U Rwanda rwishimiye kwakira Umuryango APTF wimakaza ikoranabuhanga mu gukora imiti

  • NTAWITONDA JEAN CLAUDE
  • Ukuboza 18, 2023
  • Hashize amezi 5
Image

Kuri uyu wa Mbere tariki ya 18 Ukuboza, Guverinoma y’u Rwanda yashyize umukono ku masezerano ayemerera kwakira icyicaro Gikuru cy’Umuryango Nyafurika ugamije kwimakaza ikoranabuhanga mu gukora imiti n’inkingo (Africa Pharmaceutical Technology Foundation/APTF).

ATPF ni Umuryango watangirijwe i Kigali mu Rwanda ku wa 14 Ukuboza mu mwaka wa 2022, ubwo habaga Inama Mpuzamahanga yiga ku Buzima Rusange muri Afurika yabaye hagati y’itariki ya 12 n’iya 15 Ukuboza muri uwo mwaka.

Uwo Muryango watangijwe ku bufatanye bwa Guverinoma y’u Rwanda, Ishami ry’Umuryango w’Abibumbye ryita ku Buzima (WHO), Banki Nyafurika Itsura Amajyambere (AfDB), Minisiteri y’Ubutwererane mu by’Ubukungu n’Iterambere mu Budage, Soth Centre n’abandi bafatanyabikorwa.

Kuri uyu wa Mbere, amasezerano yashyizweho umukono na Minisitiri w’Ububanyi n’Amahanga n’Ubutwererane Dr. Biruta Vincent mu izina rya Guverinoma y’u Rwanda, n’Umuyobozi wa ATPF Prof. Padmashree Gehl Sampath mu izina ry’uwo Muryango.

Minisitiri Dr, Biruta, yavuze ko uwo Muryango washyiriweho gutanga umusanzu wawo mu kuziba icyuho kikigaragara mu ruhererekane rwo gukorera imiti n’ibindi bikoresho by’ubuvuzi ku mugabane w’Afurika.

Yagize ati: “Mu kuziba icyuho, dukwiye kurushaho gushora imari mu nganda zitunganya imiti muri Afurika nko mu bindi bihugu bikiri mu nzira y’amajyambere. Uyu Muryango mushyashya wimakaza ikoranabuhanga mu gukora imiti uzafasha Afurika kugera ku ikoranabuhanga rigezweho.”

Yakomeje avuga ko u Rwanda rwiyemeje gutanga umusanzu warwo mu kurushaho guteza imbere ikoranabuhanga rigezweho mu gukora imiti haba mu Rwanda ndetse no ku mugabane w’Afurika muri rusange. Mu kwezi kwa Kamena 2022, ni bwo Inama y’Ubutegetsi ya AfDB yemeje ishingwa ry’icyo Kigo hagamijwe kongera ubushobozi bw’umugabane bwo kugera ku ikoranabuhanga rigezweho mu rwego rwo gukora imiti, inkingo n’ibindi bikoresho by’ubuvuzi.

Uwo Muryango witezweho gukuraho imbogamizi zose zatumaga urwego rwo gukorera imiti ku mugabane w’Afurika rutagera ku ikoranabuhanga rigezweho kandi rijyanye n’igihe.

Perezida wa AfDB Dr. Akinwumi Adesina, yavuze ko ishyirwaho ry’uwo Muryango Nyafurika byari mu byo biyemeje  ko Afurika igomba gukora ibishoboka byose mu kubaka ubudahangarwa bw’urwego rw’ubuzima, harimo no kubaka inganda zikora imiti zishikamye ndetse n’ibikorwa remezo by’ubuzima bifite ireme.

Yagize ati: “Ikoranabuhanga ni igikoresho cy’ingenzi kizafasha mu iterambere ry’urwego rw’imiti rukomeye Afurika izakenera ibihe byose mu kubungabunga imibereho myiza y’abayituye bose.

Yakomeje agira ati: “AfDB yiyemeje gushora hafi miliyari 3 z’amadolari y’Amerika mu myaka icumi iri imbere mu iterambere ry’imiti ikorerwa muri Afurika nka zimwe mu mbaraga dushyira mu kongera inganda muri Afurika no kugabanya guhora twiringiye ibyo dutumiza mu mahanga.”

Umuryango ATPF witezweho kwibanda ku guhanga udushya no kwimakaza ubufatanye, kubungabunga umutungo mu by’ubwenge, ndetse no kubaka ubushobozi bugamije kwimakaza gukorera imiti, inking n’ibindi bikoresho by’ubuvuzi bifite ireme ku mugabane w’Afurika.

Prof Sampath, yavuze ko itangizwa ry’Umuryango ATPF ari intambwe ikomeye mu rugendo rwo kurushaho kunoza urwego rw’ubuzima ku mugabane w’Afurika, no kugabanya umutwaro w’indwara n’ibyorezo byibasiye uyu Mugabane wikorera imiti yawo yujuje ubuziranenge.

Yagize ati: “Ni ingirakamaro cyane ko twongera ubushobozi bw’Afurika mu by’inganda zikora imiti n’ibindi bikoresho by’ubuvuzi binyuze mu gushyigikira iterambere ryo kwikorera imiti no guhanga udushya. Ibyo bizasaba ubufatanye buhamye hagati y’ibigo nyafurika n’ibigo mpuzamahanga bikora imiti hamwe n’abashakashatsi.”

Imibare itangwa na AfDB igaragaza ko Afurika itumiza hejuru ya 70% by’imiti yose ikeneye ku kiguzi cya miliyari 14 z’amadolari y’Amerika buri mwaka.

  • NTAWITONDA JEAN CLAUDE
  • Ukuboza 18, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE