U Rwanda rwiteze toni 800,000 z’umusaruro w’ibigori

  • NSHIMIYIMANA FAUSTIN
  • Mutarama 11, 2024
  • Hashize amezi 5
Image

Minisiteri y’Ubuhinzi n’Ubworozi (MINAGRI) yatangaje ko umusaruro w’ibigori witezwe mu gihembwe cy’ihinga 2024 A ubarirwa hagati ya toni ibihumbi 650 na 800.

Minisitiri w’Ubuhinzi n’Ubworozi Dr. Musafiri Ildephonse yaboneyeho kwibutsa abayobozi n’abahagarariye abahinzi kwegera abahinzi hagamijwe gutegura neza isarura, kwirinda abamamyi, kubakangurira guhunika no gufata neza umusaruro.

Yabigarutseho  mu nama yabereye ku biro by’Intara y’Iburasirazuba kuri uyu wa Kane, yagarutse ku myiteguro y’isarura ry’igihembwe cya 2024A n’uburyo bwo gufata neza umusaruro mwinshi witezwe muri iyi Ntara.

Biteganyijwe ko Intara y’Iburasirazuba iziharira igice kinini cy’umusaruro w’ibigori wose uzaboneka ku rwego rw’Igihugu aho itegerejweho kuzageza kuri toni zisaga 526,000.

Dr Musafiri yavuze ko ingamba zafashwe mu buhinzi zirimo kubagezaho imbuto n’amafumbire ku gihe no kongera ubuso buhingwa mu nzuri bukava kuri 30%  bugera kuri 70% ziri mu byatumye  umusaruro w’ibigori wiyongera mu Ntara y’Iburasirazuba.

Yagize ati: “Twashyizeho ingamba zitandukanye zo kugira ngo Abanyarwanda bahinge ubuso bubasha guhingwa bwose ndetse twashyize imbaraga mu bukangurambaga  ubutaka bwo guhinga ahari inzuri n’ahandi, kugira ngo ababasha guhinga babikore cyangwa abatabibashije bahahe abahaturiye bahashyire ibihingwa bijyanye na sizeni.”

Yakomeje agira ati: “Twavuguruye iby’inzuri mu Ntara y’Iburasirazuba kugira ngo ubuso buhingwa bwongerwe, habe ubuhinzi bwunganira ubworozi  bitewe n’uko mbere amatungo yazengurukaga mu nzuri  bigatuma agira uburwayi agatanga n’umukamo mukeya.

Ivugurura ryakozwe ni ryo ryatumye  ubutaka buhingwa mu nzuri bugera kuri 70% kandi bituma aborozi babona n’ubwatsi bw’amatungo buhagije cyane cyane mu gihe cy’isarura.

Minisitiri w’Ubuhinzi n’Ubworozi Dr. Musafiri Ildefonse

Uwo musaruro ni wo wa mbere weze ku buso bwari mu nzuri bwahinduwemo ubuhingwa. Minisitiri Dr. Musafiti ati: “Aborozi n’abahinzi barabitangiye bituma umusaruro w’ibigori wiyongera kuko ni byo bahereyeho muri sezoni ya 2024.”

Bamwe mu bahinzi bo mu Ntara y’Iburasirazuba bavuga ko umusaruro w’ibigori iyo ucyera ibiciro biba biri hasi kandi baba baraguze imbuto n’amafumbire bibahenze, bakifuza ko MINAGRI yashyiraho igiciro kimwe hose mu gihugu.

Kubwimana Zacharie yagize ati: “Abahinzi tugera igihe cy’ihinga imbuto n’amafumbire bihenze ariko ku mwero igiciro kikagwa hasi cyane. Twifuza ko hashyirwaho igiciro gihuriweho twese ntiduhendwe kuko umuhinzi aba yatakaje byinshi.”

Kuri iki kibazo Minisitiri Dr. Musafiri yavuze ko bitarenze muri uku kwezi kwa Mutarama 2024 hazaba hashyizweho igiciro kimwe ku bufatanye n’izindi nzego, kugira ngo abagura n’abagurisha babe bazi igiciro ntarengwa.

Yagize ati: “Iyo tumaze kubona uko umusaruro wagenze ni bwo twicara n’inzego zibishinzwe zirimo Minisiteri y’Ubucuruzi n’Inganda n’abandi baba mu bucuruzi bw’ibigori tugashyiraho igiciro kubera ko gusarura biba mu kwezi kwa Kabiri n’ukwa Gatatu. Ukwezi kwa Mutarama 2024 kuzarangira igiciro cyashyizweho kuko n’ubundi kijyaho mbere kugira ngo abagura n’abagurisha babe bafite icyo bagenderaho.”

Minisiteri y’Ubuhinzi n’Ubworozi itangaza ko impamvu hashyirwaho igiciro mbere ari ukugira ngo abaturage badahendwa no gukumira ko abaranguye umusaruro mbere bahenda abandi bagura nyuma.

MINAGRI ivuga kandi ko izakomeza gahunda yo kwagura ubutaka bwuhirwa cyane cyane mu Ntara y’Iburasirazuba ikunze kwibasirwa n’amapfa, kugira ngo umusaruro ukomoka ku buhinzi ukomeze kwiyongera.

  • NSHIMIYIMANA FAUSTIN
  • Mutarama 11, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE