Sobanukirwa inama ugirwa igihe warumwe n’imbwa

  • NYIRANEZA JUDITH
  • Gashyantare 6, 2024
  • Hashize ibyumweru 4
Image

Hari abantu bajya bataka ko imbwa z’inyagasozi zibarira amatungo, ariko bakanagira impungenge z’uko zarya abana nko mu gihe bagiye kuvoma. Dore zimwe mu nama zafasha uwarumwe n’imbwa.

Hari inama zitangwa n’abaganga mu gihe umuntu yaba arumwe n’imbwa birimo kwihutira kujya kwa muganga nyuma yo guhita woza igisebe cy’aho imbwa yarumye.

Koza igisebe n’amazi meza n’isabune

Kuribwa n’imbwa ukoza igisebe n’amazi meza n’isabune mu gihe cy’iminota 15 ikikuruma bigabanya ibyago byo kwandura virusi zitera ibisazi ho 90%.

Uba ugabanyije bwa bukana bw’ibisazi by’imbwa kuko hari iziba zafasheho kandi ayo mazi agomba kuba afite imbaraga nko kuri robine cyangwa se umuntu agafata ijage ayo mazi akaba afite umuvuduko, agahita yihutira kwa muganga.

Kwihutira kujya kwa muganga

Umuyobozi w’Ishami rishinzwe kurwanya indwara zititaweho uko bikwiye muri RBC, Mbonigaba Jean Bosco yavuze ko kwihutisha kujya kwa muganga kuko bituma ubutabazi umuntu ahawe vuba bufasha umubiri guhita ukora abasirikare bo guhangana n’indwara y’ibisazi iyo mbwa ishobora kuba ifite.

Yakomeje asobanura ko umuntu aba gomba kubahiriza inshinge yandikiwe na muganga kuko ari bwo zigira akamaro.

 Ati: “Bagutera inshinge 5 zirinda ibisazi kubera ko iyo utewe urwa mbere abasirikare b’umubiri baza kurwanya za virusi nke zakugiyemo batangira gukora nibura ku munsi wa 7, ni virusi zigenda gahoro bigasanga ntizageze ku bwonko. Iyo virusi yageze ku bwonko ni urupfu kuko nta gukira kuko nta muti uraboneka w’indwara y’ibisazi by’imbwa ku bantu.

Iyo umuntu atinze bituma wa mubiri udakora ba basirikare ngo barwanye ko virusi zigera ku bwonko. Uko wihuta bitanga amahirwe yo gukora abasirikare bakarwanya ya virusi itaragera ku bwonko.

Gukingiza imbwa

Abafite imbwa bakangurirwa kuzikingiza kugira ngo hirindwe kuba zatera abantu ibisazi.

Mbonigaba kandi yasobanuye ko n’iyo imbwa yarumye umuntu yaba yarakingiwe ari ngombwa kujya kwa muganga kuko ntawamenya niba inkingo yafashe ziba zigishobora kumurinda.

Ati: “Rwa rukingo wahawe ntiwamenya urugero rwakozeho, urongera ukagana kwa muganga ukikingiza.

Imbwa yakingiwe nabwo uhita wikingiza kuko birashoboka ko utamenya ko rwa rukingo na rwo rwakoze muri yo, umuntu ntaba azi niba rugifite ubushobozi 100%.

Umwe mu barumwe n’imbwa umwaka ushize, yatangarije Imvaho Nshya ko we yihutiye kujya kwa muganga nubwo imbwa yari azi neza ko ikingiye.

Yagize ati: “Ntawamenya nubwo imbwa yandumye nari nzi neza ko ikingiye, sinamenya uburyo urukingo yahawe ruklora ndetse n’uburyo umubiri wanjye wari bwitware.”

Ikindi aborozi basabwa ni ukwirinda ko imbwa zizerera ku gasozi no kujya bamenyesha Inzego z’ibanze mu gihe hari imbwa irumye umuntu cyangwa imushwaratuye kandi idakingiye.

  • NYIRANEZA JUDITH
  • Gashyantare 6, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE