Ibitego bibiri bya Tuyisenge Arsène byafashije Rayon Sports gutsinda Sunrise FC 2-0 mu mukino w’umunsi wa 23 wa Shampiyona, iyo kipe igabanya ikinyuranyo cy’amanota irushwa na APR FC iri ku mwanya wa mbere.
Uyu mukino wabaye kuri iki cyumweru tariki 03 Werurwe 2024, kuri Sitade ya Nyagatare.
Umukino watangiye neza ku ruhande rw’iyi kipe yambara ubururu n’umweru kuko yasatiriye bikomeye ndetse Tuyisenge Arsène ayibonera igitego ku munota wa munani gusa.
Iki gitego cyayongereye icyizere kuko mu gice cya mbere cyose yayoboye umukino kugeza n’aho mu mpera zacyo uyu mukinnyi yafashijwe na mugenzi we ukina hagati, Kalisa Rashid, agashyiramo icya kabiri ku munota wa 43.
Igice cya mbere cyarangiye Sunrise itabashije kureba mu izamu itsinzwe na Rayon Sports ibitego 2-0.
Mu gice cya kabiri, Rayon Sports yashoboraga kubona igitego cya gatatu ku munota wa 63 ubwo Tuyisenge yongeraga gutera ishoti rikomeye mu izamu rya Sunrise ryari ririnzwe na Mfashingabo Didier ariko myugariro, Shyaka Clever awukuraho.
Ku munota wa 75 umutoza wa Rayon Sports Mette yakoze impinduka akuramo Bavakure Ndekwe Felix na Youssef Rhab, ashyiramo rutahizamu Paul Alan Gomis na Iradukunda Pascal.
Nyuma yo gukora izi mpinduka ntakindi gitego cyabontse.
Umukino warangiye Rayon Sports itsinze Sunrise FC ibitego 2-0 ibona amanota atatu y’ingenzi yayifashije kuganya ikinyuranyo kiri hagati yayo na APR FC mbere Y’uko zihura ku munsi wa 24 uteganyijwe tariki ya 9 Werurwe 2024.
Mu wundi mukino wabaye kuri iki Cyumweru Gasogi United yatsinzwe na Marines FC ibitego 2-0 byatsinzwe na Iradukunda Kabanda Serge na Rugangazi Prosper.
Kugeza ubu Shampiyona y’u Rwanda iyobowe na APR FC ifite amanota 52 ku rutonde rw’agateganyo rwa Shampiyona ibura iminsi irindwi gusa ikabona nyirayo, igakurikirwa na Rayon Sports irushwa arindwi na Musanze FC irushwa umunani.
Alisene komerezaho!