Ubushinjacyaha bwagaragaje ko hari intambwe yatewe mu mategeko

  • KAYITARE JEAN PAUL
  • Gashyantare 8, 2024
  • Hashize ibyumweru 4
Image

Umugenzuzi Mukuru w’Ubushinjacya Ntete Jules Marius yavuze ko abantu bagombye gushyirwa mu igororero ari uko bakoze ibyaha bikomeye mu rwego rwo kwirinda ubucucike mu magororero y’u Rwanda.

Ubucucike mu magororero, ni ingingo yibanzweho mu mahugurwa y’iminsi ibiri yatangiye kuri uyu wa Kane tariki 08 Gashyantare 2024 mu Mujyi wa Kigali.

Ni amahugurwa yahurije hamwe abagenzacyaha n’abashinjacyaha. Yateguwe n’Umuryango Ikiraro Nyarwanda giharanira Ubutabera, Rwanda Bridges to Justice (RBJ).

Mu kiganiro cyatanzwe na Ntete, Umugenzuzi Mukuru w’Ubushinjacya, yagaragaje ko mbere ya 2004 u Rwanda rwari rufite ikibazo mu mategeko.

Ati “Mu 2004 ntabwo twigeze tugira ingamba zo gushaka igihano kitari igifungo, ahubwo twashyiraga imbaraga mu gufunga”.

Nyuma hatekerejwe ku burenganzira bwa muntu mu ngingo ya 38 yo mu itegeko ryasohotse ku wa 23/02/1963.

Umushinjacyaha mu gihe ataratanga urupapuro rwo guta umuntu muri yombi, yamufungaga mbere.

Bitandukanye no kubahiriza uburenganzira bwa muntu. Ni mu gihe ngo amategeko ariho ubu atandukanye n’aya mbere.

Ati “Icyo twavuga nuko muri 2004 byahindutse, byashyizwe mu mategeko ahana yacu mbere yuko habaho impinduka mu mategeko yacu.

Njyewe nk’umushinjacyaha gufata umuntu nkamufunga mbere yo kujya muri gereza ntibibaho”.

Mbere y’umwaka wa 2004 uburenganzira bwo gufunga bwaturukaga kuri Minisitiri w’Ubutabera n’umushinjacyaha mukuru.

Kuba umuntu yafungwa nta rupapuro yahawe, ibyo byari bihabanye n’uburenganzura bwa muntu.

Ntete akomeza agira ati “Minisitiri yashoboraga gufata telefoni agahamagara, agategeka ko hafatwa umuntu agafungwa nta n’impapuro zanditse”.

Ubushinjacyaha buvuga ko Iteka rya Perezida ryashyizweho, rigaragaza ko umuntu atafungwa ahubwo hashyirwaho imirimo nsimburagifungo, hakiyongeraho n’ubwumvikane.

Hariho imbogamizi mu mategeko ahana n’andi mategeko aho ingingo zagaragazaga ko igihano runaka gihawe umuntu agomba guhita ajya muri gereza.

Ati “Ntabwo byari byemewe ko twumvikanisha abantu ariko iyi ngingo yarahinduwe umwaka ushize.

Ubu biremewe ko habaho ubwumvikane ku cyaha kitarengeje igihano cy’imyaka 5 ku bantu bakuru n’ikitarengeje imyaka 7 ku bana.

Iri tegeko ryahinduwe umwaka ushize wa 2023.

Ku bihano bisubitse, ibijyanye n’ubwumvikane, aha niho uwakoze icyaha ndetse n’ubushinjacyaha bumvikana uburyo umuntu yakwemera icyaha akaba yagabanyirizwa igihano kugira ngo atajya muri gereza.

Kurekura umuntu atanze ingwate ubu byatangiye gushyirwa mu bikorwa vuba aha, kugeza kuri uyu munota ngo abo mu nzego z’ubutabera bagomba guhindura imyumvire.

Mu itegeko No 027/2019 rigaragaza ibijyanye no kumvikana n’ubushinjacyaha.

Ntete, Umugenzuzi Mukuru w’Ubushinjacyaha, agira ati “Biragaragara ko mu Rwanda tugerageza gutanga ibihano bitari igifungo mu rwego rwo kurwanya ubucucike mu magororero.

Hari uguhindura abanyabyaha bagashyirwa mu muryango Nyarwanda bakaba bazima kuko ngo hari ubwo umuntu ashyirwa muri gereza nta mpamvu.

Ruzindaza Eric, Umukozi w’Umuryango Ikiraro Nyarwanda giharanira Ubutabera ushinzwe ikurikiranabikorwa, asaba ko Leta yazana impinduka zituma ubucucike mu magororero bugenda bugabanuka.

Asaba abutarege batumva ko kubona ubutabera ari ukuba wafunze umuntu.

Mu kiganiro yahaye Imvaho Nshya yagize ati “Hari abantu benshi usanga bumva ko kugira ngo abe yumva ko yahawe ubutabera ari uko uwamukoshereje yaba afunze cyangwa se ko bagomba kugana inkiko”.

Agaragaza ko hari abantu bavuga ngo bashobora gutanga isambu kugira ngo baburane inkoko.

Ashimangira ko iyo myumvire, ari cyo kintu cya mbere na mbere gikwiye kubanza guhinduka, abantu bakumva ko bagomba kwifashisha ubwumvikane.

Agira ati “Ubundi wumvikanye n’umuntu wagukoshereje nta kintu byaba bitwaye.

Kujya gufungwa ntibisobanura ko ari buhinduke, ejo atazongera kugukosereza.

Ni imyumvire ikwiye kubanza guhinduka mbere y’ibindi byose, ari abaturage ari n’abandi bantu bari mu nzego zifata ibyemezo, bakumva ko icya mbere na mbere ntabwo ari ugufunga kuko ntabwo ari ihame ko uwafunzwe wese ahinduka”.

Yagaragaje ko hari igitutu cy’abavuga ko ubutabera kuba batafunze umuntu, hatanzwe ruswa. Ahamya ko icyo ari ikibazo cy’imyumvire kikigaragara mu nzego zose.

Ntete Jules Marius, Umugenzuzi Mukuru w’Ubushinjacyaha
  • KAYITARE JEAN PAUL
  • Gashyantare 8, 2024
  • Hashize ibyumweru 4
TANGA IGITEKEREZO
Thacien says:
Gashyantare 8, 2024 at 10:27 pm

Ni byiza rwose hashyirwemo imbaraga habeho ntitwimakaze umuco wo kudahana ariko Kandi hashakwe ibihano bibyara inyungu rusange aho gufunga abantu bamara igihe mumagororero badakora.

Andika igitekerezo

AMATEGEKO AGENGA IYANDIKA RY'IGITEKEREZO CYAWE