Tennis : Ikipe y’u Rwanda yatsinze Tanzania muri «Davis Cup 2022»

  • Imvaho Nshya
  • Nyakanga 7, 2022
  • Hashize imyaka 2
Image

Mu mikino y’umunsi wa gatatu y’irushanwa  mpuzamahanga ririmo  kubera mu Rwanda  mu mukino wa Tennis “Davis Cup 2022”,  ikipe y’u Rwanda yitwaye neza itsinda  Tanzania mu mukino wa kabiri.

Uyu mukino wabaye kuri uyu wa Gatatu taliki 06 Nyakanga 2022, ikipe y’u Rwanda yatsinze Tanzania imikino 3-0.

Mu mukino wa mbere, Habiyambere Ernest yatsinze Sulle Omari Hamis (Tanzania) amaseti 2-0 (6-2 na 6-2). Mu mukino wa kabiri, Karenzi Bertin, kapiteni w’ikipe y’u Rwanda na we yatsinze Mshanga Frank (Tanzania) amaseti 2-0 (6-4 na 6-0).

Mu cyiciro cy’abakina ari babiri,  ikipe y’u Rwanda yari igizwe na Hakizumwami Junior afatanyije na Niyigena Etienne yatsinze  Rashidi Rahim na Risasi Abubakari (Tanzania) amaseti 2-0 (6-2 na 6-0).

Iyi kipe y’u Rwanda iri mu itsinda A  uyu akaba ari umukino wa kabiri itsinze  nyuma yo gutsinda Uganda ku munsi wa mbere ikaba isigaje gukina na Sudan.

Muri iri tsinda A undi mukino wabaye, ikipe ya Sudan yatsinze Uganda imikino 3-0

Mu mukino wa mbere, Noor Mandour (Sudan) yatsinze Joel Mwisukye (Uganda) amaseti 2-0 (6-3 na 6-1). Umukino wa kabiri, Khalid Derar (Sudan) yatsinze Godfrey Ocen (Uganda) amaseti 2-0 (6-2 na 6-1).

Mu cyiciro cy’abakina ari babiri, ikipe ya Sudan yari igizwe na Mohamed Abdalla na Noor Mandour  yatsinze ikipe ya Uganda yari igizwe na Edward Birungi na Wakoli Nasawali Ronald amaseti 2-0 (6-4 na 7-6).

Mu itsinda B habaye imikino 2 aho  RDC yatsinze Congo Brazzaville imikino 3-0 naho  ikipe ya Botswana itsinda Angola imikino 2-1.

Nyuma y’umunsi wa gatatu, ikipe y’u Rwanda iyoboye urutonde aho isigaje umukino wa Sudan izakina taliki 07 Nyakanga 2022 yawutsinda ikazakina umukino wa nyuma aho yitwaye neza yakomeza mu cyiciro cya gatatu “Africa Group III).

Kapiteni w’ikipe y’u Rwanda, Karenzi Bertin yatangaje ko muri rusange irushanwa ririmo kugenda neza kuko batsinze ikipe ya Uganda na Tanzania bazirusha. Ati : “ Ni icyizere kuri twebwe n’igihugu kuko biragaraga ko tumeze neza.”

Yakomeje avuga ko basigaje umukino wa Sudan kandi bizeye ko bazitwara neza bakagera ku mukino wa nyuma ndetse bakaba bakomeza mu cyiciro cya gatatu (Group III).

Karenzi Bertin, kapiteni w’ikipe y’u Rwanda (iburyo) amaze gutsinda Mshanga Frank (Tanzania)

Karenzi Bertin avuga ko mbere yo gutangira iri rushanwa basuwe n’abayobozi batandukanye ba Minisiteri ya Siporo “MINISPORTS”  babizeza ubufasha bushoboka bikaba byaraberetse ko bashyigikiwe.

Mu gihe ikipe y’u Rwanda izaba igeze ku mukino wa nyuma, Karenzi Bertin arasaba Abanyarwanda kuza kubashyigikira kugira go bazabashe kwitwara neza no kuzamuka mu cyiciro cya gatatu.

Umutoza w’ikipe y’igihugu, Rutikanga Sylvain yatangaje ko akurikije imikino u Rwanda rumaze gukina bimuha icyizere cyo kugera ku mukino wa nyuma.

Ati : “Dusigaje Sudan, twarebye uko ikina, ndumva mfite  icyizere ko tuzitwara neza tugakomeza ku mukino wa nyuma.”

Umutoza w’ikipe y’igihugu, Rutikanga Sylvain (iburyo)

Yakomeje avuga ko intego bafite ni ukugera ku mukino wa nyuma  aho bashobora guhura na Togo cyangwa  RDC. Ati : “ Ni amakipe akomeye ariko turiteguye.”

Perezida w’ishyirahamwe ry’umukino wa Tennis mu Rwanda “RTF”, Karenzi Theoneste agaruka kuri iyi mikino yasobanuye ko ikinwa n’ibihugu biri mu cyiciro kimwe bishaka kuzamuka mu ntera.

Yakomeje avuga ko hano hari amakipe 9 azavamo imwe naho muri Cameroun hazakinira amakipe 8 naho hazamuke ikipe 1 maze zombi zizamuke mu cyiciro cya gatatu (Group III).

Perezida RTF, Karenzi Theoneste

Karenzi avuga ko irushanwa bariteguye neza n’abakinnyi babateguye neza kandi  byigaragaje kuko bamaze gutsinda imikino ibiri bakaba basigaje umukino umwe wa Sudan hanyuma izatsinda igakomeza ku mukino wa nyuma.

Ati : “Abakinnyi bacu bariteguye bihagije, ibisabwa byose twarabikoze, dufite icyizere cyo kwitwara neza tugakomeza mu kindi cyiciro”.

Perezida wa RTF, Karenzi arasaba Abanyarwanda n’abakunzi b’umukino wa Tennis muri rusange kuzaza ari benshi  gushyikigikira ikipe yabo kugira ngo izabashe kuzamuka mu ntera.

 Imikino y’umunsi wa 4

Kuri uyu wa Kane taliki 07 Nyakanga 2022 hateganyijwe imikino ibiri yo mu itsinda B aho  ikipe ya Botswana  ikina na  Togo naho  ikipe ya Angola  ikine na Congo Brazzaville. Imikino nk’uko bisanzwe irabera muri IPRC Kigali ku Kicukiro.

  • Imvaho Nshya
  • Nyakanga 7, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE