UEFA Champions League: PSG na Borussia Dortmund zageze muri 1/2 

  • SHEMA IVAN
  • Mata 17, 2024
  • Hashize ukwezi 1
Image

FC Barcelone yanyagiwe na Paris Saint-Germain (PSG) ibitego 4-1, mu gihe Atlético de Madrid yatsinzwe na Borussia Dortmund ibitego 4-2, amakipe yombi asezererwa muri 1/4 cya UEFA Champions League.

Ku mugoroba wo ku wa Kabiri tariki 16 Mata 2024 nibwo hakinwe imikino yo kwishyura ya 1/4 cya UEFA Champions League.

FC Barcelone yatangiye ifite amahirwe yo gukomeza kuko mu mukino ubanza yari yitwaye neza igatsindira Paris Saint-Germain iwayo ibitego 3-2, gusa kari akazi katoroshye kuko yari ifite abakinnyi bakomeye bafite imvune zitari kubemerera gukina uyu mukino wo kwishyura.

Abo bakinnyi ni Sergi Roberto na Andreas Christensen bafite amakarita menshi ndetse na Gavi na Alejandro Balde bavunitse.

Ikipe yo mu Bufaransa yihariye umupira cyane ndetse ikawugumana kurusha Barcelone yacungiraga ku mipira miremire kandi yihuta inyura ku ruhande rwa Yamine Lamal na Raphinha.

Aba bombi bakinanye ku munota wa 12 babona igitego cya mbere cyasubije FC Barcelone mu mukino kuko yari imaze kuyobora umukino mu bitego.

Ubusatirizi bwa Kylian Mbappé, Ousmane Dembélé na Bradley Barcola bwahise bushyiramo imbaraga kugira ngo bwishyure ndetse igice cya mbere kirangira bwabikoze.

Ibi byatumye ku munota wa 29 Ronald Araújo abona ikarita y’umutuku yaturutse ku ikosa yakoreye Barcola washoboraga gutsinda igitego icyo gihe.

Impera z’igice cya mbere zabaye nziza kuri PSG yabonye igitego ku munota wa 40 cyinjijwe na Ousmane Dembélé ahawe umupira na Barcola witwaye neza muri uyu mukino.

Igice cya kabiri cyihariwe na PSG, kuko Barcelone yakinaga nta mutoza Xavi Hernandez wahawe ikarita itukura ku munota wa 56. 

Iyi ni ikarita kandi yatanzwe nyuma y’igitego cya kabiri cya Paris Saint Germain cyinjijwe na Vitinha ku munota wa 54.

Icyo gihe, amakipe yombi yari amaze kunganya igiteranyo cy’ibitego mu mikino ibiri ariko ntibyamaze akanya kuko Kylian Mbappé yafashije ikipe ye kuyobora umukino ku gitego yinjije kuri penaliti yabonetse ku munota wa 61.

Ku munota wa 89, uyu rutahizamu yashimangiye intsinzi ya PSG atsinda igitego cya kane, ari na cyo cya nyuma cyawubonetsemo ikomeza ku giteranyo cy’ibitego 6-4.

Undi mukino ku kibuga signal iduna Park Borussia Bortmund yari Yakiriye Atlético de Madrid.

Umukino ubanza Dortmund yari yatsinzwe 2-1 ariko muri uyu yabyishyuye hakiri kare cyane kuko mu gice cya mbere, Julian Brandt na Ian Maatsen bayifashije kugisoza ifite 2-0.

Nyuma y’iminota ine igice cya kabiri gitangiye, Mats Hammels yitsinze igitego cyafashije Atlético de Madrid gusubira mu mukino ndetse ibona n’ikindi kuwa 64 cyatsinzwe na Ángel Correa.

Ibi byakanguye Dortmund yakiniraga iwayo, yongeramo ibindi bibiri byatsinzwe na Niclas Füllkrug na Marcel Sabitzer ku munota wa 71 n’uwa 74.

Umukino warangiye Borussia Dortmund itsinze Atlético de Madrid ibitego 4-2 iyisezerera ku giteranyo cy’ibitego 5-4 mu mikino ibiri yabahuje.

Muri 1/2 Paris Saint-Germain izahura na Borussia Dortmund, umukino ubanza uteganyijwe tariki 30 Mata 2024. 

Kuri uyu wa Gatatu harakinwa indi mikino ya 1/4 yo kwishyura: 

Manchester City irakira Real Madrid saa tatu z’ijoro, umukino ubanza amakipe yombi yanganyije ibitego 3-3. 

Undi mukino Bayern Munich irakira Arsenal saa Tatu Z’ijoro. 

Mu Bwongereza, Arsenal yari yanganyije na Bayern Munich ibitego 2-2.

  • SHEMA IVAN
  • Mata 17, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE