kugira ngo dukumire uwashaka kugisubiza aho cyavuye”.

Uwayisenga Déborah utuye mu Murenge wa Rwimbogo mu Kagari ka Kiburara na we yishimiye kurahira mu muryango FPR Inkotanyi.

Yabwiye Imvaho Nshya ko intego ye ari ugufatanya n’abandi banyamuryango asanze muri FPR Inkotanyi ariko ngo ikiruta byose ni uko yasobanuriwe ko abanyamuryango bose bangana, ntawe uruta undi.

Kuri we ngo ni byiza gukurira mu biganza bibaha kugira indangagaciro.

Ati: “Cyane cyane ku rubyiruko ni byiza ko umuntu akurira mu ndangagaciro ndetse n’igihugu giha buri wese agaciro.

Ibyo mbona bituruka muri ya mahame remezo y’umuryango Chairperson yadusobanuriye mbere yuko turahira”.

Kuba muri FPR Inkotanyi ngo bizamufasha kuba muri sosiyete kandi abane neza n’abandi kuko ngo Umuryango ushyira ubumwe imbere.

Munyaburanga Emmanuel, Perezida wa Koperative Coproriz Ntende, avuga ko kurahiza urubyiruko mu muryango bivuze ibintu byinshi birimo kuba ari rwo Rwanda rw’ejo.

Ati “Kujya mu Muryango FPR Inkotanyi ni igikorwa cyiza, ni intambwe idasubira inyuma kubera yuko ahenshi iyo uri umunyamuryango ntutatira igihango.

FPR Inkotanyi ni Umuryango mwiza, urarera cyane cyane ku bana bakiri bato.

Iyo ukuze rero uri mu muryango ukorana ishyaka, wumva ufite imbaraga zo gukorera igihugu, wumva ufite uburere mboneragihugu bijyanye n’igihe turimo.

Mu by’ukuri ni byiza cyane ku rubyiruko rwa Koperative”.

Akomeza avuga ko nk’abahinzi b’umuceri igituma bashyira imbaraga ku rubyiruko cyane, ngo nI uko ari rwo ruzasimbura abageze mu za bukuru.

Ubuyobozi bwa FPR Inkotanyi muri Gatsibo, bwibukije urubyiruko ko kuvukira mu gihugu kimakaza urubyiruko ari amahirwe menshi.

Rwabwiwe ko muri ayo mahirwe harimo n’ibishuko rwakwirinda.

Bimwe mu bishuko birutegereje rusabwa kwirinda harimo ibibangamiye igihugu nk’ibiyobyabwenge, ihohoterwa rikorerwa abana b’abakobwa n’ibindi.

Urubyiruko 511 rwo muri Koperative Coproriz Ntende, rwarahiriye kuba abanyamuryango ba FPR Inkotanyi
Munyaburanga Emmanuel, Perezida wa Koperative Coproriz Ntende
Bamwe mu bagize Komite Nyobozi ya Coproriz Ntende bitabiriye iki gikorwa

Amafoto: Butare James

  • Imvaho Nshya
  • Mutarama 6, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE