Tennis: Marco Trungelliti yegukanye icyumweru cya kabiri cya ATP Challenger Tour

Marco Trungelliti ukomoka muri Argentine yegukanye icyumweru cya kabiri cya #RwandaChallenger atsinze Umufaransa Clément Tabur amaseti 2-0 (6-4, 6-2) mu mukino wa nyuma wabaye kuri iki cyumweru tariki 10 Werurwe 2024.

Uyu mukino wabereye ku bibuga bya Tennis muri IPRC Kigali.

Marco Trungelliti yinjiye mu mukino neza cyane ko muri ½ yari yihimuye kuri mugenzi we w’Umunya-Pologne Kamil Majchrzak, wamutsinze ku mukino wa nyuma w’icyumweru cya mbere.

Mu gihe cy’isaha imwe n’iminota 40, Trungelliti wari nomero ya kane mu bahabwa amahirwe, yitwaye neza kuko ari we wabanje gutsinda amanota mbere ya Clément Tabur nomero ya gatanu.

Umunya-Australia Thomas Fancutt n’Umunyamerika Hunter Reese ni bo begukanye icyumweru cya kabiri cya Rwanda Challenger mu bakina ari babiri nyuma yo gutsinda S D Dev Prajwal wo mu Buhinde na David Pichler wo muri Austria amaseti 2-0 (6-1,7-5).

Mu cyumweru cya mbere Umunya-Pologne Kamil Majchrzak ni we wegukanye ATP Challenger 50 Tour atsinze Umunya-Argentine Marco Trungelliti amaseti 2-0 ( 6-4, 6-4).

Mu cyumweru cya mbere Umuholandi Max Houkes n’Umufaransa Clément Tabur mu bakina ari babiri ni bo begukanye ATP Challenger 50 Tour batsinze Pruchya Isaro wo muri Thaïlande na Christopher Rungkat wo muri Indonesie amaseti 2-0 (6-3, 7-6(4)).

U Rwanda rwabaye igihugu cya mbere cy’Afurika yo munsi y’Ubutayu bwa Sahara cyakiriye irushanwa rya “ATP Challenger 50 Tour”.

ATP Challenger 50 Tour, rimwe mu marushanwa atanu ategurwa n’Ishyirahamwe rya Tennis y’Ababigize umwuga (ATP) muri iki cyiciro (hagati ya 50-175), itanga amanota 50.

Buri mukinnyi anyura muri iki cyiciro cy’irushanwa u Rwanda rwakiriye, afite intego yo kugera mu bakinnyi 100 ba mbere ku Isi no gukina amarushanwa ya ATP Tour na ’Grand Slam’.

Abakinnyi bitabiriye iri rushanwa i Kigali baturutse mu bihugu birimo u Bufaransa, Israel, Argentina, Romania, Croatia, Australia, Zimbabwe, u Buholandi, Misiri, u Busuwisi, Moldova n’u Butaliyani.

Iri rushanwa ryakinwe n’abakinnyi bakomeye muri uyu mukino barimo nimero ya kabiri ku Isi muri Tennis, Umunya-Espagne Carlos Alcaraz n’abigeze kuba nomero ya mbere ku Isi barimo Umusuwisi Roger Federer, Umunya-Espagne Rafael Nadal n’Umunyamerika Andy Roddick, kongeraho Umunya-Argentine Juan Martin Del Potro wegukanye US Open mu 2009.