Thomas Tuchel na Bayern Munich bemeranyije gutandukana mu mpeshyi

  • SHEMA IVAN
  • Gashyantare 21, 2024
  • Hashize amezi 2
Image

Ubuyobozi bw’ikipe ya Bayern Munchen yo mu Budage bwemeranyije Thomas Tuchel utoza iyi kipe ko bazatandukana ubwo umwaka w’imikino wa 2023-2024 uzaba urangiye.

Mu itangazo iyi kipe yashyize hanze ku wa Gatatu tariki 21 Gashyantare 2024, yavuze ko nyuma y’ibiganiro hagati y’Umuyobozi Mukuru Christian Dreesen na Thomas Tuchel, bemeranyije ko bazatandukana nyuma y’umwaka w’imikino wa 2023-2024. 

Umuyobozi Mukuru wa Bayern Munchen mu kiganiro yagiranye n’Urubuga rw’iyo kipe, yagize ati: “Mu biganiro byiza twagiranye, twaje gufata icyemezo cyo guhagarika umubano ushingiye ku kazi kugeza mu mpera z’uyu mwaka. Intego yacu ni ugufata ikindi cyerekezo cy’umushinga wacu w’umupira w’amaguru hamwe n’umutoza mushya mu 2024-2025.”

Thomas Tuchel we yavuze ko afatanyije n’abamwungirije bazakora ibishoboka byose bakageza ibyiza ku Ikipe mu gihe gisigaye ngo batandukane

Yagize ati: “Twemeranyije ko tuzahagarika umubano w’akazi mu mpera z’uyu mwaka w’imikino. Kugeza icyo gihe, birumvikana ko nzakomeza gukora ibishoboka byose hamwe n’abakozi dukorana gutoza kugira ngo tuzangere ku byiza byose.”

Uku gutandukana kwatewe no kwitwara nabi mu mikino itatu ishize, aho Bayern Munich yayitsinzwe yose harimo uwo yanyagiwemo na Mukeba Bayer Leverkusen ibitego 3-0, ndetse kuri ubu iyirusha amanota umunani ku rutonde rwa Shampiyona y’u Budage igeze ku munsi wa 22, Bochum yayibonyeho intsinzi y’ibitego 3-2.

Iyi mikino yaje ikurikira uwo yatsinzwemo na Werder Bremen igitego 1-0 tariki 24 Mutarama, ndetse abenshi mu bafana ntibaramubabarira mu wo banyagiwemo na Eintracht Frankfurt, ibitego 5-1 tariki 9 Ukuboza 2023.

Habayeho kandi no gutakaza muri UEFA Champions League mu Butaliyani, aho iyi kipe yatsinzwe na Lazio igitego 1-0 tariki 14 Gashyantare 2024.

Kugeza ku munsi wa 22 wa shampiyona y’u Budage Bayern Munchen irushanwa amanota umunani na Bayern Leverkusen ya mbere, ibintu bitamenyerewe cyane muri shampiyona.

Abatoza babiri ni bo bahabwa amahirwe yo kuzasimbura Tuchel barimo Jurgen Klopp uherutse gutangaza ko azava muri Liverpool mu mpera y’uyu mwaka ndetse n’Umunya-Espagne, Xabi Alonso utoza Bayern Leverkusen iyoboye urutonde rwa Shampiyona y’u Budage n’ubwo uyu Alonso anavugwa muri Liverpool kuzasimbura Jurgen Klopp.

Uyu Mudage, Thomas Tuchel yasimbuye mugenzi we Julian Nagelsmann bakomoka hamwe muri Gicurasi 2023. Nyuma y’amezi abiri yatwaye Igikombe cya Shampiyona hamwe na Bayern Munich. Yatoje kandi amakipe atandukanye nka Chelsea, Paris Saint-Germain, Borussia Dortmund na Mainz 05.

  • SHEMA IVAN
  • Gashyantare 21, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE