Umugaba w’Ingabo z’Algeria yakiranywe urugwiro mu Rwanda

Umugaba Mukuru w’Ingabo z’Algeria (ANPA) Gen Saïd Chanegriha yakiranywe urugwiro mu Rwanda ubwo yageraga i Kigali ku wa Mbere tariki ya 19 Gashyantare 2024.

Gen Chanegriha yatangiye uruzinduko rw’akazi mu Rwanda, rugamije kurushaho gushimangira ubufatanye bw’ibihugu byombi mu bijyanye n’igisirikare.

Kuri uyu wa Kabiri, biteganyijwe ko we n’itsinda ryaje rimuherekeje baza gusura Urwibutso rwa Jenoside rwa Kigali ku Gisozi n’Ingoro y’Amateka y’Urugamba rwo Guhagarika Jenoside iri ku cyicaro cy’Inteko Ishinga Amategeko.

Nanone kandi biteganyijwe ko asura Ibirindiro Bikuru by’Ingabo z’u Rwanda, aho aza kugirana ibiganiro birambuye n’Abayobozi Bakuru mu Ngabo z’u Rwanda.

Muri Nzeri 2022, uwari Umugaba Mukuru w’Ingabo z’u Rwanda (RDF) Gen Jean Bosco Kazura yagiriye uruzinduko rw’iminsi itatu muri Algeria.

 Icyo gihe we n’itsinda yari ayoboye bagize umwanya uhagije wo kuganira na mugenzi we Gen. Saïd Chanegriha, ibiganiro byibanze ku guteza imbere imikoranire n’ubutwererane hagati y’igisirikare cya Algeria (ANPA) n’icy’u Rwanda (RDF).