U Rwanda na Philippines byasinyanye amasezerano y’ubutwererane rusange

  • NTAWITONDA JEAN CLAUDE
  • Ukuboza 5, 2023
  • Hashize amezi 6
Image

Icyizere cyo kurushaho kwagura ubufatanye mu nzego zitandukanye hagati y’u Rwanda na Repubulika ya Philippines cyabaye impamo nyuma yo gushyira umukono ku masezerano atangiza ubutwererane rusange hagati y’ibihugu byombi.

Ni amasezerano yashyizweho umukono na Minisitiri w’Ububanyi n’Amahanga n’Ubutwererane Dr. Biruta Vincent wahagarariye u Rwanda n’Ambasaderi wa Philippines mu Rwanda Amb. Marie Charlotte G. Tang, kuri uyu wa Kabiri tariki ya 5 Ukuboza 2023.

Minisiteri y’Ububanyi n’Amahanga n’Ubutwererane yashimangiye ko ayo masezerano yubatse umusingi wo kurushaho kwagura ubutwererane mu nzego nyinshi zitandukanye hagati y’u Rwanda na Philippines.

Amb. Tang aherutse kugaragaza ko u Rwanda na Philippines ari ibihugu bikiri mu nzira y’amajyambere bisangiye ingorane n’inzozi zo kugera ku mahoro n’uburumbuke, bityo uwo akaba ari wo musingi wo kurushaho kwimakaza ubutwererane.

Hagati aho, Umuyobozi Mukuru wa Polisi y’u Rwanda, CG Felix Namuhoranye, yakiriye Amb. Tang ku cyicaro gikuru cya Polisi ku Kacyiru, baganira ku bijyanye n’ubufatanye mu bikorwa bya Polisi n’ibyo kugarura amahoro mu butumwa bwa Loni.

Kugeza ubu mu Rwanda hatuye abaturage 60 bakomoka muri Philippines, bakaba bakomeje gutanga umusanzu wabo mu iterambere ry’Igihugu binyuze mu bucuruzi bakora.

Kuva mu ntangiriro z’umwaka wa 2017, abaturage ba Philippines baza mu Rwanda bemerewe kumara iminsi 90 mu gihugu nta visa bafite hashingiwe ku kuba n’Abanyarwanda bashobora kumara iminsi 30 muri Philippines nta visa mu gihe baba bafite tike y’indege yizewe igaragaza igihe bazavira muri icyo gihugu.

Kuri ubu Ambasaderi Tang afite icyicaro i Nairobi muri Kenya, akaba ari na we ukomeje gukora ibishoboka byose mu kurushaho kwagura ubutwererane bw’ibihugu byombi.  

Philippines ni igihugu kigizwe n’itsinda ry’ibirwa 7,641 giherereye mu majyepfo y’uburasirazuba bw’Aziya, mu burengerazuba bw’Inyanja ya Pasifika. Ibyo birwa byose bikubiye mu matsinda atatu manini ari yo Luzon, Visayas, na Mindanao.

Icyo gihugu kiza ku mwanya wa 12 w’ibihugu bituwe cyane kurusha ibindi ku Isi, aho abaturage bacyo bagira imico n’amoko bitandukanye. Manila ni wo Murwa Mukuru wacyo, ariko umujyi utuwe cyane kurusha iyindi ni uwa  Quezon.

  • NTAWITONDA JEAN CLAUDE
  • Ukuboza 5, 2023
  • Hashize amezi 6
TANGA IGITEKEREZO
UZABUMWANA JEAN PAUL says:
Ukuboza 5, 2023 at 10:02 pm

I am very glad 😊😊😊😊 because of our achievements as the country of thousands hills….I like it 😃👍

Andika igitekerezo

AMATEGEKO AGENGA IYANDIKA RY'IGITEKEREZO CYAWE