Rwamagana: Abanyamahanga babona umuganda nk’umurage mwiza wakwira muri Afurika

  • NSHIMIYIMANA FAUSTIN
  • Ugushyingo 25, 2023
  • Hashize amezi 3
Image

Bamwe mu banyamahanga baba mu Rwanda bavuze ko umurage Abanyarwanda bafite wo gukora umuganda ari uburyo bwiza bwo kwishakamo ibisubizo no kwiyubakira igihugu, bityo ko n’ibindi bihugu byo muri Afurika byakabaye biwigiraho kuko ari ibikorwa biteza imbere ababikora.

Zerue Tlahun ukomoka mu gihugu cya Ethiopia akaba akora mu Kigo cy’Igihugu gishinzwe Ikoranabuhanga mu Itumanaho n’Isakazabumenyi (RISA), yavuze ko mu myaka ibiri amaze akorera mu Rwanda yanyuzwe nuko Abanyarwanda bakora umuganda.

Yagize ati: “Maze igihe nifatanya n’abaturage bo mu bice bitandukanye mu muganda, ariko ni igikorwa nashimye cyane kuko ubona abaturage bagira umurava kandi imirimo bakora ifasha igihugu. Ningera iwacu muri Ethiopia, nzareba umuyobozi utuyobora mubwire kuri iyi gahunda y’umuganda n’uburyo ukorwa natwe twishakemo ibisubizo kuko kuba gihoraho buri kwezi ni ibintu nakunze”.

Ibi kandi bishimangirwa na Haftom Nguse, yagize ati, “U Rwanda ni igihugu cyiza nkunda, ni yo mpamvu naje i Rwamagana mu muganda kandi mbona ari ingirakamaro. Ningera mu rugo nzafatanya n’abahatuye kuko twe iwacu muri Ethiopia biba nka rimwe mu mezi abiri cyangwa atatu”.

Umunyamabanga wa Leta muri Minisiteri y’Uburezi ushinzwe ikoranabuhanga, imyuga n’ubumenyi ngiro Irere Claudette yavuze ko umuganda w’uku kwezi wibanze ku gutera ibiti n’imbuto ku bigo by’amashuri kandi asaba ibigo by’amashuri n’ababyeyi gufatanya gukurikirana isuku ku bigo by’amashuri kugira ngo himakazwe isuku.

Yagize ati: “Abaturage n’abayobozi b’ibigo by’amashuri bakwiye gufatanya bakita ku gutera ibyatsi bifata ubutaka, ibiti n’imbuto bifata ubutaka mu rwego rwo kwirinda ibiza bishobora guterwa n’imihindagurikire y’ibihe, ibiza ntibyangize ibikorwa remezo. Turasaba ko byitabwaho kuko ahantu abana biga iyo utahasigasiye bigira ingaruka”.

Umuyobozi w’Akarere ka Rwamagana, Mbonyumuvunyi Radjab yashimiye umusanzu w’Abanyarwanda n’abanyamahanga bitabira umuganda, bityo aboneraho gusaba Abanyarwanda by’umwihariko abatuye i Rwamagana kubungabunga ibidukikije bakanazirika ibisenge by’inzu zabo mu rwego rwo kwirinda ibiza.

Yagize ati, “Dushima uruhare abaturage bagaragaza mu gukora no kwitabira ibikorwa by’umuganda. Turasaba abaturage kwirinda ibiza biterwa n’imiyaga ariko by’umwihariko ahahurira abantu benshi nko mu mashuri, mu nsengero, mu masoko n’ahandi kuko birinda kuba hagira abahaburira ubuzima.

Tugenzura niba inzu n’aho handi ibisenge biziritse bityo abaturage bakwiye kureba niba inzu ziziritse kuko nta bindi biza tugira inaha kubera imiterere y’aho uretse umuyaga usenya inzu.”

Umuganda usoza ukwezi k’Ugushyingo 2023, ubuyobozi bw’Akarere ka Rwamagana bwifatanyije n’abakozi b’Ikigo gishinzwe Ikoranabuhanga mu Itumanaho n’Isakazabumenyi (RISA), inzego z’umutekano n’abaturage bo mu Murenge wa Rubona ahakorewe Umuganda ku ishuri ry’Imyuga n’Ubumenyi ngiro rya Rubona TVT.

  • NSHIMIYIMANA FAUSTIN
  • Ugushyingo 25, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE