U Rwanda rwishimiye intambwe rwateye mu kubungabunga ibidukikije

  • NYIRANEZA JUDITH
  • Ugushyingo 24, 2023
  • Hashize amezi 6
Image

Minisitiri w’Ibidukikije Dr Mujawamariya Jeanne d’Arc yatangaje ko hari byinshi byagezweho mu kubungabunga ibidukikije mu Rwanda, nubwo hakiri urugendo bitewe nuko kubibungabunga atari ikintu cyahita kirangira.

Ni ubutumwa Minisitiri Dr Mujawamariya Jeanne d’Arc yatanze ku mugoroba wo ku wa Kane tariki ya 23 Ugushyingo, ubwo hizihizwaga isabukuru y’imyaka 10 Ikigega cy’Igihugu cyo gutera inkunga imishinga yo kubungabunga ibidukikije, kimaze kigira uruhare mu gutera imishinga igamije kubungabunga ibidukikije.

Yagize ati: “Kwizihiza imyaka 10 ni ukwishimira imihigo twesheje. Hari byinshi byo kwigira ku mushinga wa Green Gicumbi. Ni uguhora twigisha, ni uguhozaho ntitwavuga ngo ibibazo bigendanye n’ibidukikije tubirangije mu ijoro rimwe cyangwa umunsi umwe, ni uguhora twiga kandi tukivura ku tukigira ku bandi kandi tukigisha natwe tunabikora”.

Yakomeje ashimira Ikigega cy’Igihugu gitera inkunga Imishinga yo kubungabunga Ibidukikije (FONERWA) intambwe imaze guterwa.

Ati: “Ibyo Ikigega cyakoze bigeze ku ntambwe ishimishije. Utarubakiwe inzu yo guturamo yakorewe amaterasi y’indinganire yongera umusaruro, utaragezweho n’ibyo nibura yanyuze mu muhanda wa Nyabugogo ahubatswe ibiraro 2 byatewe inkunga na FONERWA, ikigega cyahanze imirimo itandukanye yahawe Abanyarwanda n’ibindi”.

Yatanze urugero rw’Umudugudu wa Kaniga wubatswe hagamijwe kurengera ibidukikije, yibutsa ko byatumye abagejejweho ibyo bikorwa remezo ubu babayeho batekanye, kuko bakuwe ahashyira ubuzima bwabo mu kaga.

Ati: “Imwe muri yo mishinga izamurikwa muri COP 28 nk’uwo gutuza Imiryango yari ituye mu manegeka  hashyira ubuzima bwabo mu kaga, tukaba twarabatuje neza, ubu Umunyarwanda wa hariya Kaniga araryama agasinzira adafite impungenge ko amazi ari bumutembane, ko inkuba iri bumukubite, urukuta rw’inzu ye ruri bumugwire kandi agahinga akeza ibishyimbo, akeza icyayi, abavumvu bagahakura.

Abana bakiga neza kandi hafi bagataha batekanye bagashobora gukora imikoro yo mu rugo kuko baracaniwe, bafite amazi meza, bafite uturima tw’igikoni bararya neza, bafite inka bahawe muri gahunda ya Girinka y’uriya mushinga wa Green Gicumbi bakagira ifumbire ijya muri ka karima k’igikoni, bagahinga bakeza ndetse bagasagurira amasoko”.

Mukarwego Alphonsine wo mu Karere ka Gicumbi, mu Murenge wa Kaniga, Akagari ka Murindi, Umudugudu wa Runyinya, yatangarije Imvaho Nshya ko umushinga wa Green Gicumbi wabafashije kubungabunga ibidukikije, umusaruro wabo uriyongera.

 Ati: “Uyu mushinga wa Green Gicumbi wadutereye icyayi nta muntu n’umwe washoyemo imbaraga ze, Green Gicumbi yarahinze, iratabira, ishyiramo ifumbire, iratera ikiturekurira gifite imyaka ibiri, ubu turi gusoroma, twatangiye kunoga.

Yaduciriye imiringoti irwanya isuri, iduterera ibiti bivangwa n’imyaka, ibyo yateye tuzajya tubigaburira amatungo agire umukamo kandi hari n’abo yahaye inka tuzajya tuyikuraho ifumbire, dufumbire cya cyayi tubone umusaruro, bityo tubone amafaranga”.

Umuyobozi w’Ikigega cy’Igihugu cyo kubungabunga Ibidukikije Teddy Mugabo, yagarutse ku ntambwe imaze guterwa binyuze mu bikorwa icyo kigega kimaze gushora mu mishinga yo kubungabunga ibidukikije kuri ubu bizihiza imyaka 10.

FONERWA yatangiye mu 2012, yagize uruhare runini mu guteza imbere gahunda y’ibikorwa byo kubungabunga ibidukikije mu guhangana n’imihindagurikire y’ibihe kimwe no guteza imbere ejo hazaza heza.

Yagize ati: “Tumaze gukoresha amafaranga agera hafi kuri miliyari 1, FONERWA imaze gutera inkunga imishinga itandukanye. Twatekereje wo gutera icyayi ku misozi aho bifasha gufata ubutaka, himuwe imiryango 100 yabaga mu manegeka yubakirwa Umudugudu, hakoreshejwe ibikoresho bibungabunga ibidukikije,  Nyandungu Eco Park, n’indi”.

U Rwanda rufite intego yo kuba rwaragabanyije ingano y’ibyuka bihumanya ikirere ku kigero cya 38% mu 2030.

Miliyari 11 z’amadolari y’Amerika, agizwe na miliyari 5.7 z’amadolari yo gukumira na miliyari 5.3 z’amadolari yo kurwanya imihindagurikire y’ibihe.

Mu myaka icumi ishize, Ikigega cy’Igihugu cyo kubungabunga ibidukikije cyageze ku bikorwa by’ingenzi birimo gukusanya miliyoni 274 z’amadolari y’Amerika yo gushora mu mishinga 46 ituma haba hatoshye,  aha hakazirikanwa ko Kigali ari umujyi utoshye wa mbere muri Afurika, gushyiraho ikigo cya mbere cyo gucunga imyanda mu Rwanda, gushimangira imibereho no guhangana n’imihindagurikire y’ibihe by’abaturage bo mu Karere ka Gicumbi no mu bindi bice by’igihugu, guhanga imirimo irenga 172.000 ku Banyarwanda mu bice bitandukanye  ahasazurwa amashyamba,  kugezwaho amazi n’uburyo bwiza bwo kuyafata, imicungire y’umutungo n’ibindi.

Ikigo cy’Igihugu gitera inkunga Imishinga yo kubungabunga ibidukikije (FONERWA) kimaze gukoresha hafi miliyari 1 z’amadolari y’Amerika.

  • NYIRANEZA JUDITH
  • Ugushyingo 24, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE