U Rwanda ntirwanyeganyeze ku rutonde ngarukakwezi rwa FIFA

  • SHEMA IVAN
  • Gashyantare 15, 2024
  • Hashize amezi 2
Image

Ikipe y’Igihugu y’u Rwanda Amavubi yagumye ku mwanya wa 133 ku rutonde rw’Ishyirahamwe ry’Umupira w’Amaguru ku Isi (FIFA) rwasohotse kuri uyu wa Kane tariki ya 15 Gashyantare 2024.

Mu kwezi gushize, Ikipe y’u Rwanda ntiyigeze itakaza inota na rimwe yagumanye amanota 1107.04 ku mwanya wa 133 ku rutonde rwa FIFA.

Ni mugihe ikipe y’igihugu iheruka gukina umukino mpuzamahanga itsinda Afurika y’Epfo ibitego 2-0 mu gushaka itike y’igikombe cy’Isi cya 2026 mu Gushyingo 2023 kuri Stade Mpuzamahanga ya Huye. 

Urutonde rwashyizwe hanze n’Ishyirahamwe ry’Umupira w’Amaguru ku Isi (FIFA), kuri uyu wa 15 Gashyantare, rugaragaza ko u Rwanda ruri mu bihugu bitanyeganyeze kuko rwagumye ku mwanya wa 133 ndetse rugumana amanota 1170.04.

Nta mpinduka kandi zabaye mu bihugu 10 bya mbere ku Isi, aho urutonde ruyobowe na Argentine ikurikiwe n’u Bufaransa, u Bwongereza, u Bubiligi, Brésil, u Buholandi, Portugal, Espagne, u Butaliyani na Croatia.

Muri Afurika, Côte d’Ivoire iheruka kwegukana igikombe cy’Afurika CAN 2023 yari yakiriye yageze ku mwanya wa 39 ku Isi.

Ibihugu 10 bya mbere muri Afurika ni Maroc (ya 12), Sénégal (17), Nigeria (28), Misiri (36), Côte d’Ivoire (39), Tunisia (41), Algeria (43), Mali (47), Cameroun (51), Afurika y’Epfo (58).

Mu bihugu bituranye n’u Rwanda, Repubulika Iharanira Demokarasi ya Congo ni iya 63, Uganda (92), Kenya (111), Tanzania (119) n’u Burundi (140).

Muri uru rutonde rwa Gashyantare rwa FIFA ikipe y’igihugu ya Angola iheruka kugera muri ¼ cya CAN 2023 ni yo yazamutseho imyanya myinshi 24 ifata umwanya wa 93 ku Isi.

Qatar iheruka kwegukana igikombe cy’Aziya uyu mwaka yiyongereyeho amanota 92.04 izamukaho imyanya 21 ifata umwanya wa 37 ku Isi.

Igihugu cya Vietnam ni cyo gihugu cyatakaje amanota menshi muri uku kwezi agera kuri 41.00, mu gihe Guinea-Bissau n’u Buhinde ari byo byatakaje imyanya myinshi ugeranyije n’urutonde rwubushize aho batakaje imyaka 15.

Urutonde rutaha ruzasohoka ku wa 4 Mata 2024.

  • SHEMA IVAN
  • Gashyantare 15, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE