Rwamagana: Abarwaje imirire mibi baravuga imyato Igikoni cy’Umudugudu

  • NSHIMIYIMANA FAUSTIN
  • Gashyantare 21, 2024
  • Hashize amezi 2
Image

Bamwe mu babyeyi bo mu Karere ka Rwamagana bavuga ko mu myaka ishize abana babo bagize imirire mibi bitewe no kutamenya gutegura indyo yuzuye, gusa kuri ubu barishimira ko Leta y’u Rwanda yashyizeho gahunda y’Igikoni cy’Umudugudu cyazahuye abana babo bakabaho neza.

Abatuye mu Murenge wa Gahengeri bavuganye n’Imvaho Nshya,  bavuga ko baje gusobanukirwa ko ikibazo cy’imirire mibi kidaterwa n’ubukene mu muryango nkuko abenshi babivuga, ahubwo giterwa no kutamenya gutegura amafunguro yuje intungamubiri n’isuku.

Bemeza ko abana babo bahoranye ibibazo biterwa n’indwara zituruka ku mwanda n’imirire mibi bitewe n’ubumenyi buke bwo gutegura amafunguro.

Nyuma yo kwegerwa n’Abajyanama b’ubuzima aho batuye mu Mudugudu, bagiriwe inama yo kujya bajyana abana ahabera Igikoni cy’Umudugudu, ubuzima burahinduka kuri bo no ku bana babo.

Mukabagema Anastasia atuye mu Mudugudu wa Gatenderi, Akagari ka Kanyangese, yavuze ko yabyaye umwana muri Nyakanga 2022 apima ibilo bibiri n’igice ndetse ngo uko umwana yakuraga ibilo bye ntibyiyongeraga nkuko bikwiye kugeza ubwo abajyanama b’ubuzima bamwohereje ku Kigo Nderabuzima cya Gahengeri.

Arishimira ko kuri ubu afite ubumenyi ku gutengura indyo yuzuye bitewe n’uko babyigira mu Gikoni cy’Umudugudu, umwana we akaba ageze ku bilo 10 ku mwaka n’amezi arindwi afite.

Yagize ati: “Ndi umuhinzi uhinga ibihingwa bitandukanye ku buryo mu rugo nta kibazo cy’ibiribwa gihari. Ariko natunguwe n’uko umwana nabyaye yakuze ibiro bitiyongera kandi mugaburira ndetse akananywa. Umwana baramupimaga bakamusanga mu muhondo bigera n’aho banyohereza ku Kigo Nderabuzima. Gusa amahirwe nagize ni uko navuyeyo bakangira inama yo kujya mu Mudugudu ahateranira ababyeyi bakaduhugura ku isuku n’amafunguro dutegurira abana.”

Yakomeje agira ati: “Ubu ndishimira ko umwana afite ubuzima bwiza bitewe n’uko mbasha gutegura amafunguro mu rugo iwanjye, kandi nkanamuha ibyo kunywa biteguwe neza kandi byuje isuku. Buri kwezi duteranira mu Gikoni cy’Umudugudu bagakomeza kuduhugura.”

Izabayo Clarrise na we yavuze ko umwana we yamubyaye afite ibilo bitatu n’igice ariko atangiye kumuha imfashabere ibilo bigenda bigabanyuka kugera ubwo umwana yageze mu mutuku, bivuze ko yari mu mirire mibi.

Ati: “Amahirwe nagize ni uko twazaga gupimisha abana ku Gikoni cy’Umudugudu, tukajya dufashwa n’Ikigo Nderabuzima ndetse n’Abajyanama b’ubuzima bakadukurikirana. Amasomo nigiye mu gikoni cy’Umudugudu aramfasha mu rugo iwanjye ndetse n’iyo abana bahuriye hamwe bahabwa indyo yuzuye.”

Umuyobozi w’Ibitaro bya Rwamagana Dr Nshizirungu Placide, yavuze ko kuva Leta yashyiraho gahunda zitandukanye zirimo kwita ku babyeyi n’abana batwite, Igikoni cy’Umudugudu n’Ingo Mbonezamikurire y’Abana bato (ECDs), byatumye imibare y’abana bafite imirire mibi n’igwingira igabanyuka.

Yagize ati: “Imibare y’igwingira mu bana igenda igabanyuka dushingiye ku mibare, ariko na none imibare y’abagana kwa muganga baza kwivuza bitewe n’ingaruka z’imirire mibi baragabanyutse cyane ku buryo bugaragara, haba ku bitaro no ku bigo nderabuzima. Imbaraga nizikomeza gushyirwamo n’inzego zose bireba, zigafatanya n’abaturage, bizarushaho kuba byiza.”

Umuyobozi wungirije w’Akarere ka Rwamagana ushinzwe Imibereho myiza y’Abaturage Mutoni Jeanne, yavuze ko mu ngamba zafashwe mu kurwanya ikibazo cy’imirire mibi mu bana harimo kwigisha ababyeyi gutegura amafunguro n’ubukangurambaga bukaba buzakomeza mu bijyane no kongera Ibikoni by’Umudugudu.

Yagize ati: “Ibikoni by’Umudugudu byaradufashije cyane kugabanya umubare w’abana bagwingira kuko haba hari ibikoresho byifashishwa mu gukurikirana abana. Iyo dusanze bagiye mu muhondo dufata ababyeyi tukabigisha iminsi 12 kandi byaradufashije. Ababyeyi batwite bajye bipimisha kandi bitabire Ibikoni by’Umudugudu bige uko bategura indyo yuzuye, kandi bajye bohereza abana mu bigo mbonezamikurire no kubyara abana bashoboye kurera.”

Ubuyobozi bw’Akarere ka Rwamagana butangaza ko mu Cyumweru cyahariwe kurwanya imirire mibi n’igwingira cyatangiye tariki ya 19 kikazasoza ku wa 23 Gashyantare 2024, buzakomeza kwigisha ababyeyi uko bategura ifunguro no kwimakaza isuku.

Imibare igaragaza ko imibare y’igwingira mu bana yagiye igabanyuka mu Karere ka Rwamagana, aho mu 2020 ubushakashatsi bwakozwe ku buzima bw’abaturage n’imiturire (DHS), bwerekanye ko igwingira riri kuri 22%.

Ubushakashatsi bwakozwe muri Gicurasi 2023 mu cyumweru cyahariwe ubuzima bw’umuyeyi n’umwana, bwerekanye ko igwingira ryari 19.9% ndetse mu kwezi kwa Ugushyingo 2023 bugaragaza ko bagera kuri 17.6%. 

  • NSHIMIYIMANA FAUSTIN
  • Gashyantare 21, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE