Leta Zunze Ubumwe za Amerika zafatiye ibihano Sudan birimo; guhagarika kohereza ibicuruzwa, inkunga n’inguzanyo nyuma y’uko icyo gihugu gishinjwe kurenga ku mategeko mpuzamahanga n’uburenganzira bwa muntu kigakoresha intwaro z’ubumara mu ntambara y’abenegihugu.
Amerika yavuze ko mu ntambara y’ingabo za Leta n’Umutwe witwaje intwaro wa RSF (Rapid Support Forces) mu mwaka ushize hakoreshejwe intwaro kirimbuzi.
Mu itangazo ry’ejo ku wa Kane, Umuvugizi wa Minisiteri y’Ububanyi n’Amahanga ya Amerika, Tammy Bruce, yavuze ko Guverinoma ya Sudan igomba guhagarika ibyo bikorwa nkuko biteganywa n’amategeko mpuzamahanga.
Yagize ati: ”Amerika irahamagarira Sudani guhagarika burundu ikoreshwa ry’intwaro kirimbuzi kandi ikubahiriza inshingano zayo nk’uko biteganywa n’amasezerano mpuzamahanga ajyanye n’ikoreshwa ry’izo ntwaro.”
Ingabo za Leta na RSF bimaze igihe bihanganye mu ntambara yatangiye muri Mata 2023, nyuma y’amakimbirane yaturutse ku guharanira kujya ku butegetsi no kuba uruhande rumwe rwaranze ko ubutegetsi busaranganywa.
Amerika ishinja Sudan kunanirwa kwitabira ibiganiro by’amahoro byatumye Perezida Abdel Fattah al-Burhan, afatirwa ibihano biturutse ku kunaniza inzira y’amahoro no gukomeza kuzambya umutekano.
Ku ruhande rw’umutwe wa RSF mu bafatiwe ibihano harimo Gen. Mohamed Hamdan Dagalo, ushinjwa ibyaha bya Jenoside n’ibindi by’intambara.
Iyo ntambara yateje ibibazo bikomeye abaturage birimo; inzara, imfu ndetse abarenga miliyoni 13 bavuye mu byabo.
Nta gitekerezo kiratangwa. Ba uwa mbere gutanga igitekerezo.
Andika igitekerezo
AMATEGEKO AGENGA IYANDIKA RY'IGITEKEREZO CYAWE