U Rwanda mu bihugu 10 bya mbere byafunguriye Isi amarembo

  • Imvaho Nshya
  • Nyakanga 24, 2023
  • Hashize amezi 10
Image

U Rwanda rwashyizwe mu bihugu 10 bya mbere ku Isi byakinguriye amahanga amarembo, aho urwandiko rw’inzira rutanga (passport) rwazamutseho imyanya 10 ku rwego mpuzamahanga nk’uko bikubiye muri Raporo y’ikigo cy’Abongereza Henley & Partners ya 2023.

Abafite amahoteli yakira abagana u Rwanda ndetse n’abacuruza imitako n’ibindi bikoresho by’ubugeni byakorewe mu Rwanda ni bamwe mu bishimira urujya n’uruza rw’abasura u Rwanda baturutse hirya no hino ku Isi.

Raporo y’ikigo cy’Abongereza Henley & Partners yibanda ku gihembwe cya 3 cy’umwaka wa 2023 yashyize u Rwanda ku mwanya wa 8 mu bihugu 199 byasuzumwe ku Isi mu birebana no gukingurira amahanga amarembo bitewe no kudasaba viza.

Hari abaza mu Rwanda baje gutembera no kurusura n’abandi baza kuhashakira isoko ry’ibyo bacuruza bose bemeza ko kwinjira mu Rwanda baturutse mu bihugu by’abaturanyi n’ibya kure nta mbogamizi bigeze bagira zo gusabwa viza.

Iyi raporo kandi igaragaza ko Passport y’u Rwanda yazamutseho imyanya 10 ku rwego mpuzamahanga ijya ku mwanya wa 76 mu bihugu 103 ivuye kuri 86 umwaka ushize wa 2022.

Ibi bishingira ku kuba ufite iki cyangombwa yemerewe kujya mu bihugu 63 byo hirya no hino ku Isi nta viza asabwe.

Impuguke mu bukungu Straton HABYARIMANA avuga ko igihugu gifunguriye amarembo yacyo abakigana kibyungukiramo byinshi mu rwego rw’ubukungu harimo ishoramari n’ubukerarugendo.

Umwaka ushize wa 2022, u Rwanda rwakiriye abasaga miliyoni imwe n’ibihumbi 100 kandi 60% byabo bavuye ku mugabane wa Afurika binjirije igihugu amafaranga abarirwa muri miliyari 496 z’amafaranga y’u Rwanda.

RBA

  • Imvaho Nshya
  • Nyakanga 24, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE