U Rwanda rugiye gufungura Ambasade mu Bwami bwa Yorodaniya

Minisiteri y’Ububanyi n’Amahanga n’Ubutwererane (MINAFFET) yatangaje gahunda yo gufungura ibiro by’uhagarariye u Rwanda i Amman mu Bwami bwa Hashemite bwa Yirodaniya, hagamijwe kurushaho kwimakaza umubano w’ibihugu byombi. 

Minisitiri w’Ububanyi n’Amahanga n’Ubutwererane Dr Biruta Vincent, yabikomojeho ku wa Gatatu tariki ya 9 Kanama, mu ruzinduko rw’iminsi ibiri yagiriye muri icyo gihugu cyo mu Burasirazuba bwo Hagati. 

Yabitngaje nyuma y’uko mu mwaka ushize wa 2022, Perezida wa Repubulika y’u Rwanda Paul Kagame yasuraga Yorodaniya aho yagiranye ibiganiro n’Umwami Abdulkah wa Yorodaniya bakaganira ku ngamba zo kurushaho kwimakaza ubutwererane mu nzego zitandukanye.

Minisitiri Dr. Biruta yagize ati: “Ndagira ngo mfate aya mahirwe ntangaza ko u Rwanda rwafashe icyemezo cyo kugira uruhagarariye hano i Amman. 

Intambwe y’ingirakamaro izadufasha guteza imbere ubutwererane dufitanye mu kurushaho kunoza imikoranire, mu nzego z’inyungu duhuriyeho.”

Muri uru ruzinduko, itsinda riyobowe na Minisitiri Dr. Biruta ryashyize umukono ku masezerano y’ubufatanye y’uburyo butatu, arimo ayo gukuriraho viza abatunze Pasiporo zisanzwe, ajyanye n’imiturire n’iterambere ry’imijyi n’andi ajyanye n’amahugurwa mu bya dipolomasi. 

Itsinda ryaturutse mu Rwanda ryanagiranye ibiganiro na baganzi babo ku ngingo zitandukanye zirimo gahunda n’imishinga itandukanye y’ubufatanye.

Ku munsi w’ejo, Umwami Abdullah II wa Yorodaniya yakiriye Minisitiri Dr. Biruta amugaragariza agaciro ko kurushaho kwimakaza umubano mu by’ubukungu, aboneraho gusaba ko hatangira ubufatanye bw’abikorera bo mu bihugu byombi mu nzego z’ishoramari zitanga icyizere.

Muri Gashyantare, u Rwanda rwakiriye  Ayman Safadi, Minisitiri w’Intebe wungirije akaba na Minisitiri w’Ububanyi n’Amahaga wa Yorodaniya, icyo gihe hasinywe andi masezerano atandukanye. 

Ayo masezerano yasinywe icyo gihe arebana n’ubufatanye mu nzego zirimo Politiki, uburezi, ubucuruzi no kuvanaho Visa ku Badipolomate n’abafite Pasiporo za serivisi.