Uko Abanyarwanda bakina hanze bitwaye mu mpera z’icyumweru

  • SHEMA IVAN
  • Mata 22, 2024
  • Hashize ibyumweru 4
Image

Mu mpera z’iki cyumweru gishize mu bihugu bitandukanye, imikino ya shampiyona yarakinwe nyuma y’ibyumweru bibiri idakinwa kubera imikino Mpuzamahanga y’ibihugu.

Uko ni nako bimeze ku bakinnyi b’Abanyarwanda bagiye gukina hanze y’u Rwanda bafashije amakipe yabo nubwo hari abo shampiyona zabo zitahiriye muri iyi minsi.

Ku wa Gatandatu tariki 20 Mata 2024 mu gihugu cya Ukraine shampiyona yakomezaga ku munsi wa 22 FC Kryvbas Kryvyi Rih ukinamo kapiteni Djihad Bizimana yatsinze Chornomorets Odesa ibitego 2-1 muri uyu mukino yakinnye iminota yose y’umukino.

Mu gihugu cya Morocco AS FAR Rabat ukinamo Myugariro Imanishimwe Emmanuel ‘Mangwende’ yatsinze MAS de Fès ibitego 3-1. Biyifasha gukomeza kuyobora urutonde rwa Shampiyona irusha iya kabiri Raja Casablanca amanota ane.

Muri uyu mukino Imanishimwe yari ku ntebe y’abasimbura iminota 90.

Mukunzi Yannick yongeye gusubira inyuma y’igihe kubera ikibazo cy’imvune

Muri izi mpera muri Kenya hakinwaga imikino ya Shampiyona aho AFC Leopards ikinamo Gitego Arthur yari yahuye na Gor Mahia. Ni umukino utaragenze neza kuko iyi kipe yatsinzwe igitego 1-0.

Uyu Rutahizamu w’Amavubi yabanje ku ntebe y’abasimbura gusa ku munota wa 55 ahabwa umwanya wo kwinjira mu kibuga nubwo byarangiye nta ntsinzi ibonetse.

Kuri ruhande ntibyagenze neza kuri bagenzi be b’Abanyarwanda bakinira Gor Mahia barimo Bayisenge Emery na Sibomana Patrick kuko batabonye umwanya mu kibuga usibye Sibomana wagaragaye mu bakinnyi bakinnyi 18 Gor Mahia yakoresheje muri uyu mukino.

Ku wa Gatandatu, mu Bubiligi hakinwe imikino ya Shampiyona, St. Liège ikinamo Hakim Sahabo yongera kunganya indi nshuro ibitego 3-3 ubwo yahuraga na KVC Westerlo.

Uyu munyarwanda ukina hagati mu kibuga yahawe amahirwe n’umutoza we, Ivan Leko abanza mu kibuga gusa asimbuzwa ku munota wa 64.

Ni mu gihe umunyezamu Maxime Wenssens ukinira Royale Union SG atigeze agaragara mu bakinnyi bifashishijwe mu mukino ikipe ye yatsinzwemo na Club Brugge KV ibitego 2-1.

Muri Macedonia KF Shkupi ikinamo myugariro Rwatubyaye Abdul yanganyije na FK Sileks 0-0 mu mukino Rwatubyaye yakinnye iminota yose ndetse ikomeza kuba ku mwanya wa kabiri muri Shampiyona yo muri iki gihugu.

Mu gihugu cya Norvge Myugariro Mutsinzi Ange yakinnye iminota 90 mu mukino ikipe ye FC Jerve yo mu cyiciro cya kabiri yatsinzemo Hødd IL ibitego 2-1,

Bizimana yongeye kubanza mu kibuga yitwara neza

Byiringiro Lague ntabwo yagaragaye mu bakinnyi 18 ikipe ye ya Sandvikens IF yifashishije mu mukino wa Shampiyona y’Icyiciro cya kabiri muri Suède yanatsinzemo Östers IF igitego 1-0. Mugenzi we Mukunzi Yannick yakinnye uyu mukino kuko yinjiye mu kibuga ku munota wa 86.

Al Ahli Tripoli muri Libya ikinamo Manzi Thierry yakinnye muri izi mpera z’icyumweru itakaza umukino yahuriyemo na Al Madina muri Shampiyona ku gitego 1-0. Ntabwo uyu myugariro yigeze agaragara ku rutonde rw’abakinnyi bifashishijwe.

Rutahizamu Nshuti Innocent ukina muri Leta Zunze Ubumwe z’Amerika muri One Knoxville nta mukino yari afite muri izi mpera z’icyumweru.

Impera z’icyumweru zisize amarira ku munyezamu Ntwali Fiacre ukinira TS Galaxy yo muri Afurika y’Epfo yatsinzwe na Stellenbosch ibitego 2-1 mu mukino ya Fiacre yakinnye iminota yose y’umukino.

Kugeza ku munsi wa 24 wa Shampiyona TS Galaxy iri ku mwanya wa gatandatu n’amanota 34 mu mikino 22 imaze gukina.

Hakim Sahabo yari mu kibuga ubwo St. Liège yanganyaga na KVC Westerlo ibitego 3-3
  • SHEMA IVAN
  • Mata 22, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE