Rutsiro: Yaboneye ineza ya Perezida Kagame mu gusoroma icyayi

  • BAHUWIYONGERA SYLVESTRE
  • Ukuboza 10, 2023
  • Hashize amezi 5
Image

Ubuzima ntibari bworoshye kuri Niragire Fortunée, ubwo mu myaka 17 ishize umugabo yamutanaga abana batanu mu buzima bushaririye, ariko akazi ko gusoroma icyayi yabonye ku bw’imiyoborere myiza irangajwe imbere na Perezida wa Repubulika y’u Rwanda Paul Kagame kakamuhindurira ubuzima.

Niragire ni umwe mu baturage barenga 2700 bahinduriwe ubuzima n’ubuhinzi bw’icyayi n’imirimo ibushamikiyeho, barimo abo mu Mirenge 6 y’Akarere ka Rutsiro yegeranye n’Uruganda rw’Icyayi rwa Rutsiro, ndetse n’abagiye baturuka ahandi baza kuhashaka akazi.

Kimwe na bagenzi be, Niragire ashimira Perezida Kagame wateje imbere ubuhinzi bw’icyayi cy’u Rwanda kuri ubu kikaba gikunzwe mu ruhando mpuzamahanga aho gikomeje kwinjiriza igihugu amadovize agaruka akagera ku bahinzi n’abasoromyi bacyo.

Avuga ko ubwo umugabo yamutanaga abana batandatu mu bukode nta cyo kurya bagiraga, akaba yarabonye ubutabazi mu gusoroma icyayi kandi ngo ni akazi kamuhinduriye ubuzima agera ku iterambere atatekerezaga.

Ati: “N’iyo ndyamye ndota ineza ya Perezida Kagame. Imyaka 17 irashize umugabo antanye abana batanu mu buzima bubi butagiraga n’inzu, narihebye nta n’unsuhuza. Aho icyayi kiziye nkabonamo akazi ko gusoroma, abana barize, niyubakira inzu tubamo,ndasirimuka, ngera aho abandi bari nemye.”

Kuri ubu Niragire yishimira ko abana be bakuze kandi bize neza, ndetse mu bana umugabo we yamusigiye ngo amaze gushyingiramo babiri.

Ati: “Uwo yasize nonsa afite imyaka 17 kandi ameze neza…”

Uretse Niragire, abandi bahinduriwe ubuzima n’ubuhinzi bw’icyayi baganiriye n’Imvaho Nshya, bavuze ko mbere y’uko Perezida Kagame abemerera kugihinga akanabaha uruganda rugitunganya bari mu bukene bukabije.

Ibyo ngo byaturukaga ku butaka buteraga bw’aka gace, aho ifaranga ryabonaga umugabo rigasiba undi, abana benshi batiga kubera ubukene bukabije bw’ababyeyi.

Bagaragaza Severin w’imyaka 34, wavukiye muri aka gace, ari mu bagize aya mahirwe bahawe n’Umukuru w’Igihugu kuko ari we wazanye igisubizo kuri ubwo butaka buteraga.

Yavuze ko icyo gisubizo cyaje nyuma y’uko bamugejejeho ikibazo cy’ubutaka bwabo buteraga ubwo yahageraga yiyamamaza mu mwaka wa 2003, imvugo ikaba yarabaye ingiro guhera mu 2007.

Abaturage b’i Rutsiro bishimira ko ahantu hateraga kuri ubu hahindutse isoko yubukire

Yongeraho ko kubera ubukene bukabije bw’ababyeyi, abana barindwi bavukana nta n’umwe wagize amahirwe yo kwiga. Gusa we yishimira ko yize ayisumbuye kubera akazi yabonye mu mirima y’icyayi ubu akaba yariteje imbere bihabanye nuko ababyeyi be bazahajwe n’ubukene.

Ati: “Uko icyayi cyazaga akazi nkagumamo natangiye ayisumbuye, nkiga nkora nishyura ay’ishuri. Ngiye mu cyiciro cya 2 cy’ayisumbuye njya aho nshumbikirwa, mu kiruhuko nkaza ngakora nkishyura, ndayarangiza bampa akazi gahoraho ubu ndi umukozi ufite amasezerano y’akazi.”

Yarakomeje agira ati: “Icyayi cyadukuye mu bwigunge, kiturihira amashuri tutari kuziga. Mfite inzu yanjye nziza niyubakiye, mfite umugore n’abana 3, mushiki wanjye unkurikira na we yagize amahirwe abonamo akazi yiga ayisumbuye mu gihe 6 batubanziriza batize kuko cyari kitaraza. Mfite inka yanjye nziza ihaka, ngateganya kugira inka 3 vuba, n’ibindi nkesha iki cyayi nkomeje iterambere.”

Niragire Domina,ufite hegitari ebyiri z’icyayi akuramo aya buri kwezi, bimaze kumuha inzu y’ubucuruzi muri santere y’ubucuruzi ya Congo-Nil, akagira iyo abamo nziza n’ibindi by’iterambere, akavuga ko agiye kwagura ubuso bukagera kuri hegitari eshanu.

Ati: “Ndi mu nzira nziza y’ubukire kubera icyayi. Rwose Perezida Kagame yaduhinduriye ubuzima akoresheje ubuhinzi bw’icyayi kuko nta kindi cyari guha akazi abagafite ubu ino, ngo duture  heza nk’uku. Imana imuhe umugisha.”

Umuyobozi w’Uruganda rw’icyayi rwa Rutsiro Nahayo Philippe, yashimangiye ibyavuzwe n’aba bahinzi, agira ati: “Hano mbere y’uko haza icyayi ubutaka ntibweraga, abaturage bakennye cyane pe! Perezida wa Repubulika asanga bazahurwa n’icyayi batangira kugihinga bamwe batumva akamaro kacyo, abagishyizeho umwete  bacyejeje n’uruganda ruje,  ifaranga ritangira kuba ryose.”

Avuga ko buri kwezi amafaranga arenga miliyoni 250 yinjira mu baturage, arimo ayishyurwa abahinzi, abasoromyi n’ibindi bikenerwa n’abaturage birimo ibikorwa remezo, kubakira abatishoboye inzu zo guturamo n’ibindi.

Michiel Hillen, Umwe mu bagize Inama y’Ubutegetsi ya Rwanda Mountain Tea, yavuze ko icyayi cy’u Rwanda gifite akarusho ko gukundwa ku Isi yose.

Ati: “Ubuhinzi bw’icyayi ni nk’umupira w’amaguru. Ntiwaturuka inyuma ucenga wenyine ngo uvuge ngo uzatsinda, bisaba gushyira hamwe. Ndashimira mwese abafite aho bahuriye n’ubu buhinzi. Ibyo mukora bigira impinduka nziza ku buzima bwanyu. Ndanashimira Perezida Kagame kuko ni Umuyobozi mwiza utuma byose bigerwaho.”

Nubwo bishimira izi mpinduka, abahinzi b’icyayi bagaragaza ko hakiri imbogamizi zirimo imihanda ijya mu cyayi idatunganyijwe, kuba umusaruro uhaza uruganda  utaragerwaho neza, kuba hari imyenda itangwa na Banki y’u Rwanda y’Iterambere (BRD) yagoye abahinzi kuyishyura n’ibindi.

Umunyamabanga Nshingwabikorwa w’Akarere ka Rutsiro Bagirishya Peter, yijeje ubuvugizi n’ubufatanye mu gushakira umuti urambye izo ngorane, ashima uruganda uruhare rugira mu iterambere ry’abaturage.

Gitifu w’Akarere ka Rutsiro Bagirishya Peter, yijeje gukomeza ubuvugizi n’ubufatanye mu kugera ku bigikenewe
Uruganda rwanashyikirije uwarokotse Jenoside yakorewe Abatutsi inzu rwamwubakiye
Nahayo Philippe avuga ko kuba abarenga 2700 bafite akazi muri iki cyayi ari ishimwe rikomeye kuri Perezida Kagame
Abayobozi basura abana bari mu irerero
Bamwe mu bahinzi n’abasoromyi b’indashyikirwa barorojwe amatungo magufi
Niragire Domina avuga ko agiye kongera hegitari 3 kuri 2 afite kubera ibanga ry’ubukire burambye abona mu cyayi
Michiel Hillen avuga ko imiyoborere myiza u Rwanda rufite ari yo ituma icyayi cyarwo gikundwa ku Isi yose
  • BAHUWIYONGERA SYLVESTRE
  • Ukuboza 10, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE