Ubuhamya bwa Karangwa wahinduriwe impyiko mu Rwanda

  • KAMALIZA AGNES
  • Werurwe 16, 2024
  • Hashize ibyumweru 4
Image

Umugabo witwa Karangwa Martin wo mu Karere ka Kamonyi mu Murenge wa Runda avuga ko hari bamwe batekereza ko kuba yarahinduriwe imyiko mu Rwanda  nta buzima bwiza afite ariko bihabanye n’ukuri.

Yemeza ko ubuzima bwe bumeze neza kandi akora akazi nk’ibisanzwe kuko ubuvuzi yaherewe mu Rwanda bwizewe.

Karangwa w’imyaka 58 yahawe impyiko n’umwana we w’umukobwa witwa Karangwa Noella w’imyaka 25 yemeza ko ubuzima bwe n’umwana we bumeze neza nyuma yo kwitabwaho n’abaganga.

Avuga ko umuryango we ari wo watekereje ko umwe mu bana be bamuha impyiko abanza kubyanga yumva ko hari ikibazo byateza umwana we, ariko nyuma yo kuganira n’umwe mu baganga yaramusobanuriye agera aho arabyemera.

Yemeza ko abaturanyi bakimara kumenya ko umwe mu bana be azamuha impyiko batangiye kumucira urubanza bavuga ko agiye kwangiza ubuzima bw’umwana bityo ko yabireka agategereza gupfa cyangwa gukira ariko atangije umwana we.

Karangwa avuga ko yafashwe n’uburwayi bw’impyiko mu 2022 atangira gushyirwa ku mashini iyungurura amaraso (Diyalise), nyuma abwirwa amakuru ko yahabwa impyiko ndetse bakazimuhindurira mu Rwanda ariko akumva ari inzozi. Ati: “Umuganga yarambwiye ngo mu Rwanda hashobora kuzaza porogaramu yo gushyiramo abantu impyiko ariko nkumva ari inzozi bikorerwa mu Buhinde gusa. Yaje kuntuma uwo kumpa impyiko ni ko kuzana umukobwa wanjye.”

Akomeza avuga ko babakoreye isuzuma bombi babashyira kuri diyalize nyuma baza kubaha amabaruwa abemerera guhindurirwa impyiko.

Yongeyeho ko babasinzirije bakababaga nyuma baza gukanguka basanga byarangiye batazi nuko byagenze.

Ati: “Narakangutse n’undi arakanguka dusanga nta kibazo na kimwe dufite yewe nta n’agakovu ubu wambonana ntiwamenya ko nabazwe.”

Yongeyeho ko bamaze icyumweru mu bitaro, nyuma yo gusezererwa bahabwa amezi icyenda yo gufata imiti banakurikiza inama za muganga, none kugeza kuri ubu ubuzima bwabo buhagaze neza.

Karangwa avuga ko kuva yahindurirwa impyiko ku wa 25.05 2023 yumva ubuzima bwe bwarabaye bwiza kandi abantu bakwiye kumva ko gutanga cyangwa guhabwa impyiko ntacyo bitwaye.

Uyu mugabo ni we wahinduriwe impyiko bwa kabiri mu Rwanda.

Kuva iyi gahunda yo guhindurirwa impyiko yatangirira mu bitaro byitiriwe Umwami Fayisali muri Gicurasi 2023, imibare igaragaza ko mu barwayi 100 bategereje guhindurirwa imyiko mu Rwanda, 24 ari bo bamaze gukorerwa mu gihe abandi bagitegereje.

KAMALIZA Agnes

  • KAMALIZA AGNES
  • Werurwe 16, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE