Spittler utoza Amavubi ashimishijwe n’iterambere ryayo 

  • SHEMA IVAN
  • Werurwe 26, 2024
  • Hashize ibyumweru 3
Image

Umudage Frank Torsten Spittler utoza ikipe y’igihugu Amavubi yatangaje ko yishimiye uko ikipe ye irimo kwitwara kuva yahabwa izi nshingano mu Gushyingo 2023.

Ibi yabitangaje ku wa Mbere tariki 25 Werurwe 2024 nyuma y’umukino wa gicuti Amavubi yatsinzemo Madagascar ibitego 2-0 i Antananarivo.

Yagize ati: “Nabwiye abakinnyi banjye ko Madagascar iri hejuru yacu ku rutonde rwa FIFA, bityo rero twagombaga kwerekana ko gutsinda Afurika y’Epfo bitatugwiririye. Nasezeranyije abakinnyi nyuma y’umukino uheruka ko umukino utaha uzaba mwiza, twagize ibihe byinshi hamwe kandi ikipe yarushaho kuba nziza. Nishimiye iterambere ryacu.”

Abajijwe ku bijyanye n’umukino, Spittler yavuze ko abakinnyi be babangamiwe n’imiterere y’ikibuga kuko batamenyereye ibyatsi bisanzwe.

Ati “Nishimiye ko twatsinze, mu ntangiriro, byari bigoye kuko twagombaga kumenyera ikibuga. Ntabwo tumenyereye gukina ku bibuga by’ibyatsi bisanzwe kandi biragoye guherekanye, nyuma y’iminota 20 na 30, twakimenyereye kandi twarushijeho kuba beza mu gukina. “

Mu Ukwakira 2023 ni bwo Umudage Torsten Frank Spittler yahawe kuba umutoza Mukuru w’Ikipe y’Igihugu y’u Rwanda akayitoza mu mikino irimo n’iyo gushaka itike yo kujya mu Gikombe cy’Isi cya 2026.

Frank amaze gukina imikino ine mu Ikipe y’igihugu, yatsinzemo ibiri anganya indi ibiri mu gihe ataratsindwa n’umwe. Kuva yatangira akazi nta gitego kirinjira mu izamu ry’u Rwanda ndetse rumaze kwinjiza bine.

Amavubi yiteguye gukina imikino ibiri ikomeye muri Kamena 2024 aho azakina na Bénin ndetse na Lesotho mu gushaka itike y’Igikombe cy’Isi kizabera muri Canada, Leta Zunze Ubumwe z’Amerika na Mexique.

Kugeza ubu iyi kipe iyoboye Itsinda C bifatanyije na Afurika y’Epfo, Nigeria na Zimbabwe.

  • SHEMA IVAN
  • Werurwe 26, 2024
  • Hashize ibyumweru 3
TANGA IGITEKEREZO
Aisha says:
Werurwe 26, 2024 at 2:32 pm

Yebabaweeeeee
Ikipeyigihugucyacu
Cyurwanda Amavubi
Yongeye Kwihererana
Ikipe Yigihugu Ya Madagasikari
Nkuko Nubutaha Yihereranye
Ikipeyigihugu Cya Sauth Frica
Umutozawacu Frank Aragahore Ashimisa Abanyarwana Ikipe Yigihugu Cyacucyurwanda Amavubi Oyeeeeeeeeee……….

Andika igitekerezo

AMATEGEKO AGENGA IYANDIKA RY'IGITEKEREZO CYAWE