TP Mazembe yanze kwambara ‘Visit Rwanda’ ishobora gucibwa amande

  • SHEMA IVAN
  • Mata 18, 2024
  • Hashize ukwezi 1
Image

Ikipe ya Tout Puissant Mazembe yo muri Repubulika Iharanira Demokarasi ya Congo, yanze ibyo kwambara ‘’Visit Rwanda’’ ku myambaro yo mu irushanwa rya Africa Football League ishobora gucibwa amande, igakatwa ibihumbi 450 by’amadolari y’Amerika kuri miliyoni 1 y’amadolari y’Amaerika yari guhabwa na CAF.

TP Mazembe yari mu makipe umunani yitabiriye irushanwa rya Africa Football League ryari ribaye ku nshuro ku Mugabane w’Afurika mu kwakira 2023.

Mu kwakira 2023 ni bwo u Rwanda rwasinyanye amasezerano y’Ubufatanye na Africa Football League yo kwamamaza ’Visit Rwanda’ aho yambarwa ku maboko y’imyambaro y’amakipe arikina, ikagaragazwa muri stade zabereyeho imikino, kuri televiziyo ndetse no ku mbuga za internet z’iri rushanwa.

Aya masezerano kandi yemerera Sosiyete Nyarwanda ikora Ubwikorezi mu ndege RwandAir, ari  yo itwara amakipe aho agiye gukina mu gihe hahuye n’ibyerekezo ikoreramo.

Ubwo iri rushanwa ryari rigiye gutangira TP Mazembe yatangaje idashobora kwambara umwambaro uriho ijambo “Visit Rwanda”

Ibinyujije kumbuga nkoranyambaga ze umunyamakuru mpuzamahanga muri siporo Nyafurika, Micky Junior ukomoka mu gihugu cya Ghana, yavuze ko TP Mazembe yasoreje irushanwa riheruka muri ¼ ikuwemo na Espérance Sportive de Tunis, yagombaga guhabwa miliyoni 1y’amadolari y’Amerika ariko kubera kutubahiriza ayo mabwiriza no kuvanga siporo na politiki ikaba ishobora gukurwaho ibihumbi 450 by’amadolari y’Amerika.

Iri rushanwa rya Africa Football League ritegurwa n’Impuzamashyirahamwe ya Ruhago muri Afurika (CAF) rishobora kuba irya mbere kuri uyu mugabane rigakurikirwa na CAF Champions League ndetse irya CAF Confederation Cup ryo rikavaho burundu.

Ni irushanwa ryitezweho kuzamura ubushobozi bw’amakipe aryitabira cyane ko ayarigezemo agabana miliyoni 100z’amadolari y’Amerika arimo miliyoni 11.5z’amadolari y’Amerika ku ikipe iryegukana.

  • SHEMA IVAN
  • Mata 18, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE