Scotland yemereye u Rwanda inkunga yo gukwiza ingufu z’imirasire y’izuba

  • KAMALIZA AGNES
  • Ukuboza 4, 2023
  • Hashize amezi 3
Image

U Rwanda ruri mu bihugu bitatu by’Afurika, Guverinoma ya Scotland yemereye inkunga y’Amapawundi 575,000, ni ukuvuga amafaranga y’u Rwanda asaga miliyoni 907, azifashishwa mu gukwirakwiza ingufu z’amashanyarazi zitangiza ibidukikije.

Byagarutsweho n’Umuyobozi wa Guverinoma ya Scotland Humza Yousaf i Dubai muri Leta Zunze Ubumwe z’Abarabu (UAE), ahari kubera Inama y’Umuryango w’Abibumbye ya 28 yiga ku mihindagurikire y’ibihe (COP28).

Humza Yousaf yatangaje ko Amapawundi 325,000 muri iyo nkunga, azafasha kugeza ingufu z’amashanyarazi zitangiza ibidukikije mu bigo bitangirwamo serivisi z’ubuvuzi bw’abana muri Malawi, Zambia no mu Rwanda.

Ni mu gihe andi Mapawundi 250,000 azatangwa n’icyo gihugu cy’u Bwongereza azifashishwa mu gutera inkunga iyubakwa ry’imiyoboro mito igamije kurushaho gukwirakwiza amashanyarazi ku bantu benshi muri Zambia, ndetse no gukwirakwiza uburyo bwo guteka butangiza ibidukikije mu Rwanda.

Huza Yousaf yagize ati: “Guverinoma ya Scotland yiyemeje gutanga umusanzu wayo nk’umuturage mpuzamahanga igafasha mu guhangana n’ingorane zugarije Isi nk’ubukene, akarengane ndetse n’ubusumbane. Izi gahunda zigaragaza icyo ibyo bivuze bitari mu magambo gusa, haba ari ugutanga umutekano w’ingufu mu guharanira ko ubuvuzi buhabwa abana bukomeza nta nkomyi, cyangwa gufasha rubanda kugera ku buryo budahumanya bwo guteka hagamijwe kugabanya imfu z’imburagihe ziterwa no kwanduza umwuka wo guhumeka mu ngo.”

Yakomeje agira ati: “Malawi, Zambia n’u Rwanda ni ibihugu by’abafatanyabikorwa b’ingenzi muri gahunda z’iterambere mpuzamahanga za Scotland.”

Yanavuze kandi ko Scotland ari kimwe mu bihugu byabonye inyungu mu rugendo rwo kubaka inganda ku Isi ari na rwo rwateje ibibazo by’imihindagurikire y’ibihe, bityo icyo gihugu kikaba cyumva inshingano gifite zo gutanga umusanzu wacyo mu gushyigikira ibihugu bikomeje kuzahazwa n’ingaruka z’imihindagurikire y’ibihe.

Ati: “Nk’igihugu kimaze igihe kinini cyungukira mu nganda zagize uruhare mu kwangiza ikirere, birakwiye ko Scotland itanga umusanzu mu gushyigikira ibihugu byagizweho ingaruka zitagereranywa.”

Ibyo bihugu bibonye inkunga irebana n’ingufu mu gihe, mu mezi make ashize Scotland yari yanabyemereye inkunga ya miliyoni 24 z’Amapawundi, ni ukuvuga miliyari zisaga 35 z’amafaranga y’u Rwanda azifashishwa mu guhangana n’ingaruka z’imihindagurikire y’ibihe.

Bivuze ko mu myaka itatu iri imbere u Rwanda ruzakira inkunga ya miliyari zisaga 11.9 z’amafaranga y’u Rwanda, nka kimwe mu bihugu by’Afurika yo Munsi y’Ubutayu bwa Sahara byibasiwe n’ingaruka z’imihindagurikire y’ibihe.

Yousaf avuga ko Scotland yabaye igihugu cya mbere cyo mu Majyaruguru y’Isi cyiyemeje gutera inkunga ibihugu byahuye n’amage akomeye yatewe n’imihindagurikire y’ibihe mu myaka ibiri ishize.

Ubutabera buke buboneka mu kibazo mpuzamahanga cy’imihindagurikire y’ibihe ni na bwo bwatumye Scotland itangiza Ikigega kigamije guharanira ubwo butabera, kimaze imyaka irenga 10.

Yousaf yagize ati: “Twabaye igihugu cya mbere ku Isi cyabikoze. Nanone kandi nishimiye ko uyu munsi twabashije gutangiza umushinga wo guharanira ubutabera ku mihindagurikire y’ibihe mu miryango yo muri Malawi, Zambia no mu Rwanda.”

Yousaf yavuze ko ibigo nterankunga bitatu byo mu Bwongereza ari byo SCIAF, DAI, na NIRAS byiteguye gukorana n’abaturage b’ibyo bihugu bitatu hibandwa  ku miryango y’abatishoboye, aho bazafatanya na bo mu kubaka ubudahangarwa ku byago biterwa n’imihindagurikire y’ibihe.

Inama ya COP28, iteraniye  i Dubai kuva ku ya 30 Ugushyingo kugeza ku ya 12 Ukuboza, yitabiriwe n’ibihugu bigera ku 123, biturutse mu mpande zose z’isi, aho intego  y’uyu muryango ari uko Isi yagabanya ibyuka bihumanya ikirere ubushyuhe bukaguma kuri dogere 1.5 bitarenze mu mwaka wa 2030.

  • KAMALIZA AGNES
  • Ukuboza 4, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE