Umujyi wa Kigali uraburira abanduza imihanda

Umujyi wa Kigali uzwi ku rwego Mpuzamahanga kuba icyitegererezo mu gusa neza by’umwihariko, urasaba abakoresha imihanda gukomeza kuyigirira isuku.

Umujyi wa Kigali ukaba uburira buri wese kwitwararika ku isuku y’umuhanda aho kugerwaho n’ibihamo biteganywa n’amategeko.

Mu butumwa wanyujije kuri x, uributsa abantu bose ko bibujijwe kwanduza umuhanda, bikaba bireba umuntu ku giti cye, abafite ibikorwa by’ubwubatsi aho imodoka ziva cyangwa zinjira ku ishansiye (chantier), ibirombe n’ahandi.

Imodoka zitwaye ibitaka cyangwa ibindi bishobora kwanduza umuhanda, zigomba kuba zitwikiriye neza kandi zikirinda ko bimeneka mu muhanda.

Imodoka zigomba gusukurwa amapine igihe zigiye kwinjira muri kaburimbo.

Umujyi wa Kigali ukomeza utangaza ko abafashwe banduza umuhanda bahanwa hakurikijwe Itegeko N°48/2018 ryo ku wa 13/08/2018 Rigenga Ibidukikije.