Twishimira ko amahoro yagarutse mu mutima w’Afurika – Jeannette Kagame

  • KAYITARE JEAN PAUL
  • Ukuboza 1, 2023
  • Hashize amezi 6
Image

Kuri uyu wa Gatanu tariki ya 01 Ukuboza 2023, Madamu Jeannette Kagame yitabiriye amasengesho azwi nka Leaders Breakfast Fellowship ategurwa n’Umuryango Rwanda Leaders Fellowship [RLF].

Ni amasengesho yitabiriwe n’abayobozi mu nzego nkuru z’igihugu, abayobora amadini n’amatorero, abikorera n’abandi.

Pasiteri Rick Warren yigishije Ijambo ry’Imana agaruka ku butunzi no guhoza ijisho ku mitungo.

Yasabye abayobozi kugira umwete wo kwita ku bandi no gukoresha impano bafite mu kuba igisubizo ku bo bashinzwe kureberera.

Madamu Jeannette Kagame yavuze ko Abanyarwanda bahisemo kuba umwe no gutekereza mu buryo bwagutse.

Yagize ati: “Turemeranya rwose, ubutumwa twumvise bwa Pasiteri Rick na Pasiteri Andy butwongerera imbaraga. Binteye ishema kuvuga nyuma yanyu kubera ubunararibonye butagira igiciro mwadusangije.

Hano ndibanda kuri bamwe bagira ukwifuza nk’ukw’intare kuko hari icyanditswe cyera abizera batweretse tutari tuzi […]”.

Yashimiye ibikorwa bya Pasiteri Rick anaha ikaze mu Rwanda Pasiteri Andy.

Akomeza agira ati “Ubuyobozi bwahisemo ko twunga ubumwe, kwishakamo ibisubizo ubwabo no gutekereza kure, twishimira ko amahoro yagarutse mu mutima w’Afurika, twizera ko tuzakwirakwiza aya mahoro kuri uyu mugabane, tugasangira ku migisha yose.

Twunzwe no kwizera, urukundo rw’Imana ndetse n’ibiremwa byayo”.

Yagaragaje ko Pasiteri Warren yabaye umwizerwa n’inshuti idasanzwe mu myaka yose ishize.

Agira ati: “Wabanye natwe mu bihe byose, haba mu bibazo ndetse no mu ntsinzi, nizera ko utewe ishema no gukomezanya natwe nkuko natwe biduteye ishema”.

Bidasubirwaho abakozi b’Imana bigisha Ijambo ry’Imana mu buryo bunejeje kandi budashidikanywaho bw’ingirakamaro bityo bigafasha mu gukwirakwiza ubutumwa bwiza.

Yavuze ko Warren adakorera Imana gusa ahubwo ngo ni n’umugabo w’ibikorwa, umugabo wiyemeza, w’umunyakuri, w’umunyempuhwe kandi w’umunyamahoro.

Ati: “Ndagushimira Pasiteri Warren kuba warizeye u Rwanda no mu gihe rutari rubikwiye.

Mu bihe by’umwijima byaranze amateka yacu wabonye urumuri mu kwiyemeza kubisohokamo, wemera gukomezanya natwe ni intsinzi yawe, wakunze iki gihugu uracyizera, ndahamya ko natwe tugukunda”.

Madamu Jeannette Kagame yabifurije intsinzi mu Rwanda anabereka ko bisanga.

Yavuze ko umutima w’Umugabane w’Afurika ugitera imbere kuko ngo kumena amaraso byararangiye.

  • KAYITARE JEAN PAUL
  • Ukuboza 1, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE