Umubano w’u  Rwanda na Congo ni  urugero rw’ibishoboka muri Afurika

  • Imvaho Nshya
  • Nyakanga 22, 2023
  • Hashize amezi 10
Image

Perezida wa Repubulika y’u Rwanda Paul Kagame na Perezida wa Repubulika ya Congo-Brazzaville, Denis Sassou Nguesso, kuri uyu wa Gatandatu tariki 22 Nyakanga 2023 mu kiganiro n’abanyamakuru batangaje ko umubano w’ibihugu byombi ari urugero rw’ibifatika ku mugabane w’Afurika.

Perezida Kagame na mugenzi we Sassou Nguesso, bashimangiye ko bashishikajwe n’icyatuma Abanyafurika barushaho kwiyumva nk’abavandimwe.

Kuri Perezida Sassou Nguessongo ngo umusanzu u Rwanda rutanga mu kugarura amahoro mu bihugu bitandukanye by’Afurika haba muri Mozambique, Santarafurika, Sudani y’Epfo n’ahandi, ni umusaruro w’impinduka zikomeye zabaye muri iki gihugu.

Yagize ati: “Nabivuze, Perezida Kagame yagize uruhare rukomeye mu mateka y’igihugu cye no mu mateka y’Isi muri rusange kuko nyuma y’akaga gakomeye Igihugu cyahuye na ko mu 1994, yabashije kuzahura Igihugu agishyira ku ntera yo hejuru.

Haba mu kongera kubanisha abaturage, kwiyubaka, yagishyize ku rugero ruhanitse ugereranyije n’abandi baturage b’Afurika ndetse no hirya no hino ku Isi, bituma iki gihugu kigira ijabo n’ijambo bitangarirwa mu ruhando mpuzamahanga”.

Ku rundi ruhande Perezida Kagame avuga ko imibanire y’u Rwanda na Repubulika ya Congo ari urugero rw’ibishoboka ku mugabane w’Afurika.

Ati: “Izi nzinduko zijyanye n’ibyo abantu bakeneye, ku baturage ba Congo ku baturage b’u Rwanda birangajwe imbere ku mpande zombi bari ahangaha kugira ngo dukorere hamwe.

Izi nzinduko zituma tugabanya intera iri hagati y’u Rwanda na Repubulika ya Congo tukayigira nto, ndetse ibyo bivuze ko ari urugero rw’uburyo dushaka ko ibihugu by’Afurika birushaho kwegerana maze tukaba abantu bamwe nk’umugabane”.

Yagaragaje kandi ko atari uruzinduko gusa, aba bayobozi bombi barashaka kubakira hamwe umusingi n’ibikorwa bihamye, bifatika kandi bitanga umusaruro.

Ati “Iyo abantu bashoye mu bihugu byombi bakorera hamwe, tukabona iterambere rigenda rigerwaho binarenga imbibi z’ibihugu byacu, iki ni cyo izi ngendo ziba zigendereye”.

Ku banenga ubutwererane bw’u Rwanda na Repubulika ya Congo ndetse n’amasezerano y’ubutwererane asinywa, Abakuru b’Ibihugu byombi bavuga ko ibyo ntawe bikwiriye kurangaza.

Perezida Sassou Ngweso ashimangira icyizere afite ku musaruro uzayavamo.

Ati: “Ndanyuzwe kuko twahisemo imishinga ifatika, twasinye amasezerano yumvikana kandi asobanutse. Urugendo rurerure rutangirira ku ntambwe ya mbere, twahisemo imishinga ni ngombwa ko ishyirwa mu bikorwa”.

Agaragaza ko afite icyizere kandi ko bazakuramo umusaruro mwiza muri rusange. Ahamya ko nta gushidikanya na kumwe afite muri ibyo.

Yanditswe na KAYITARE JEAN PAUL

  • Imvaho Nshya
  • Nyakanga 22, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE