Uburenganzira bwa muntu bwubahirijwe mu bagizweho ingaruka n’ibiza-NCHR

  • NYIRANEZA JUDITH
  • Ugushyingo 17, 2023
  • Hashize amezi 4
Image

Komisiyo y’Igihugu y’Uburenganzira bwa Muntu (NCHR) yatangarije abagize Inteko Ishinga Amategeko imitwe yombi, ko uburenganzira bw’abavanywe mu byabo n’ibiza mu Turere twa Rubavu, Karongi, Nyabihu, Musanze, na Gakenke bwubahirijwe kuko Leta yabatabaye, ibabonera iby’ibanze, irabavuza, inafasha imiryango gushyingura abayo babuze ubuzima.

Byatangajwe ubwo Abasenateri n’Abadepite bagezwagaho na Komisiyo y’Uburenganzira bwa muntu raporo y’ibikorwa bya NCHR y’umwaka wa 2022/2023, bagaragaza ko hari ibyakozwe biba ibisubizo mu nzego zitandukanye hubahirizwa uburenganzira bwa muntu.

Uturere dutanu twagizweho ingaruka n’ibiza byatewe n’imvura yahitanye abantu 131 mu ijoro ry’itariki ya 2 rishyira iya 3 Gicurasi 2023, inzu zirenga 5500 zarasenyutse, imihanda 14 ikangirika, imiyoboro y’amazi, iy’amashanyarazi, amashuri arenga 50 yangiritse n’ibyumba by’amashuri bimwe byasenyutse, n’abarenga 20,0000 baravuye mu byabo.

Komisiyo y’Igihugu y’Uburenganzira bwa Muntu yagaragaje ko hari ibisubizo byashatswe mu kubahiriza uburenganzira bwa muntu.

Komisiyo yagiye kureba abagizweho ingaruka n’ibiza isura isura site 10 bacumbikiwemo zari zarashyizweho harimo abantu 7 953 ireba uburenganzira bwo kubaho, uburenganzira ku mibereho myiza, ku buzima, ku burezi no kudatandukanywa n’imiryango.

Mu nshingano zo kugenzura Leta yatabaye abaturage ifasha abagizweho ingaruka kubona amacumbi, ivuza abakomeretse inafasha imiryango yabuze ababo gushyingura abahitanywe n’ibiza.

Leta kandi yatanze ibiribwa, amazi, ibiryamirwa, ifasha kubona ibikoresho by’ibanze, ivuza abakomeretse. Abana bari basanzwe biga bakomereje kwiga ku bigo biri hafi yaho site zabo zari ziri kandi abagize umuryango bakuwe mu byabo n’ibiza bagerageje kubashyira hamwe bakabana muri site imwe.

Ku ngingo irebana n’abageze mu zabukuru, Komisiyo yasuye ibigo 14, inasura inzu z’Impinganzima isanga nta bucucike burimo harimo nka 75% ugereranyije n’ubushobozi bwabo zakwakira.

Hari abishyurirwa ikiguzi cyo kwivuza barihirwa na Minisiteri y’Ubumwe bw’Abanyarwanda n’Inshingano Mbonerahihugu (MINUBUMWE) hakaba n’abishyurirwa n’Uturere.

Komisiyo yakoze ubushakashatsi ku ngingo zijyanye n’uburenganzira bwa muntu bw’abageze mu zabukuru, hagaragazwa ko bitabwaho na Leta binyuze muri VUP banagira uruhare mu bibakorerwa, bwakorewe mu Turere 15, habajijwe abantu 760 bageze mu zabukuru 464, habazwa 76 bahagarariye inzego zitandukanye n’abandi baturage 220.

Komisiyo yasanze kandi uburenganzira bw’impunzi bwubahirizwa burimo kuva no kujya aho bashaka, guhabwa ibyangombwa biziranga kandi abana bandikwa mu bitabo by’irangamimerere. Babona ifunguro rikwiye n’amazi meza yo kunywa, icumbi riboneye, baravuzwa kandi n’abana bariga.

Komisiyo yasanze mu Nkambi ya Kiziba hari impunzi ziba mu mazu ashaje cyane ku buryo zikeneye gushakirwa andi macumbi.

Mu gukumira iyicarubozo n’ibindi bihano cyangwa ibikorwa by’ubugome, ibidakwiye umuntu cyangwa ibimutesha agaciro, Komisiyo yakoze igenzura mu Magororero 14, muri Kasho z’ubugenzacyaha 100, mu Bigo binyurwamo by’igihe gito 28, mu Bigo ngororamuco 3, mu Bitaro 2, mu bigo 2 bivura abafite uburwayi bwo mu mutwe, mu bigo 10 byita ku bageze mu zabukuru no mu ngo 4 z’Impinganzima igamije kumenya uko uburenganzira bwa muntu bwubahirizwa.

NCHR nanone kandi yasanze uburenganzira ku mibereho myiza y’abantu bafungiye mu magororero no muri kasho z’ubugenzacyaha bwubahirizwa, kuko bahabwa ifunguro rikwiye, bakavuzwa, baba ahantu hari isuku, umwuka n’urumuri bihagije ndetse imfungwa ntizikorerwa iyicarubozo cyangwa ibindi bikorwa bibabaza umubiri no mu mutwe.

Serivisi zitangwa zirimo kunganirwa mu gihe cy’ibazwa, mu bushinjacyaha no mu nkiko, guhabwa inama mu by’amategeko, ubufasha bwo kwinjira muri sisiteme ya IECMS, guhagararirwa imbere y’urukiko, kwishyura ibizamini bya ADN n’ibindi.

NYIRANEZA JUDITH

  • NYIRANEZA JUDITH
  • Ugushyingo 17, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE