Ubuhamya bw’abantu bibwe n’agatsiko k’abajura muri Kigali

  • KAYITARE JEAN PAUL
  • Mata 3, 2024
  • Hashize ibyumweru 2
Image

Urwego rw’Ubugenzacyaha, RIB, rwerekanye agatsiko k’abasore Batandatu barimo n’abakanishi bakekwaho ubujura, batawe muri yombi. Bamwe mu bagizweho ingaruka n’ubujura, basobanura uko bimwe ndetse n’ingaruka byabagizeho.

Bakurikiranyweho ubujura bw’ibintu bitandukanye bibaga mu mahahiro manini (supermarkets), stations za essence no gushikuza abantu amatelefoni yabo bakoresheje imodoka.

Umuvugizi wa RIB, Dr Thierry B. Murangira, yavuze ko aba basore bakodeshaga imodoka bakayikuraho pulaki bakayambika iyo bakuye ku kinyabiziga cyapfuye cyangwa cyashaje.

Ibi ngo babikoraga bagamije ko uwabakodesheje imodoka atabavumbura bityo amande akajya kuri pulaki bibye ku kindi kinyabiziga.

Abakekwaho ibyaha bibaga mu Mirenge ya Kagarama, Masaka, Kanombe mu Karere ka Kicukiro, mu Karere ka Gasabo bivugira ko bibaga Kinyinya, Remera, Kimironko mu Mujyi wa Kigali ndetse bakajya i Bugesera n’i Rwamagana mu Ntara y’Iburasirazuba.

Kathia Kamali wamenyekanye cyane mu itsinda rya Mäckenzie, avuga ko yari mu muhanda wa Nyarutarama imodoka imunyuraho irangisha Igitego Hotel ababwira ko atayizi.

Ati: “Uko ndimo kuvuga niko ndimo kugenda […] barangije bati waduhaye nimuro yawe, ndababwira nti ntabwo njya ntanga nimero ku bantu ntazi.

Barangije bahita bavuga ngo basi bayi (Bye!) niba utaduha nimero zawe, bahita bankururira ku modoka, uwari wicaye ku ruhande ankurura akaboko ashaka kukavuna uko niko narwaniraga telefoni yanjye mvuza n’induru, uwari utwaye ahita ansunika mu muhanda”.

Avuga ko bamutwaye telefoni y’agaciro k’asaga 1,300,000 Frw yo mu bwoko bwa iPhone 15.

Asaba abantu kutavugisha abo batazi cyane ko abamwibye batasaga nk’abajura.

Tuyishimire Jean de Dieu utuye mu Murenge wa Niboye mu Karere ka Kicukiro avuga ko yibwe Pulake y’ikinyabiziga cye.

Mu buhabya bwe avuga ko bayisanze aho iparitse Saa yine z’ijoro bagakuraho pulake.

Yihutiye kugeza ikirego ku Rwego rw’Ubugenzacyaha (RIB). Avuga ko yajya yandikirwa (Contrevention) ndetse agahamagarwa ko yibye kuri sitasiyo ya Lisansi no kuri za Supermarket.

Ati: “Ijoro ryose aho bagiye kwiba hose bakamampagara.”

Atanga ubutumwa ku bantu bibwa gutyo, mu gihe imodoka yabo yaba yarakoze impanuka bagakuraho pulake bakayibika cyangwa bakayijyana muri RRA.

Uwimana Yvette avuga ko ari umwe mu bakora kuri Sitasiyo ya Lisansi yitwa ‘Karani’ ikorera mu Murenge wa Masaka mu Karere ka Kicukiro.

Ashimira RIB yataye muri yombi abasore Batandatu kuko ngo uburyo bagiyemo ntabwo yari azi ko bazabakurikirana bababone bitewe n’uko yababonanye pulake nyinshi muri butu y’imodoka barimo.

Saa 6h40 z’umugoroba haje imodoka arayiyobora ayibaza ingano ya lisansi inywa abwirwa ko inywa 45,000 Frw.

“Narababwiye ngo bafungure tank (aho bashyiriramo lisansi) bafungura nabi baba bafunguye butu, nkirebamo mba mbonyemo pulaki nyinshi numva umutima urandiye.”

Avuga ko yahamagaye Mugenzi akamusaba kwishyuza abari mu modoka na we akabaha lisansi buhoro buhoro akeka ko ari abasanzwe babiba.

Akomeza agira ati: “Mugenzi wanjye yarabishyuje baramubeshya ngo yishyuye kuri phone ya MOMO, mu gihe mbabwiye ko ntayo nabonye baravuga ngo nindebe neza kuko bayohereje.

Mu gihe amaboko yanjye yari ari inyuma ariko ari mu modoka imbere, mu gihe mbabwira ngo bazane telefoni ndebe nimero mwishyuyeho, barirutse nashidutse nikubise hasi imyenda y’akazi yose incikiraho.”

Niyigena Patrick, Mwizerwa Fabrice, Mugabo Frank bafite ikigero cyo hejuru cy’urumogi mu maraso yabo nkuko byemezwa na RIB.

Urwego rw’Ubugenzacyaha ruvuga ko ibyaha byose bakurikiranyweho bigendanye n’ikoreshwa ry’urumogi.

Icyakoze isaba uwaba yari bwe n’aba bose ko yakwihutira kugeza ikirego kuri Sitasiyo ya RIB imwegereye kugira ngo abone ubutabera.

Ibyaha bakurikiranyweho urukiko nirubibahamya, bazahanishwa ibihano bitandukanye; gushyiraho mutwe w’abagizi ba nabi cyangwa kuwujyamo ni icyaha gihanishwa hagati y’imyaka 7 na 10.

Ubujura bukoresheje kiboko cyangwa ibikangisho bihanishwa hagati y’imyaka 5 na 7, ubwinjiracyaha mu cyaha cy’ubwicanyi gihanishwa igifungo cy’imyaka 25, kwihesha ikintu cy’undi hakoreshejwe uburiganya ni igihano cy’igifungo hagati y’imyaka 2 na 3.

Kwangiza cyangwa konona ikintu cy’undi ni igihano cy’igifungo hagati y’amezi 2 na 6. Icyaha cy’ubuhemu hagati y’imyaka 3 na 5.

Aba bakekwaho ibi byaha bafungiwe kuri station za RIB za Remera, Kimihurura na Kicukiro mu gihe dosiye yabo irimo gutunganywa kugira ngo ishyikirizwe Ubushinjacyaha.

Kathia Kamali wamenyekanye cyane mu itsinda rya Mäckenzie
Bimwe mu bikoresho bakoreshaga biba pulake ku binyabiziga byashaje
Bamwe mu bagizweho ingaruka n’abakekwaho ubujura baje kureba ababacucuye utwabo
Dr Thierry B. Murangira, Umuvugizi wa RIB

Amafoto: Uwamaliya Cécile & RIB

  • KAYITARE JEAN PAUL
  • Mata 3, 2024
  • Hashize ibyumweru 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE