U Rwanda rugiye guca agasuzuguro ko gucyurirwa indagara

  • KAMALIZA AGNES
  • Mutarama 23, 2024
  • Hashize ukwezi 1
Image

Mu gihe hamaze iminsi hacaracara amagambo y’Umukuru w’Igihugu cy’abaturanyi cy’u Burundi avuga ko u Rwanda rutazongera kubona imikeke n’indagara, Guverinoma y’u Rwanda yijeje guca impaka ntiruzongere gucyurirwa indagara.

Minisitiri w’Ubuhinzi n’Ubworozi (MINAGRI) Dr Musafiri Ildephonse, mu ijambo yafashe mu Nama y’Igihugu y’Umushyikirano, yijeje Abanyarwanda ko bagiye guca agasuzuguro ko gucyurirwa amanywa n’ijoro ko batagira indagara.

Aha yavugaga aho u Rwanda ruhagaze mu kongera umusaruro w’ibikomoka ku buhinzi n’ubworozi ndetse no kwishakamo ibisubizo by’ibibazo bibwugarije.

Dr. Musafiri yavuze ko binyuze mu gushyira imbere ubworozi buvuguruye, hari kugaragazwa uburyo uburyo ubworozi bushoboka hadasigaye amafi n’inkoko, ndetse ko mu myaka itanu iri imbere u Rwanda ruzaba rufite ubushobozi bwo kwihaza ku mafi n’indagara.

Ati: “Ubu dushaka guca ibintu byo kuzana amafi hanze, ibintu ibi byo kujya baducyurira indagara byateye turashaka kubirandura. Uretse n’indagara dufite isambaza mu Kiyaga cya Kivu kandi ziryoshye kurusha indagara…”

Minisitiri w’Ubuhinzi n’Ubworozi Dr. Musafiri Ildefonse

Yongeyeho ko mukiyaga cya Kivu habamo n’amafi yo mu bwoko bwa Tilapiya bityo ko ku bufatanye n’abaterankunga, umusaruro w’amafi ugiye kwiyongera mu myaka itanu iri imbere.

Ati: “Tugiye kongera umusaruro w’amafi mu myaka nk’itanu iri imbere turumva ko ibintu byo kuvana amafi hanze n’izo ndagara bahora baducyurira amanywa n’ijoro bizaranduka burundu.”

Ku bijyanye n’ibiciro by’ibiribwa bikomoka ku buhinzi n’ubworozi ku isoko, Dr. Musafiri yavuze ko ibiciro umwaka ushize byiyongereye  ku kigero cya 20% bitewe n’intambara yo muri Ukraine, ibibazo by’imvura nyinshi yatwaye ubuzima bw’abantu ndetse n’ibintu.

Yongeyeho ko mu kwishakamo ibisubizo ubu Abanyarwanda bejeje mu bice byose by’Igihugu kandi n’ibiciro ku isoko byagabanyutse.

Minisitiri Dr. Musafiri kandi yijeje umutekano w’ibiryo mu gihe kizaza, asaba Abanyarwanda kwirinda gusesagura bagahunika.

Ati: “Tunabibutsa ko uyu musaruro dufite tuwufata neza kuko ari umwanya wo kugira ngo duhunike na ya mitiba ya kera igaruke, nibiba ngombwa abantu babike ibyo bazarya kuko ibishyimbo birahunikika, ibigori birahunikika. Nitumara kugurisha tukikenura, ibisigaye tubibike kugira ngo duteganyirize ejo tutazasonza kandi twari twarejeje.”

Yongeyeho ko mu Rwanda abarenga 78% kuri ubu bihagije mu biribwa, mu gihe 2006 bari kuri 28% ndetse yizeza ko mu minsi izaza bizaba 100%.

  • KAMALIZA AGNES
  • Mutarama 23, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE