Ubumwe bw’Abanyarwanda, umusingi u Rwanda rwubakiyeho-  Minisitiri Dr Bizimana

  • KAYITARE JEAN PAUL
  • Mutarama 24, 2024
  • Hashize amezi 4
Image

Ku munsi wa Kabiri w’Inama y’Igihugu y’Umushyikirano, Abanyarwanda batandukanye n’inshuti z’u Rwanda bakurikiye ibiganiro birimo gutangirwa muri Kigali Convention Center.

Ni ibiganiro byitabiriwe na Perezida wa Repubulika Paul Kagame na Madamu Jeannette Kagame, n’abandi bayobozi bakuru b’Igihugu n’abahagarariye ibihugu byabo mu Rwanda.

Ku ikubitiro, mu gitondo cyo kuri uyu wa Gatatu tariki 24 Mutarama 2024, Dr Bizimana Jean Damascène, Minisitiri w’Ubumwe bw’Abanyarwanda n’Inshingano Mboneragihugu yatanze ikiganiro kigaragaza aho u Rwanda rugeze mu kwimakaza ubumwe n’ubudaheranwa n’inshingano z’urubyiruko mu kubaka u Rwanda twifuza.

Minisitiri Dr. Bizimana yagaragaje ko mu mateka y’u Rwanda, ubumwe bw’Abanyarwanda bwari umusingi u Rwanda rwubakiyeho; haba mu mibereho, mu mibanire no mu miyoborere.

Abakoroni bashenye ubumwe bw’Abanyarwanda, Leta zayoboye mbere y’ubwigenge zaranzwe no gutonesha abatuye aho abategetsi bakomokaga.

Muri Repubulika Iharanira Demokarasi ya Congo (RDC), mu mwaka wa 1800, Dr Bizimana avuga ko hatangijwe ishyirahamwe rigamije kubiba amacakubiri muri Rutchuru na Masisi muri Kivu y’Amajyaruguru.

Ingengabitekerezo mu burezi bw’u Rwanda bwarakoreshejwe mu irondabwoko, aho 5% byaharirwaga abo ubutegetsi bushaka.

Mu 1975 u Rwanda rwasinye amasezerano mu bukungu rwifata ku ngingo yo kugira ubwisanzure ku burezi.

Ibi ngo byatumye mu 1990-1994 hari abishyira hamwe bashyiraho “Hutu Power” bica Abatutsi basaga miliyoni mu mezi 3 gusa.

Abanyarwanda basaga miliyoni ebyiri bahungiye mu bihugu bituranye n’u Rwanda.

Habayeho inkomere nyinshi, imfubyi, abapfakazi, abantu baraburanye, imari ya Leta isahurwa n’abahungiye muri Congo.

Ubutegetsi bwarasaranganyijwe, ati: “Kubera gushaka ibisubizo n’amahitamo yo gusangira ubutegetsi byahise bishyirwaho ako kanya.”

Mu baminisitiri 17, abaminisitiri 9 bari abo muri PL, PSD no mu yandi mashyaka.

Gusangira ubutegetsi byanagaragaye mu Nteko Ishinga Amategeko ndetse no muri Biro y’Inteko y’Ibanze ku ihame ry’isaranganya.

Gusangira ubuyobozi byageze no mu nzego zegereye abaturage.

Minisitiri Dr Bizimana akomeza avuga ko Guverinoma yanihutiye gukemura ikibazo cy’impunzi zahunze mu1994 n’izindi zahunze mu 1959 zari zimaze igihe kinini mu buhunzi mu mateka ya Afurika.

Yavuze ko ikibabaje ari uko nyuma y’imyaka 30 ishize ibihugu n’imiryango mpuzamahanga bimye amatwi ikibazo cy’ubuhunzi ndetse n’ibyibanze byo kugira igihugu.

Guhera mu 1994 ingabo n’Interahamwe bagabye ibitero mu Rwanda mu bice byo Ntara y’Amajyaruguru n’iburengerazuba amahanga arebera, Leta y’u Rwanda ifata umwanzuro wo kurwanya abacengezi.

Tariki 11 Nyakanga 1997 hari hamaze gucyurwa impunzi 1,600,000 zivuye muri Congo hakiyongeraho n’izavuye mu bice bya Tingitingi n’ahandi.

Kuva mu 2001, hari hamaze gucyurwa impunzi zari mu mashyamba ya Congo. Kuva icyo gihe mu kigo cya Mutobo hamaze kwakirwa 39,585.

Hashyizweho uburyo bwo gukemura ikibazo cy’imanza nyinshi z’abagize uruhare muri Jenoside yakorewe Abatutsi.

Ati: “Hifashishijwe Inkiko Gacaca mu guca imanza 1,958,634, zikoresha miliyoni 52 z’amadolari y’Amerika.”

Imanza z’Urukiko Mpuzamahanga Mpanabyaha rwashyiriweho u Rwanda (ICTR) rwaciye imanza 70 mu myaka ishize.

Akomeza agira ati: “Gacaca ni kimwe mu bimenyetso ntashidikanywaho mu kwishakamo ibisubizo.”

Igipimo cy’ubumwe n’ubwiyunge kigaragaza ko 99% by’Abanyarwanda, bemeza ko bakomeye ku bunyarwanda no kubwimakaza.

Kuvanaho indangamuntu, gusaranganya imitungo, gushyira ingabo zatsinzwe mu zindi, kwegereza ubuyobozi abaturage, ubudehe, itorero, Girinka n’ibindi byagize uruhare mu kwimakaza ubumwe n’ubwiyunge.

Ibi byemezo by’Abanyarwanda bashyize hamwe byatumye icyizere cyo kubaho kigera kuri 60%.

Mu 2014 Umuryango Mpuzamahanga wemeje ko inyito yemewe ari Jenoside yakorewe Abatutsi mu Rwanda.

11 Mata 2017 AU wafashe icyemezo cyo kubahiriza gufata abakoze Jenoside mu bihugu bacumbitsemo.

Minisitiri Dr. Bizimana yasabye urubyiruko kutarebera abashaka gusenya Igihugu kandi rugashyira umwete mu kucyubaka no kutemera uwasenya ibyagezweho no guharanira intambwe u Rwanda rugezeho.

  • KAYITARE JEAN PAUL
  • Mutarama 24, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE