Rusizi: Ukekwaho kwicisha umugore we ishoka yafatiwe i Burundi

  • BAHUWIYONGERA SYLVESTRE
  • Gashyantare 9, 2024
  • Hashize ibyumweru 3
Image

Ubuyobozi bw’Akarere ka Rusizi bwemeje amakuru y’uko Nizeyimana Cyprien w’imyaka 48 ukekwaho kwica umugore we akoresheje ishoka agahita ahungira i Burundi yambutse umugezi wa Ruhwa, yatawe muri yombi akigera muri icyo gihugu.

Bivugwa ko yafashwe mu gitondo cyo ku munsi yambukiyeho akigera ahitwa ku Mutumba wa Miremera, Zone ya Ruhororo, muri Komine Mabayi mu Ntara ya Cibitoki, ubu akaba afungiwe muri kuri Sitasiyo ya Polisi ya Mabayi i Nyamirambi.

Umuyobozi w’Akarere ka Rusizi Dr Kibiriga Anicet, yahamirije Imvaho Nshya ko bamenye amakuru y‘uko Nizeyimana ukekwaho kwica umugore we Mukarutabana Annonciata yafatiwe i Burundi ku bufatanye n’Inzego z’ibanze n’iz’umutekano zaho.

Dr Kibiriga yagize ati: “Yego, yafashwe. Tukimara kumenya ko yasize yishe umugore we agahungira hariya mu baturanyi i Burundi, twahise tubimenyesha Inzego z’umutekano za Komini Mabayi aho i Burundi, mu mikoranire myiza dusanganywe, zitangira kumushakisha. Ubu tuvugana yafashwe, ari mu maboko yazo. Turi kuvugana uburyo bamutugarurira biragenda neza, azatugeraho vuba bidatinze.”

Yashimiye Inzego z’umutekano za Komini Mabayi mu Burundi, agira ati: “Turashimira cyane inzego z’umutekano za komini Mabayi ku bufatanye bwiza mu kudufatira abanyabyaha kuko hari n’abandi basanzwe bakora ibyaha hariya i Bweyeye bagahungirayo bakabafata, bakabatugarurira, kimwe n’uko hari Abarundi bakorera ibyaha iwabo, baza gushaka ubuhungiro iwacu tukabafata tukababashyikiriza.”

Nizeyimana ukora akazi k’izamu muri SACCO ya Bweyeye, akekwaho kwica umugore we nyuma y’amakimbirane bari bamazemo imyaka irenga 10, bakaba bari banamaze imyaka ibiri batabana mu rugo rumwe.

Meya Dr. Kibiriga yasabye abaturage kwirinda amakimbirane mu miryango, bakanatangira amakuru ku gihe kuko n’iryo fatwa ryaturutse ku makuru yatanzwe n’abaturage ashimira cyane.

Amakimbirane mu ngo muri aka Karere amaze iminsi agaragara cyane agera ku kwamburana ubuzima, kwiyahura cyangwa gukomeretsanya bikabije hagati y’abashakanye.

Dr. Kibiriga avuga ko nubwo hari ibimenyekana birengereye ayo makimbirane agenda agabanyuka ugereranyije n’ibihe byashize, agasaba buri wese ushishikajwe n’imibanire myiza y’imiryango guhaguruka agatanga uruhare rwe mu kunga imiryango ikibanye nabi.

Umuyobozi w’Akarere ka Rusizi, Dr Kibiriga Anicet yemeje itabwa muri yombi rya Nizeyimana Cyprien ukekwaho kwica umugore we agahungira i Burundi
  • BAHUWIYONGERA SYLVESTRE
  • Gashyantare 9, 2024
  • Hashize ibyumweru 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE