Senegal: Perezida Sall yemeye ko amatora ategurwa vuba bishoboka

  • ZIGAMA THEONESTE
  • Gashyantare 17, 2024
  • Hashize amezi 2
Image

Perezida wa Senegal Mack Sall yatangaje ko mu gihugu cye hagiye gutegurwa amatora y’Umukuru w’Igihugu vuba bishoboka nyuma y’aho Urukiko rw’Ikirenga rwanze icyifuzo cye cyo kuyasubika.

Guverinoma ya Senegal kuri uyu wa Gatanu yatangaje ko amatora yari yateje imyigaragambyo mu gihugu kubera gushaka kuyasubika, noneho ashobora kuba mu gihe Inteko Ishinga Amategeko yo yari yagaragaje ko azaba tariki ya 15 Ukuboza aho kuba tariki ya 25 Gashyantare 2024.

Urukiko rushinzwe kurinda Itegeko Nshinga muri Senegal rwari rwatangaje ko gusubika amatora ari ukunyuranya n’Itegeko Nshinga rutegeka Guverinoma gutegura amatora mu gihe cya vuba gishoboka ndetse no gutegura umwanya uhagije wo kwiyamamaza.

Urwo rukiko rwagaragaje ko amatora bidashoboka ko yazaba tariki ya 25 Gashyantare 2024 ariko ko bishoboka ko Guverinoma yayategura mu buryo bwa vuba bishoboka.

Kuri uyu wa Gatanu tariki ya 16 Gashyantare 2024, umuvugizi wa Guverinoma ya Senegal Yoro Dia yavuze ko Perezida Sall yiteguye kubahiriza ibyategetswe n’urukiko ndetse no gushyigikira ibikorwa by’amatora agategurwa vuba na bwangu.

Icyakora Guverinoma ntabwo yigeze itangaza itariki aya matora yimuriweho.

Senegal yari imaze igihe ifatwa nk’igihugu gisigaranye Demokarasi mu bihugu byo mu Karere k’Iburengerazuba bw’Afurika, gusa cyaje kwadukamo  imvururu zishingiye kuri Politiki zanaguyemo abantu ndetse zituma imirongo y’itumanaho ikurwaho mu gihugu hose.

Nibura abantu batatu ni bo byatangajwe ko bahasize ubuzima kubera imyigaragambyo ikomeye yamaganaga icyemezo cya Perezida Sall yari yafashe cyo gusubika amatora, mu gihe ababarirwa mu binyacumi bakomeretse.

Sall yashinjwaga gukomeza kugundira ubutegetsi yigiza inyuma amatora, icyakora mu kiganiro yagiranye n’itangazamakuru mu cyumweru gishize ibyo yarabihakanye. Igitutu cyo mu gihugu imbere ndetse n’icy’imiryango mpuzamahanga cyakomeje kwigaragaza kuri Sall bamushinja gushaka gutinda ku butegetsi nkana.

Kuri uyu wa Gatanu kuri X ibiro bya Leta zunze z’Amerika bishinzwe Afurika byashimye icyemezo cyafashwe n’urukiko bisaba ko amatora y’Umukuru w’Igihugu muri Senegali yakorwa mu gihe cyari cyateganijwe.

Umuvugizi w’Umuryango w’Abibumbye, Stephane Dujarric yagize ati: “Umunyamabanga mukuru wa Loni asaba ko muri Senegal wabaho amatora anyuze mu mucyo no mu bwisanzure hisunzwe ibiteganywa n’Itegeko Nshinga “

Umuryango w’Ibihugu by’Afurika y’Iburengerazuba (ECOWAS) na wo watangaje ko hakwiye gushyirwaho ingengabihe y’amatora ndetse isaba ko inzego z’ubuyobozi zagaragaza itariki amatora ya Perezida azabera hashingiwe ku byemezo byafashwe n’urukiko rushinzwe kurinda Itegeko Nshinga.

Sall yagiye ku butegetsi mu mwaka wa 2012 agomba kurangiza manda ye ya kabiri tariki 2 Mata uyu mwaka. Nk’uko Itegeko Nshinga rya Senegal ribiteganya  amatora y’Umukuru w’Igihugu agomba kuba habura iminsi iri hagati  30 na 45  ngo Perezida uriho arangize manda yemerewe.

N’ubwo ubu imyigaragambyo yatuje mu gihugu ariko Guverinoma yataye muri yombi benshi mu bigarambije muri iki cyumweru.

Uruhande rw’abatavuga rumwe n’ubutegetsi ruvuga ko ibintu bizajya ku murongo neza ari uko abafunzwe barekuwe ndetse hakaba n’ibiganiro hagati ya Guverinoma n’abatavugarumwe na yo ku itariki ya nyayo amatora y’Umukuru w’Igihugu agomba kuberaho nkuko Dr Manel Fall umwe mu bagize ishyaka PASTEF ritavuga rumwe n’ubutegetsi yabitangaje

  • ZIGAMA THEONESTE
  • Gashyantare 17, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE