Rwamagana: Nyiramudahinga warokotse Jenoside yashyikirijwe inzu ya miliyoni 10 Frw

  • NSHIMIYIMANA FAUSTIN
  • Mata 17, 2024
  • Hashize ukwezi 1
Image

Nyiramudahinga Mariya w’imyaka 79 warokotse Jenoside yashyikirijwe inzu ifite agaciro ka miliyoni 10, ashimira Perezida wa Repubulika, Paul Kagame watumye Abarokotse bongera kugira ubuzima ndetse n’agaciro kuko yacitse ku kunyagirwa no gusembera byari byaramuzonze.

Kuri uyu wa Gatatu, tariki ya 17 Mata 2024, ubuyobozi bw’Akarere ka Rwamagana ku bufatanye n’Ihuriro ry’Urugaga Nyarwanda rw’Amakoperative na Federasiyo mu Rwanda bamushyikirije inzu.

Nyiramudahinga atuye mu Mudugudu wa Gatare, Akagari ka Rweru, mu M urenge wa Munyaga yavuze ko Jenoside yakorewe Abatutsi ariho atuye ndetse aba ariho arokokera. Yavuze ko abana be babiri n’umugabo we bishwe muri Jenoside arokoka we n’abakobwa be babiri.

Nyiramudahinga Mariya yavuze ko nyuma ya Jenoside yakorewe Abatutsi yabayeho asembera kuko yacumbikaga hirya no hino ariko nyuma y’igihe aza guhabwa amabati y’amakura ashaje. Yemeza ko inzu yabagamo yabaviraga ijoro n’amanywa.

Yagize ati: “Imibereho yacu nyuma ya Jenoside yari igoranye tubayeho nabi kuko igikuta kendaga kutugwira, imvura yagwa tukimura ibiryamirwa n’ibindi bikoresho mu ruhande rumwe ariko tukarara duhagaze.”

Kuri ubu arishimira ko nyuma y’imyaka 30 asembera ndetse aba mu bukode, we n’umuryango we bubakiwe inzu nziza kandi ifite ibikoresho byose.

Nyiramudahinga Mariya yashyikirijwe inzu irimo n’ibikoresho

Yagize ati: “Maze kubona inzu nziza yo kubamo, abana banjye n’abuzukuru ntibazongera kunyagirwa no gusembera bakodesha kuko bafite aho kuba heza kandi nanjye ni amasaziro meza mpawe.”

Mukakananura Gerardine ni umukobwa wa Nyiramudahinga Mariya w’imyaka 59 wasigaranye nawe ubwo abandi bavandimwe be bicwaga, yavuze ko babayeho bacumbitse ndetse bagera aho bagira impungenge z’ubuzima bwabo kubera inzu ishaje. Gusa ngo ubu ibyishimo ni byose.

Yagize ati: “Leta yacu itwitayeho ubu nta mpungenge z’aho kuba dufite. Ni iby’agaciro kuba tubonye inzu nziza kandi turabyishimiye. Umukuru w’Igihugu cyacu natwe tuzamuba hafi kuko ibyo atugejejeho ni byinshi kandi bidufitiye umumaro.”

Umuyobozi w’Ihuriro ry’Urugaga Nyarwanda rw’Amakoperative na Federasiyo mu Rwanda, Umulisa Jeannette yavuze ko bahisemo kubakira uyu muryango mu rwego rwo kuba hafi abarokotse Jenoside yakorewe Abatutsi mu 1994, kubahumuriza no kubagarurira icyizere cyo kubaho.

Kagabo Rwamunono Richard ari hamwe na Nyiramudahinga Mariya washyikirijwe inzu

Yagize ati: “Buri mwaka dusura inzibutso zitandukanye ariko buri rwibutso dusuye twiyemeza kubakira umuntu umwe warokotse Jenoside kandi buri gihe tujya ahantu hatandukanye hakabaho gutombora umuntu ukeneye kubakirwa kandi ntitwubakira umuntu uturutse muri federasiyo kuko natwe tuzi neza umumaro wo gufasha no gusenyera umugozi umwe tukubakira abakeneye aho kuba.”

Umuyobozi w’Akarere ka Rwamagana wungirije ushinzwe iterambere ry’Ubukungu, Kagabo Rwamunono Richard yavuze ko kubakira Abarokotse Jenoside babifashijwemo n’abandi bafatanyabikorwa ari igikorwa cy’ingenzi ariko kandi kubakira abarokotse Jenoside bizakomeza.

Yagize ati: “Twakiriye neza iyi nzu ihawe uyu muryango kuko ni umusanzu ukomeye ku Karere ka Rwamagana. Uyu mubyeyi yari asanzwe ari ku rutonde rw’abantu bazafashwa kubakirwa ku ngengo y’imari ariko iba idahagije. Inzu yubatswe neza kandi yubakishije ibikoresho birambye no mu buryo bubereye umuryango.

Turacyafite imiryango ikeneye kubakirwa kandi turabikora bigendanye n’ingengo y’imari ihari ariko tuzakomeza kububakira.”

Inzu yubakiwe Nyiramudahinga Mariya, ifite ibyangombwa byose bikenewe nk’ikigega cy’amazi, intebe zo mu ruganiriro, ibiryamirwa, ubwiherero n’ibikoni.

  • NSHIMIYIMANA FAUSTIN
  • Mata 17, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE