Rusizi:  Umusozi wafunze umugezi wa Rusizi hatikiriramo imyaka y’asaga  10.000.000 Frw

  • BAHUWIYONGERA SYLVESTRE
  • Werurwe 13, 2024
  • Hashize ukwezi 1
Image

Mu ijoro rishyira ku wa Kabiri, saa cyenda ku musozi wa Bikombe, mu Mudugudu wa Nyamagana, Akagari ka Kabuye, Umurenge wa Nyakarenzo, Akarere ka Rusizi, hongeye kuriduka bifunga umugezi wa Rusizi hangirika imyaka y’abaturage y’agaciro gasaga miliyoni 10.

Ahongeye kuriduka hareshya n’ikilometero 1 n’ubutaka bwo hasi butari bwagiye bwo ku bilometero 2,5 bwafunze umugezi wa Rusizi, hangirika imyaka yo mu Mirenge ya Mururu na Nyakarenzo ndetse na zimwe mu nzu z’Abanyekongo bahaturiye zishirira mu mugezi.

Nk’uko Umunyamabanga Nshingwabikorwa w’Umurenge wa Nyakarenzo Ntawizera Jean Pierre yabitangarije Imvaho Nshya, iby’ibi biza byamenyekanye mu ma saa cyenda z’ijoro kuri uyu wa Kabiri tariki ya 12 Werurwe, ubwo abatuye Imidugudu ya Nyamagana na Mugerero, mu Kagari ka Kabuye bakangurwaga n’urusaku rwinshi rw’abaturanyi babo b’Abanyekongo.

Kubera ko bari baherutse guhura n’ibyo biza ku wa 23 Gashyantare 2024, umusozi bahingagaho ukamanukira mu mugezi wa Rusizi ku manywa y’ihangu, saa cyenda z’igicamunsi, imiryango 54 ikahatikiriza imyaka.

Ati: “Bagiye kureba bucyeye basanga uwo musozi n’ubundi wafunze umugezi wa Rusizi uhuza RDC n’u Rwanda, nk’uko byagenze ubushize mu kwezi kwa Gashyantare 2024, imyaka yabo irimo imyumbati, ibisheke, imboga, urutoki, amapera n’ishyamba rya Leta rya Rwimikaba by’agaciro ka 6.000.00 bitwarwa n’amazi, igice cy’ubutaka bwari buhinzeho amapera kijya ku butaka bwa RDC.”

Uwo mugezi wari wafunzwe n’icyo gitaka cyose ukabura aho usambira, amazi yabaye menshi agaruka mu gice cy’Umurenge wa Mururu, mu Tugari twa Tara na Kagarama, usandara mu mirima y’abaturage, imyaka irimo ibishyimbo bari bamaze igihe gito bateye, imboga n’imyumbati by’agaciro k’arenga 4.500.000 irengerwa n’amazi, ahakora uturwa 3, ahareshya n’ibilometero 2,5 nk’uko umwe mu baturage bari bahari yabitangarije Imvaho Nshya.

Yagize ati: “Ayo mazi yanahise yiroha mu nzu z’Abanyekongo baturiye uyu mugezi, inzu zabo hafi ya zose zubatse kuri metero 50  uvuye ku mugezi zimanukiramo, zikagenda uko zakabaye kuko ari inzu z’ibiti n’imbaho, igisenge cyose kikareremba mu mazi,I biti bikagwamo, ibisenge birenga 5 bitavuyeho ikintu na kimwe,amabati yose ari uko yari ari ku nzu, nta ryatanye n’irindi, yiroha ku gice cy’u Rwanda, ibindi bice by’inzu zose zabo tutamenye umubare bitikirira muri uwo mugezi.”

Ab’inzu zasandariye mu mugezi b’i Bukavu bazitegerezaga zireremba n’ibikoresho byose babuze icyo bakora

Yakomeje ati: “Icyakora bashobora kuba babimenye kare bakaburirana muri iryo joro bose bakabyuka, kuko nta waho turumva byahitanye.’’

Umunyamabanga Nshingwabikorwa w’Umurenge wa Mururu, Ngirabatware James, yabwiye Imvaho Nshya ko amabati, ibiti, imbaho n’ibindi bikoresho by’inzu z’Abanyekongo byaje mu Rwanda babikusanyirije hamwe birabikwa, hategerejwe ko ubuyobozi bw’impande zombi buganira uburyo ba nyira byo bazabitwara.

Ati: “Hari abaturage bacu bari bagerageje kujyana amabati iwabo, yose twayagaruje, ashyirwa hamwe n’andi turayabika nk’ubuyobozi, inzego z’ubuyobozi z’impande zombi zizaganira uburyo bazaza kuyatwarana n’ibikoresho bindi twababikiye.’’

Ubuyobozi bw’Umurenge wa Mururu n’uwa Nyakarenzo burabara imyaka y’abaturage ihinze kuri hegitari 6, y’agaciro k’amafaranga hafi 29.000.000 imaze kuhatikirira muri izi nshuro 2 ibi biza bibaye. Aya mazi hari aho yakoze nk’ikiyaga kuko ubutaka bwayarengeye, ku ruhande rw’Umurenge wa Mururu na ho bakaba batizeye ko ayo mazi yahasandaye akabangiriza imyaka azakama vuba ngo bongere nibura batere ibishyimbo.

Kimwe nuko mbere hakozwe raporo igashyikirizwa MINEMA ngo igoboke abaturage, hagiye gukorwa indi na yo ishyikirizwa iyi Minisiteri ngo harebwe ko abaturage bahuye n’ibi byago bagobokwa.

Bavuga icyakora ko ku gice cyegereye Repubulika iharanira demokarasi ya Congo RDC, amazi yatangiye kwishakira inzira, ku ruhande rw’u Rwanda ari ho bigikomeye, amazi akomeje gukora ikiyaga n’uturwa kubera iyo nkangu.

Ubuyobozi bwasabye abaturage kwirinda kuhegera, cyane cyane mu masaha akuze no kurinda abana kujya muri uwo mugezi gushakamo ibisheke no koga muri ibyo bidendezi,ko bashobora kuhasiga ubuzima.

Ibi biza byabaye nta mvura nyinshi yaguye, ariko kuko ari mu gishonyi, n’akavura gake iyo kaguye buhita bwose bumanukira muri uriya mugezi, Gitifu wa Nyakarenzo Ntawizera Jean Pierre akavuga ko hari umushinga ugiye gufatanya n’Akarere kuhatera ibiti by’imigano n’iby’imbuto ziribwa bizahafata.

  • BAHUWIYONGERA SYLVESTRE
  • Werurwe 13, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE