Umurusiyakazi wamamaye mu kurya ibikomoka ku bimera yishwe “n’inzara n’umunaniro”

  • NTAWITONDA JEAN CLAUDE
  • Kanama 3, 2023
  • Hashize amezi 9
Image

Yabaye ikimenyabose ku mbuga nkoranyambaga nka ‘Zhanna D’art’ kubwo gukwirakwiza amafoto n’amashusho agaragaza uburyo yahinduye imirire akareka inyama n’ibindi bikomoka ku matungo byose akageza n’aho kureka ibyo kurya bihiye.

Uyu ni Umurusiyakazi Zhanna Samsonova waguye muri Malaysia afite imyaka 39 y’amavuko. Ku wa Gatatu ni bwo amakuru yatangiye gukwirakwira mu bitangazamakuru bitandukanye ko yapfuye ku wa 21 Nyakanga 2023, nyuma y’aho inshuti n’umuryango we bemeje ko yishwe n’imirire mibi ndetse n’umunaniro.

Bivugwa ko Samsonova yatangiye kugaragara cyane ku mbuga nkoranyambaga ashishikariza abantu kureka kurya inyama bakayoboka indyo itanga ubuzima (healthy diet), by’umwihariko ibyo kurya bikomoka ku bimera.

Uko iminsi yashiraga indi igataha ni na ko Samsonova yakomeje gufata ingamba zikomeye zirebana n’imirire ye, cyane ko abantu batandukanye bamukurikiranaga ku mbuga nkoranyambaga bagendaga bamushimira uburyo abahereza inama nziza mu birebana n’imirire.

Yari amaze imyaka igera ku 10 akora ingendo mu bice byo mu Majyepfo y’Iburasirazuba bw’Aziya, muri iyo myaka akaba ari na bwo yatangiye kwimenyereza kurya ibikomoka ku bimera ariko noneho ahindukirira ku kurya ibyo kurya bibisi gusa.

Ibitangazamakuru byo mu Burusiya bitangaza ko mbere yabanje kujya afata za poroteyine akazirenza no ku bikomoka ku bimera, ariko nyuma aza kugenda ayoboka ibyo kurya bidatetse nyuma agera n’aho kugabanya amazi akajya yirira imbuto n’impeke gusa.

Inshuti n’abo mu muryango we bashenguwe n’urupfu rwe, ariko cyane cyane banababazwa n’uburyo apfuye akiri muto ari we wizize, kuko babona yazize inzara ishingiye ku kurya indyo ituzuye byiyongereyeho umunaniro watewe n’ibyo yivurugutagamo azenguruka ibice bitandukanye atanga n’inama.

Bivugwa ko yari amaze imyaka ine gusa arya ibyo kurya bidatetse bigizwe cyane cyane n’imbuto, impeke z’ibihwagari, n’imitobe ikozwe mu mbuto, aho yabaga mu Gihugu cya Malaysia.

Nyina wa Samsonova yabwiye itangazamakuru ko umukobwa we yapfuye afite uburwayi bwo guhitwa bumeze nka kolera (Cholera). Inshuti ze za hafi zatangaje ko Samsonova yagaragaraga cyane nk’ufite umunaniro, ibirenge bye byarabyimbye.

Uwari umuturanyi we muri Malaysia na we yagize icyo avuga k ubuzima bwe agira ati: “Bamwohereje iwabo kugira ngo avurwe. Ariko yarongeye arabacika aragaruka. Ubwo namubonaga i Phuket nagize ubwoba. Nabaga mu igorofa yo hejuru y’inzu ye, ariko buri munsi nahoraga ntewe inkeke no kubona umubiri we wabonaga ko udafite ubuzima. Naramwinginze ngo ajye kwa muganga ariko ntibyakunze.”

Kugeza ubu impamvu yemejwe n’abaganga yateye urupfu rw’uyu mukobwa wari akiri muto ntiratangazwa.

  • NTAWITONDA JEAN CLAUDE
  • Kanama 3, 2023
  • Hashize amezi 9
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE