U Rwanda rwita cyane ku burenganzira bw’impunzi- James Cleverly

  • NTAWITONDA JEAN CLAUDE
  • Ukuboza 5, 2023
  • Hashize amezi 6
Image

Minisitiri w’Umutekano w’Ubwami bw’u Bwongereza James Cleverly, yashimangiye ko u Rwanda rwita cyane ku burenganzira bw’impunzi, abimukira n’abasaba ubuhungiro, bityo atewe ishema no gushyira umukono ku masezerano akomeza gahunda yo kohereza i Kigali by’agateganyo abageze mu Bwongereza banyuze mu nzira zinyuranyije n’amategeko.

Minisitiri James Cleverly yageze mu Rwanda mu gitondo cyo kuri uyu wa Kabiri, aho yaje gusinya amasezerano mashya ashyigikira ayo ibihugu byombi bifitanye mu birebana n’ubufatanye mu kwita ku bimukira no guharanira iterambere.

Ubwo bufatanye ni imwe mu ngamba zihamye zigamije gukemura ikibazo cy’abimukira binjira mu Bwongereza banyuze mu mazi y’ahitwa Channel, abinjizwa mu makamyo kimwe n’ubucuruzi butemewe bushamikiraho.

Ni gahunda ihanzwe amaso mu ruhando mpuzamahanga kubera ko intsinzi yayo izatuma ibihugu byatangiye kuyireberaho na byo biyishyira mu ngiro nta nkomyi.

Amasezerano mashya arashyirwaho umukono na Minisitiri Cleverly ari kumwe na Minisitiri w’Ububanyi n’Amahanga n’Ubutwererane mu Rwanda Dr. Biruta Vincent.

Minisitiri Cleverly yagize ati: “U Rwanda rwita cyane ku burenganzira bw’impunzi, bityo niteguye guhura na bagenzi banjye tugasinya aya masezerano kandi tukarushaho kuganira ku buryo dushobora gufatanya mu gukemura burundu ibibazo mpuzamahanga by’ubwimukira butubahirije amategeko.”

Nk’uko byari biteganyijwe muri gahunda yemejwe mu mwaka ushize, u Bwongereza bwiteguye kohereza by’agateganyo ibihumbi by’abimukira n’abasaba ubuhungiro kugira ngo ubusabe bwo kubemerera ubuhungiro bubanze gusuzumwa ariko bari mu buzima bubahesha agaciro.

Mu kwezi gushize, Urukiko rw’Ikirenga rw’u Bwongereza rwanzuye ko ubufatanye bw’u Rwanda n’icyo gihugu butubahirije amategeko kuko ngo bushobora kurenga ku biteganywa n’amategeko mpuzamahanga bityo abimukira bakamburwa uburenganzira bwabo.

Urwo rukiko rwagaragaje impungenge rufite kuri ubwo bufatanye, ari na yo mpamvu amasezerano mashya agamije kuzikuraho nk’uko bishimangirwa n’Umuvugizi wa Guverinoma y’u Rwanda Yolande Makolo.

Yagize ati: “Icyo nshobora kuvuga ku masezerano mashya turimo gukoranaho magingo aya, ni uko azongera gushimangira ibikubiye mu yo twagiranye mbere.”

Kuva urukiko rwafata umwanzuro, Guverinoma y’u Bwongereza ntihwema kugaragaza ko nta kizakoma mu nkokora ubwo bufatanye kuko ari yo mahirwe rukumbi atanga icyizere, ari na yo mpamvu hasinywa amasezerano agamije gushimangira ko u Rwanda rutemerewe kwirukana abazoherezwa n’u Bwongereza nk’imwe mu mpungenge zagaragajwe n’urukiko.

Umunyamabanga Uhoraho muri MINAFFET Madamu Clementine Mukeka, ni we wakiriye Minisitiri Cleverly akigera mu Rwanda

Kugeza ubu u Rwanda rwahawe icyiciro cya mbere cy’inkunga ya miliyoni 140 z’amapawundi, ni ukuvuga miliyari zisaga 221 z’amafaranga y’u Rwanda, zifashishwa mu gutegurira abimukira ibyangombwa nkenerwa byose bizatuma bisanga mu Muryango Nyarwanda mu gihe bategereje igisubizo cy’ubusabe bwabo.

Muri ayo masezerano kandi hakubiyemo ko abazishimira gutura mu Rwanda nta kizababuza kandi bazaba bafite amahirwe ku mirimo, ku buvuzi no ku burezi angana n’ay’abandi Banyarwanda bose.

Mu mpera z’icyumweru gishize, Minisitiri w’Intebe w’u Bwongereza Rishi Sunak, yatangaje ko biteguye kugenera u Rwanda miliyari zisaga 23 z’amafaranga y’u Rwanda y’inyongera kugira ngo ayo masezerano yashyizweho umukono bwa mbere muri Mata 2022 akomeze.

Ni mu gihe Guverinoma y’u Bwongereza iri ku gitutu cyo kuba icumbikiye ibihumbi amagana by’abimukira, aho mu mwaka ushize bwabaruraga abimukira basaga 745,000 biganjemo abanyuze mu nzira zemewe.

Ku bataranyuze mu nzira zimewe harimo abasaga 29,000 binjiye mu gihugu muri uyu mwaka, bakaba bariyongereye ku bandi basaga 45,755 bafashwe mu mwaka wa 2022 bambukiye mu mazi ya Channel no mu makamyo.

Guhagarika ubwato buto bubazana mu gihugu, ni imwe mu ntego z’ibanze Sunak ashyize imbere kugira ngo akemure ikibazo cy’abimukira bishyura akayabo ababambutsa mu mazi, rimwe na rimwe bakarohama kubera ko ubwo bwato buba bwapakiye benshi cyane.

  • NTAWITONDA JEAN CLAUDE
  • Ukuboza 5, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE