Rwamagana: Ishuri ry’ubuhinzi ku Mudugudu ryabafashishe guhinga kijyambere

  • NSHIMIYIMANA FAUSTIN
  • Werurwe 8, 2024
  • Hashize ukwezi 1
Image

Bamwe mu bahinzi bo mu Karere ka Rwamagana bavuga ko ishuri ry’ubuhinzi ryashyizwe muri buri Mudugudu byabafashije guhinga mu buryo bugezweho ndetse bibongerera umusaruro biturutse ku mahugurwa y’ubuhinzi bariherwamo.

Abahinzi bo mu Murenge wa Nzige mu Karere ka Rwamagana batangarije Imvaho Nshya ko bahoze bahinga mu buryo bwa gakondo bajya gutera imbuto bakamisha ariko kuri ubu basigaye bahinga kijyambere bitewe n’ishuri ry’ubuhinzi ku Mudugudu rituma bakurikiza amabwiriza y’ubuhinzi no gukoresha imbuto zatoranyijwe.

Aba bahinzi bishimira ko ubu buryo bwatumye bihaza mu biribwa mu muryango ndetse bagasagurira amasoko.

Umuhinzi wo mu Murenge wa Nzige, yemeza ko ishuri ry’ubuhinzi ryamufashije kubona umusaruro uhagije biturutse ku bumenyi n’amasomo bahabwa.  

Yagize ati: “Mbere ntarahabwa amahugurwa nahingaga mu buryo bwa gakondo nkeza ibilo 50 by’ibigori ku buso bwa Hegitari n’igice ariko mu gihembwe cy’ihingwa 2024A nkaba narejeje toni zirindwi z’ibigori kuri ubwo buso.

Mbere najyaga gutera ibigori cyangwa indi myaka nkajya imbere nkamisha imbuto mu murima ariko amahugurwa y’ubuhinzi yaradukanguye cyane ku bijyanye no guhinga kinyamwuga, ubu dusigaye duhinga ku buryo bwo kwihaza mu biribwa mu ngo zacu ndetse no gusagurira amasoko kuko twungutse ubumenyi tutahoranye mbere.”

Ayinkamiye Herena nawe yagize ati: “Ntaragana ishuri ry’ubuhinzi ku Mudugudu ntabwo nari nzi guhinga imbuto y’indobanure ndetse no gukurikiza amabwiriza n’inama bihabwa abahinzi. Umusaruro wari muke mu rugo iwanjye nkahinga ariko nkajya no guca inshuro kugira ngo mbone ibitunga umuryango. Uyu munsi rero umuryango wanjye ubona ibyo wifuza biturutse ku buhinzi nkora kandi nkabona n’umusaruro njyana ku isoko nkabona amafaranga yo kwizigamira mu bimina.”

Harelimana Tharcisse na we yunzemo ati: “Imihingire yarahindutse kuko ntiwacukura umwobo nta fumbire y’imborera n’imvaruganda kandi ngo ntutere ku murongo. Umusaruro warushijeho kwiyongera kuko ntabwo ubuhinzi tukibukora mu buryo bwa gakondo kuko aho mpinga ku Mudugudu kuri metero 20 kuri 30, nasaruraga ibiro 30 by’ibigori ariko ubu nejejeho ibilo 150 by’ibigori kubera ubuhinzi bugezweho.”

Umuyobozi w’Akarere ka Rwamagana, Mbonyumuvunyi Radjab yavuze ko imbaraga zashyizwe mu ishuri ry’ubuhinzi ku Mudugudu zatanze umusaruro ubu hakaba hagezweho igikorwa cyo gushyira mu bikorwa ibyo abahinzi bize.

Yagize ati: “Tumaze iminsi dushyira imbaraga mu mahugurwa y’abajyanama b’ubuhinzi ariko tukanashyira n’imbaraga nyinshi mu ishuri ryo mu murima kubera ko twasanze twigisha abahinzi kenshi ariko bagera mu rugo ntibabukoreshe neza. Ubu Umujyanama w’ubuhinzi arahinga urutoki, ibigori, ibishyimbo n’indi myaka mu mirima itandukanye abahinzi bakabigiraho.

Ubu tugeze mu cyiciro cy’ibikorwa noneho ni ukuvuga nkore neza bandebereho.”

Buri Mudugudu  wo mu Karere ka Rwamagana hari ishuri ryo mu murima aho Umujyanama w’ubuhinzi ahinga imyaka runaka mu buryo bwiza abandi bakamwigiraho.

Mu gihembwe gishize cy’ihinga 2024A mu Karere ka Rwamagana bejeje ibigori ku butaka buhuje toni ibihumbi 68,792 zeze ku buso bwa Hegitari 17,122.

Mu gihembwe cy’ihinga 2024B, hitezwe guhinga ku buso ibigori kuri Hegitari 418, ibishyimbo kuri Hegitari 16,297; umuceri kuri Hegitari 420, soya kuri Hegitari 90 n’imyumbati kuri Hegitari 40.

  • NSHIMIYIMANA FAUSTIN
  • Werurwe 8, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE