U Rwanda na EU bifitanye umubano utajegajega- Perezida Kagame

  • ZIGAMA THEONESTE
  • Ukuboza 19, 2023
  • Hashize amezi 2
Image

Perezida wa Repubulika y’u Rwanda Paul Kagame na Perezida wa Komisiyo y’Umuryango w’Ubumwe bw’u Burayi (EU) Ursula von der Leyen, bashimangiye ko u Rwanda na EU bifitanye umubano utajegajega ndetse bikomeje gushyira imbaraga mu kurushaho kunoza ubufatanye n’ubutwererane mu nzego zitandukanye.

Babigarutseho ku wa Mbere tariki ya 18 Ukuboza, ubwo bagiranaga ikiganiro n’abanyamakuru nyuma y’ibiganiro bagiranye mu muhezo bigakurikirwa no gushyira umukono ku masezerano ya Samoa ashimangira ubufatanye mu nzego zirimo uburenganzira bwa muntu, amahoro n’umutekano, iterambere n’izindi.

Perezida Kagame yagize ati: “U Rwanda na EU ni abafatanyabikorwa bakomeye. Mu by’ukuri ni inshuti z’igihe kirekire. Mu myaka ishize twarushijeho kwimakaza ubutwererane mu nzego zitandukanye.”

Perezida Kagame yavuze ko EU ikomeje gutanga umusanzu ukomeye mu iterambere ry’u Rwanda, by’umwihariko mu rwego rw’ubuzima, iterambere ry’ubukungu n’izindi nzego.  

Yashimiye Perezida wa Komisiyo ya EU n’itsinda bazanye mu muhango wo gutaha uruganda rw’inkingo n’imiti rwuzuye mu Mujyi wa Kigali rwagezweho kubera umusanzu uzira amakemwa w’ibihugu by’u Burayi.

EU n’ibihugu biyigize, binyuze mu kigega cy’ishoramari ku Isi Global Gateway, yateye inkunga u Rwanda y’arenga miliyoni 900 z’Amayero, ni ukuvuga amafaranga y’u Rwanda asaga miliyari 1,239.

Abo bayobozi bombi baganiriye ku ishoramari ryo guteza imbere ubuvuzi, guhangana n’imihindagurikire y’ibihe, ibikoresho fatizo by’ingenzi, guteza imbere ibikomoka ku buhinzi n’ubworozi n’uburezi.

Perezida wa Komisiyo ya EU yatangaje ko bagiye kongera miliyoni 40 z’Amayero mu ishoramari ry’uruganda rw’imiti n’inkingo mu Rwanda.

Iyi nkunga ifasha guteza imbere urwego rw’ubushakashatsi, uburezi no kongera ubushobozi, mu ihangwa ry’imirimo n’ibindi.

Ni ishoramari kandi rizafasha uruganda rukora imiti n’inkingo ndetse no kuzamura urwego rw’ikoranabuhanga rikoreshwa mu buvuzi rizatwara miliyoni 94 z’Amayero.

Uwo muyobozi kandi yanatangaje ko hamaze gusinywa amasezerano hagati y’u Rwanda na Banki y’Ishoramari y’u Burayi yo kohereza ibikoresho by’ibanze bizakoreshwa.

Byatangajwe kandi ko ubu bufatanye bwa Leta y’u Rwanda na EU buzanakoreshwa mu rwego rw’ubucukuzi bw’amabuye y’agaciro harimo gutanga ibikoresho by’ibanze binyuze mu kigega Global Gatway.

Perezida Kagame yagaragaje ko kugira ngo uruganda rwa BioNTech rwubakwe EU yabigizemo uruhare rufatika.

Yagize ati: “Nk’umugabane turacyagorwa cyane no gutumira imiti n’inkingo ziva hanze. Turashaka ko ibi bihinduka, umuti urambye rero ni ukubaka uburyo twazikorera ndetse no tukazamura ubushobozi bwacu mu buvuzi. EU irimo kudufasha kugira iryo terambere rigerweho.Njyewe na Perezida wa Komisiyo ya EU, twitabira igikorwa cyo gufungura uruganda rwa BioNTech rukora inkingo. EU ndetse na Perezida  Von der Leyen ubwe babigizemo uruhare rufatika kugira ngo uru ruganda rwubakwe”.

Madamu Ursula von der Leyen na we yongeyeho ati: “Mu rwego mpuzamahanga EU  n’u Rwanda turimo gukora ibishoboka byose kugira dushyireho inzego zihamye zo guhangana n’imihandagurikire y’ibihe. U Rwanda ni umufatanyabikorwa w’imena wa EU binyuze mu Kigega  Global Gateway cyashoye miliyari 150 z’Amayero muri Afurika.”

Yavuze ko Ikigega cy’ishoramari ku Isi Global Gateway cyagiyeho kugira ngo hazamurwe urwego rw’ishoramari, kuzamura ubuziranenge no gukorera mu mucyo.

Ati: “Turasangira ikoranabuhanga n’ubumenyi ndetse no guhugura abakozi bo kuri uyu mugabane. Dutanga inkunga twese nk’abagize umugabane w’u Burayi, izagera ku baturage basanzwe, ku bigo by’ishoramari n’ib’abikorera bari mu ishoramari. Ibyo byose bizazana ibyiza ndetse binatange akazi ku Banyarwanda.”

Nanone kandi, Ikigega Global Gateway cyateye inkunga ya miliyoni 380 z’Amayero yo guteza imbere urwego  ubuhinzi n’ubworozi.

Ni ikigega kandi cyashoye miliyoni 320 z’Amayero zo guhangana n’imihindagurikire y’ibihe, by’umwihariko mu mijyi, ndetse cyanashoye miliyoni 100 z’Amayero mu burezi bw’amashuri y’inshuke.

Perezida Kagame na Perezida wa Komisiyo ya EU von der Leyen bakiriye neza kuba u Rwanda rwashyize umukono ku masezerano ya Samoa mu muhango wabereye i  Buruseli mu Bubiligi mbere y’uko bagirana ibiganiro.

Amasezerano ya Samoa ashingiye ku mikoranire hagati y’Umuryango w’Ubumwe bw’u Burayi n’Umuryango uhuriyemo ibihugu by’Afurika bya Carayibe na Pasifika, bazakorana  mu myaka 20 iri imbere.

  • ZIGAMA THEONESTE
  • Ukuboza 19, 2023
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE